Ձեր վստահելի աղբյուրը

Օրերս, Եվրոպական հանձնաժողովը նոր զեկույց է հրապարակել Արևելյան գործընկերության անդամ երկրների վերաբերյալ: Հայաստանին ու Ադրբեջանին վերաբերող հատվածում կոչեր արվում կողմերին` չխոչընդոտել ԵՄ ներկայացուցիչների անարգել մուտքը Ղարաբաղ ու հարակից տարածքներ:

Panorama.am-ի հետ զրույցում, ԼՂՀ նախագահի աշխատակազմի հասարակայնության հետ կապերի գլխավոր վարչության պետ Դավիթ Բաբայանը, արձագանքելով վերոնշյալ հայտարարությանը, նշեց, որ իրենց համար նման ձևակերպումները սպասելի էին:

«Ադրբեջանի պահվածքը տարածաշրջանի համար մեծ վտանգ է ներկայացնում տարածաշրջանում կայունության ու խաղաղության հաստատման համատեքստում»,- ասաց նա:

Ըստ Բաբայանի, ճիշտ է` Արցախը միջազգայնորեն չի ճանաչվել, սակայն դա չպետք է տոտալիտար բնույթի պետության` Ադրբեջանի, անհարիր վարքագծի պատճառով զերծ պահի Եվրոպային` համագործակցել Արցախի հետ:

«Արցախի հետ համագործակցությունը Եվրոպայի համար, քաղաքականից բացի ունի նաև բարոյական նշանակություն և Ադրբեջանի ուզենալ կամ չուզենալը չպետք է արգելքներ ստեղծի ԵՄ-Արցախ հարաբերություններում»,- հավելեց նա:

Հարցին, թե ի՞նչ ոլորտներում է նախատեսված կամ հնարավոր համագործակցությունը ԵՄ-ի հետ, Դ. Բաբայանն ասաց. «Հիմնականում մարդասիրական ոլորտներում, կրթության, ժողովրդավարական ինստիտուտների զարգացման: Հասկանալի է, որ սկզբնական շրջանում դրանք ծավալային առումով մեծ չեն լինի, սակայն ժամանակի ընթացքում աստիճանաբար համագործակցությունը կխորացվի: