Ձեր վստահելի աղբյուրը

Վերջերս ակտիվորեն շրջանառվում է ազգային համաձայնության կառավարության ձևավորման թեման, որն էլ ավելի արդիական դարձավ վարչապետ Տիգրան Սարգսյանի հրաժարականից հետո: Այս առումով հետքրքրական է ի մի բերել վերոնշյալ հարցում խորհրդարանական քաղաքական ուժերի դիրքորոշումները:

Այս համատեքստում առաջին հերթին ակտուալ է Տիգրան Սարգսյանի կառավարությանը անվստահություն հայտնելու նախաձեռնությամբ հանդես եկած ԱԺ ոչ իշխանական չորս ուժերի տեսակետը:

Այսպես` ԱԺ ՀՅԴ խմբակցության ղեկավար Արմեն Ռուստամյանը  գործանականում չէր բացառել ՀՅԴ-ի` ազգային համաձայնության կառավարության կազմում ընդգրկվելու հնարավորությունը:

«Մենք մեր մոտեցումը բազմիցս հայտնել ենք և չենք վարանում կրկնել: Մենք ասել ենք, որ հստակ, հիմնավորված մոտեցումներ ունենք, թե ինչպե՞ս է պետք երկիրը այս ճգնաժամային իրավիճակից հանել և դա ձևակերպել ենք յոթ կետերի մեջ: Այդ յոթ կետերը, բնականաբար, ենթադրում են ժամանակացույց, ծրագրում… Եթե այս ամենը կատարվի, մենք կմտնենք պրոցեսի մեջ՝ անկախ ամեն ինչից, որովհետև վստահ ենք, որ դրա արդյունքում երկիրը նոր որակ կստանա: Իսկ Դաշնակցությունն էլ երկրի դիտորդը չէ, մասնակցելու է բոլոր այն գործընթացներին, որոնք հեռանկարային են պետության, ժողովրդի ապագայի համար:…Եթե լիարժեք, ամբողջությամբ մեր ծրագրերը ընդունվեն, մենք տեսնենք, որ ազգային, պետական ուղեգիծը, ընթացքը, տեմպը համապատասխանում են մեր մոտեցումներին, գաղափարներին, ապա՝ ինչո՞ւ ոչ»,- նշել էր Արմեն Ռուստամյանը:

Ինչ վերաբերում է ԲՀԿ-ին ապա, ինչպես վկայում են հնչող տեսակետները, այստեղ ևս հակված են նմանատիպ համագործացությանը:

Մասնավորապես` դեպքերի նման զարգացումը չէր բացառել ԱԺ ԲՀԿ խմբակցության անդամ Գուրգեն Արսենյանը:

«Մենք միշտ էլ դրա մասին խոսել ենք, բայց ազգային համաձայնության կառավարությունը պետք է ձևավորվի նպատակների շուրջ, ոչ թե անձերի: Եթե նպատակները մեր համար լինեն ընկալելի, մենք միշտ էլ պատրաստ ենք քաղաքական ցանկացած ուժերի հետ ձեռնամուխ լինել քայլերի, որ երկիրը հանենք այն վիճակից, որը մենք գնահատում ենք բացասական»,- ասել է Գուրգեն Արսենյանը:

Իր գործընկերոջ տեսակետը կիսում է նաև ԲՀԿ խմբակցության մեկ այլ անդամ` 

Ստեփան Մարգարյանը` հավելելով որ ոչ ցանկալի իրավիճակներից խուսափելու համար միակ եղանակը դա է:

Այս առումով տրամագծորեն այլ տեսակետ ունի արմատական ընդդիմության դիրքերից հանդես եկող Կոնգրեսը: Նման համագործակցության հնարավորությունը դեռևս Մարտի մեկի իր ելույթում բացառել էր ՀԱԿ առաջնորդ Լևոն Տեր-Պետրոսյանը:

«Հայ Ազգային Կոնգրեսը, ինչպես նախկինում, այժմ էլ ձգտում է ամբողջական իշխանափոխության, այն է` արտահերթ նախագահական և խորհրդարանական ընտրությունների անցկացման` գիտակցելով միաժամանակ, որ այդ նպատակին միայնակ հասնել չի կարող, քանի որ դրա համար անհրաժեշտ է մյուս քաղաքական ուժերի աջակցությունը։ Վերջիններս, սակայն, կարծես թե ավելի հակված են հանգրվանային լուծման, այսինքն` նախ պարտադրել կառավարության հրաժարականը, և դրանից հետո միայն մտածել նախագահական և խորհրդարանական ընտրությունների մասին։ Հասարակության և քաղաքական ուժերի ճնշման տակ տեղի ունեցող ցանկացած փոփոխություն դրական դիտելով, Կոնգրեսը այս մոտեցումն էլ ընդունելի է համարում, և ամենևին չհավակնելով առաջատարի դերի, պատրաստ է, հանուն համերաշխության, իր ողջ կարողությամբ համագործակցել մյուս ուժերի հետ` կառավարության հրաժարականին հասնելու հարցում։ Միաժամանակ հարկ եմ համարում հայտարարել, որ Կոնգրեսը ոչ մի պարագայում մտադիր չէ մաս կազմել Սերժ Սարգսյանի ձևավորած որևէ կառավարության, անկախ այն բանից, թե ինչպիսի պաշտոններ մեզ կառաջարկվեն»,- շեշտել էր Լևոն Տեր-Պետրոսյանը։

Իր հերթին «Ժառանգություն» խմբակցության ղեկավար Ռուբեն Հակոբյանը նշել էր, որ «Ժառանգություն» խմբակցությունը կքննարկի ազգային համաձայնության կառավարությանը մաս կազմելու հնարավորությունը, եթե ոչ իշխանական չորս խմբակցությունների կողմից ներկայացված այլընտրանքային ծրագիրն ընդունվի կառավարության կողմից:

«Մենք կներկայացնենք ծրագիր, որը կունենա երկու կարևոր բաղադրիչ՝ քաղաքական և սոցիալ-տնտեսական, որը պետք է ներկայացվի Կառավարությանը, հիմա եթե կլինի, կընդունվի, կդառնա միս ու արյուն, բնականաբար, այդ դեպքում, որպես հետևանք կարելի է քննարկել Կառավարության ձևավորումը»,- նշել էր Ռուբեն Հակոբյանը:

Խնդրի առչությամբ panorama.am-ը զրուցեց նաև ԱԺ ՀՀԿ խմբակցության քարտուղար Հովհաննես Սահակյանի հետ: Վերջինս կարծիքով շատ ավելի կարևոր է ազգային համաձայնության կոնցեպցիայի, համագործակցության կյանքի կոչումը:

Կարդացեք նաև`

Քաղաքական կուսակցությունների դիրքորոշումները ՀՀ-ի հաջորդ վարչապետի թեկնածության վերաբերյալ