ԵԽԽՎ-ում կքննարկվի թե Քեսաբի, թե հայ գերիների խնդիրը. Ն.Զոհրաբյան
Երկուշաբթի օրը Ստրասբուրգում մեկնարկում է ԵԽԽՎ գարնանային նստաշրջանը, որի օրակարգը, ըստ ԵԽԽՎ-ում հայաստանյան պատվիրակության անդամ Նաիրա Զոհրաբյանի, բավականին ակտիվ ու հագեցած է: Panorama.am-ի հետ զրույցում պատգամավորն ասաց, որ ըստ ամենայնի կքննարկվի նաև Քեսաբի խնդիրը:
«Օրակարգում նախատեսված է ԵԽ հանձնակատարի տարեկան հաշվետվությունը և, կարծում եմ, դրա շրջանակում հարցեր կհնչեն հանձնակատարին ուղղված մարդու իրավունքների և մասնավորապես Քեսաբի դեպքերի հետ կապված: Ընդ որում ես համոզված եմ, որ Քեսաբի վերաբերյալ հարցերը կբարձրացնեն ոչ միայն հայ պատվիրակները»,- նշեց նա:
Panorama.am-ը ավելի վաղ գրել էր, որ Ն.Զոհրաբյանը մարտի 5-ին հայ գերիների հարցով նամակով դիմել էր ԵԽ Մարդու իրավունքների հանձնակատարին` խնդրելով, որ որպես ԵԽ մարդու իրավունքների հանձնակատար, ուղղակիորեն օգտագործելով իր իրավասությունը, ազդեցությունը անի հնարավորը, որպեսզի Հակոբ Ինջիղուլյանը տեղափոխվի Հայաստան կամ երրորդ երկիր:
Ն.Զոհրաբյանը նամակում հստակ նշել էր, որ Ադրբեջանում անցկացրած յուրաքանչյուր օրը Հակոբի կյանքին ուղղակիորեն սպառնալիք է: Եվ որ Հակոբ Ինջիղուլյանի հետ կապված հարցադրումը ԵԽ Մարդու իրավունքների հանձնակատարը ստացել է և ապրիլի 7-ին` ԵԽԽՎ գարնանային նստաշրջանի ընթացքում պատրաստ կլինեն պատասխանները.
«Ակնկալում եմ, որ հանձնակատարը կպատասխանի իմ հարցին` հայ գերիների և մասնավորապես Հ.Ինջիղուլյանի հետ կապված և հատկապես այն հարցին, թե ինչ միջոցներ պետք է ձեռնարկի ԵԽ-ն, որպեսզի Ադրբեջանը, որը ստորագրել է Ժնևյան կոնվենցիան գերիների և ռազմագերիների վերաբերյալ չխոշտանգի հայ գերիներին: Մենք գիտենք, թե ինչ են արել ադրբեջանցիները Մամիկոն Խոջոյանի հետ, թե ինչպես այդ 77-ամյա ծերունու ամբողջ մարմնի վրա կիսալուսնի դաջվածքներ կային… Այս ամենի մասին պետք է բարձրաձայնվի ու խոսքվի»,- տեղեկացրեց նա:
Ն.Զոհրաբյանի խոսքով` նստաշրջանի ինտրիգը, բնական է, ԵԽԽՎ-ում ռուսաստանյան պատվիրակությանը ձայնից զրկելու հարցն է, որի շուրջ դեռևս որևէ հստակություն չկա:
«Մինչ այս պահը հայտնի չէ, թե ինչպես է հարցը բարձրացվելու և մի քանի տարբերակներ են շրջանառվում: Մասնավորապես` զրկել պատվիրակությանը ձայնի իրավունքից լիագումար նստաշրջանի ընթացքում, կամ զրկել ձայնից հանձնաժողովներում քվերակությունների ժամանակ, կամ ընդհանրապես կասեցնել ԵԽԽՎ-ում անդամակցությունը: Այսինքն` մի քանի պատժամիջոցի տարբերակ է շրջանառվում, բայց թե վերջնական որ տեսքով այն կդրվի քվեարկության, այս պահին դեռ պարզ չէ»- տեղեկացրեց տիկին Զոհրաբյանը:
Օրակարգում է նաև մի զեկույց, որը բավականաչափ աղմուկ է բարձրացրել: Խոսքը Ռուդի Սալեսի զեկույցի մասին է, որը վերաբերում է անչափահասներին քայքայիչ աղանդների մեջ ներքաշելու խնդրին: Ն.Զոհրաբյանը նշեց, որ ինքը ևս պաշտպանում է այդ զեկույցը, ի պաշտպանություն դրա անպայման ելույթ է ունենալու:
«Արդեն իսկ տարբեր աղանդապաշտ գրանտակեր կազմակերպություններ ահաբեկող ու ուլտիմատում ներկայացնող նամակներ են հղում ԵԽ պատգամավորներին` կոչ անելով կողմ չքվեարկել այս զեկույցին այն տեղավորելով կրոնի ազատության կոնտեքստում: Բայց եթե անչափահասներին տարբեր վտանգավոր, քայքայիչ, այլասերված աղանդների մեջ են ներքաշում և դա կարող է ինչ-որ մեկը համարել կրոնի ազատության պաշտպանության իրավունք, ապա ինձ համար դա բացարձակապես անընդունելի է և ի պաշտպանություն զեկույցի ես ելույթ եմ ունենալու»,- ընդգծեց ԱԺ պատգամավորը:
Խնդիրը, ըստ նրա, շատ լուրջ ու խորքային է, քանի որ տեսնում ենք քայքայիչ աղանդների գործունեությունը նաև Հայաստանի նման երկրներում, որտեղ մարդկանց սոցիալական ծանր վիճակը շահարկելով երիտասարդներ ու ամբողջական ընտանիքներ են ներքաշվում այդ աղանդների մեջ:.
«Երիտասարդների կյանքն է կործանվում և դրա դեմ պետք է անպայմանորեն պայքարել»,-շեշտեց նա:
Նախորդիվ`
ԵԽ Մարդու իրավունքների հանձնակատարը ապրիլի 7-ին կպատասխանի Ն.Զոհրաբյանին հայ գերիների հարցով
Լրահոս
Տեսանյութեր
Վ.Հակոբյան. Ռուսաստանի հետախուզությունն ասում է՝ գիտենք, ինչ փողեր են գալիս, ում գրպաններն են մտնում
