Ձեր վստահելի աղբյուրը

Ուկրաինայի շուրջ կուտակված աշխարհաքաղաքական խնդիրները կարող են բացասական ազդեցություն ունենալ համաշխարհային տնտեսության համար, իսկ պատժամիջոցների պատճառով կապիտալի փախուստը Ռուսաստանի վրա բացասական հետևանքներ է ունենում, հայտարարել է Արժույթի միջազգային հիմնադրամի տնօրեն-ղեկավար Քրիստին Լագարդը:

Խիստ բարեփոխումներ` վարկի դիմաց
Եթե Ուկրաինայում չստացվի իրավիճակը պահել վերահսկողության տակ, ապա այդ ճգնաժամն իր բացասական ազդեցությունը կունենա այլ երկրների վրա և կարգելակի համաշխարհային տնտեսության աճը, Deutsche Welle-ի փոխանցմամբ, Վաշինգտոնում ապրիլի 2-ին PBS հեռուստաալիքին տված հարցազրույցի ընթացքում հայտարարել է Քրիստին Լագարդը:

«Խոսքն այնպիսի տնտեսության մասին է, որը լուրջ բարեփոխումների կարիք ունի, անհրաժեշտ է խորը վերափոխումներ իրականացնել հարկաբյուջետային համակարգում, արժութային քաղաքականության, էներգետիկ քաղաքականության մեջ»,-նշել է մասնագետը:

Ընդ որում նա խոստովանել է, որ «առանց Ռուսաստանի կողմից աջակցության, որը` որպես «փրկողակ» նետվեց մի քանի ամիս առաջ, նրանք (ուկրաինացիները) առաջ չէին շարժվի»: Միևնույն ժամանակ Լագարդը նշել է, որ տնտեսության վերականգնման համար Ուկրաինային հատկացվող միջոցներն ամենևին «անվճար չեն տրվում», այլ դրանց դիմաց դրված են խիստ կանոններ:

Նա վստահություն է հայտնել, որ Կիևի իշխանությունները կապահովեն ԱՄՀ-ի կողմից օգնության փաթեթի դիմաց պահանջվող բոլոր պայմանները: Այս առիթով նա նշել է, որ ԱՄՀ-ն մեկ անգամ չէ, որ զգուշացրել է Կիևին «կոռուպցիայի դեմ պայքարի, արդյունավետ պետական կառավարման վերականգնման, էներգառեսուրսների համար ճիշտ գնի սահմանման, ֆիսկալ վերահսկողության վերականգնման և այլ բարեփոխումների անհրաժեշտության մասին»:

Ուկրաինային 14-18 մլրդ դոլար ֆինանսական օգնության տրամադրման դիմաց ԱՄՀ-ն պահանջում է մի շարք փոփոխություններ կատարել սոցիալական և այլ ոլորտներում:

Կապիտալի փախուստ Ռուսաստանից
Քրիստին Լագարդը, անդրադառնալով Ռուսաստանի դեմ Արևմուտքի կողմից կիրառված պատժամիջոցներին, նշել է, որ դրանք արդեն իսկ բացասաբար են անդրադարձել Ռուսաստանի տնտեսության վրա, հաղորդում է ИТАР-ТАСС գործակալությունը:

«Եթե հետևենք վերջին ամիսներին Ռուսաստանից կապիտալի փախուստի ծավալներին դեպի համաշխարհային տնտեսության այլ մասեր, եթե ուսումնասիրենք ՌԴ կենտրոնական բանկի կողմից դրամավարկային քաղաքականության փոփոխության մասին որոշումը, ապա պարզ է դառնում, որ առկա են պատժամիջոցների կիրառման սպառնալիքի և հենց պատժամիջոցների կիրառման հետևանքներ», - ասել է Լագարդը:

Նրա գնահատականներով` Ռուսաստանից տեղի է ունենում կապիտալի «զանգվածային արտահոսք», որը «հստակ ցուցիչ է այն բանի, որ փողերը գնում են երկրից»:

ИТАР-ТАСС-ի փոխանցմամբ ` ՌԴ ԿԲ նախագահող Էլվիրա Նաբիուլինան չորեքշաբթի օրը Ռուսական բանկերի ասոցացիայի նիստի ժամանակ հաղորդել է, որ ՌԴ-ից կապիտալի փախուստը 2014թ-ի առաջին քառորդում գերազանցել է 20 մլրդ դոլարի կանխատեսված չափը:

«Հիմա իսկ հասկանալի է, որ կապիտալի փախուստի գնահատականները նշանակալիորեն գերազանցում են 20 մլրդ դոլար մեր նախնական կանխատեսումն այս տարվա համար», - նշել է Նաբիուլինան:

Նրա խոսքերով, դրա պատճառներից առաջինը միջոցների դուրս բերումն է ներդրողների կողմից, իսկ մյուս պատճառը` ռուսական բանկերում պահվող միջոցների փոխանցումն է արտասահմանյան բանկերին: