Ուկրաինայի շուրջ բանակցություններում պետք է մասնակցեն երկրի արևելյան շրջանները. Լավրով
Ռուսաստանը համաձայնություն է հայտնել Եվրամիության և ԱՄՆ-ի հետ մասնակցել Ուկրաինայի ապագայի շուրջ բանակցություններին, սակայն պնդում է, որ այդ բանակցություններին մասնակցեն նաև Ուկրաինայի արևելյան և հարավային շրջանների ներկայացուցիչները, որտեղ բնակչության գերակշիռ մասը ռուսախոս է, հաղորդում է Deutsche Welle լրատվականը:
«Մենք պատրաստ ենք դիտարկել բանակցությունների բազմակողմ ձևաչափը, որի շրջանակներում ներկայացված են եվրոպացիները, ԱՄՆ-ն, Ռուսաստանը և ուկրաինական կողմը», - Մոսկվայում այսօր լրագրողներին հայտարարել է ՌԴ ԱԳՆ ղեկավար Սերգեյ Լավրովը:
Լավրովը նաև նշել է, որ Ջոն Քերիի հետ որևէ կոնկրետ ժամկետ և օրակարգ չի հաստատվել, քանի որ դեռ պարզ չէ բանակցության ֆորմատը: Միևնույն ժամանակ Սերգեյ Լավրովը իր մտահոգությունն է հայտնել Յացենյուկի հայտարարության հետ կապված, ըստ որի ապրիլի 15-ին սահմանադրության նախագիծը պատրաստ կլինի:
«Հարց է ծագում. արդյո՞ք ծրագրված է բազմակողմ հանդիպում հրավիրել այն ժամանակ, երբ այդ նախագիծը Բարձրագույն Ռադայում արդեն ներկայացված կլինի: Եվ բոլոր ռեգիոնները, որոնք այժմ վստահություն չունեն ներկայիս իշխանությունների նկատմամբ, պարզապես փաստի առաջ կկանգնեն: Իսկ մեզ կհրավիրեն հանդիպման նրա համար, որ մենք, ըստ էության, մեր ներկայությամբ լեգիտիմացնենք սահմանադրության նախագիծը, որը մինչ այս ոչ ոք չի տեսել», - ИТАР-ТАСС գործակալության փոխանցմամբ` ասել է Լավրովը:
«Մենք շատ անգամներ ենք լսել պարոն Յացենյուկից և պարոն Տուրչինովից, որ ոչ մի ֆեդերալիզացիա չի լինի, ռեգիոններին կատան միայն նոր լիազորություններ: Բայց դա բարձրից մոտեցում է: Եթե ուզում եք ռեգիոնների մասնակցության համաձայնությունը ստանալ, ապա հրավիրեք նրանց բանակցությունների սեղանին, լսեք թե ինչ են ուզում և հետո նոր սկսեք բանակցությունները», - նկատել է ՌԴ արտաքին գերատեսչության ղեկավարը:
Նա նաև կասկած է հայտնել, որ «օլիգարխները, որոնք նշանակվել են ռեգիոնների նահանգապետեր, արժանի կերպով կներկայացնեն Ուկրաինայի հարավը և արևելքը»: ՌԴ ԱԳ նախարարը կողմ է արտահայտվել նրան, որ այդ շրջանները մայիսին կայանալիք նախագահական ընտրություններում ներկայացնեն այն թեկնածուները, որոնք Ուկրինայի քաղաքական կուսակցությունների կողմից հաստատված կլինեն:
Հիշեցնենք, որ երեկ` ապրիլի 7-ին ԱՄՆ պետդեպարտամենտի մամլո խոսնակ Ջեն Պսակը հաղորդել էր, որ Ռուսաստանի, ԱՄՆ-ի, ԵՄ-ի և Կիևի ներկայիս իշխանությունների միջև առաջիկա 10 օրերի ընթացքում կանցկացվեն բանակցություններ` Ուկրաինայում ճգնաժամի կարգավորման նպատակով: