Ձեր վստահելի աղբյուրը

4-ամյա Մարիամը քայլում ու շարժվում է դժվարությամբ. միշտ ժպտերես այս փոքրիկ գեղեցկուհին իրեն աջակից է փնտրում հարակից առարկաներում` սեղան, աթոռ կամ պատեր և կամ էլ սիրող մայրիկի ձեռքերը, ով միշտ կողքին է: Թթվածնային քաղցի պատճառով Մարիամը ստացավ մանկական ուղեղի կաթված և մեկ տարեկանում ծնողները հասկացան, որ փոքրիկը լուրջ պայքարի է մտել կյանքի հետ: Անցած չորս տարիները այս ընտանիքի համար պայքարի, ուժեղ կամքի տարիներ էին. Միայն ծնողները չէ, որ պայքարում էին Մարիամիկի առողջ ապագայի համար, այլև փոքրիկը, ով ձգտում է հնարավորինս ինտեգրվել կյանքին ու լուռ, ժպիտն երեսին անցնում բոլոր անհրաժեշտ բուժման փուլերը: Իսկ անցած տարի նույնիսկ վիրահատվեց` այնքան մեծ է նրա ցանկությունը նորմալ քայլելու, վազելու և դպրոց գնալու բոլորի պես հավասար:

«Ես չեմ ուզում ոչ մի բան ասել մեր բժիշկների մասին, բայց մինչ վիրահատվելը ՌԴ-ում Մարիամս նույնիսկ չէր էլ կարողանում կանգնել ինքնուրույն.... Այդ օրը ահավոր մեծ սթրեսային էր ինձ համար, վիրահատությունից հետո վերադարձել էինք, ես ուղիներ էի փնտրում, թե ինչպես կարելի է աղջկաս տանել արտերկիր, դիմեցի ում հնարավոր էր ու հերթական մերժումը ստանալուց հետո լացակումած վերադառնում էի տուն ու երազում, որ Մարիամս մի օր կանգնի, քայլի ու այն բոլոր տառապանքները, որ նա ապրել ու ապրում է, փոխհատուցվեն այդ կերպ: Ու հենց այդ օրը Մարիամս առաջին անգամ առանց որևէ մեկի օգնության կանգնեց. Սա նշանակում էր, որ ես պետք է շարունակեմ պայքարը երեխայիս համար, չհուսահատվեմ, որովհետև Մարիամս կարող է լիարժեք կյանքով ապրել ու առողջանալ: Աստված դա ինձ ցույց տվեց»,-Panorama.am-ի հետ զրույցում պատմեց Մարիամի մայրը` Կարինեն:

Մարիամը անցնում է ֆիզոթերապիայի կուրսեր, ջրային պրոցեդուրաներ, բայց կտրուկ քայլեր են հարկավեր. ճանապարհը տանում է դեպի արտերկիր, գերմանական կլինիկա, որտեղից ծնողների հարցմանն ի պատասխան ստացվել է դրական պատասխան` 4-շաբաթյա վերականգնողական բուժում ստանալուց հետո ամեն ինչ լավ կլինի: Սակայն կա մեծ խնդիր` բուժումն արժե 32.200 եվրո, գումարած հարակից ծախսերը, այսինքն Գերմանիա հասնելն է խնդիր` ընտանիքը չունի սեփականություն, որպեսզի վաճառի, բնակվում են վարձով, միակ աշխատողը ամուսինն է, ով ստանում է 110 հազար դրամ աշխատավարձ , ինչպես նաև 12 հազար դրամ որպես առաջին կարգի հաշմանդամ և Մարիամի հաշմանդամության թոշակն է 19 հազար դրամ:

«Ում հնարավոր է դիմել եմ, բոլոր պատգամավորներին հատ առ հատ նամակ եմ գրել ու բոլորից ստացել մերժում: Օգնության մասին նամակներով անձամբ շրջել եմ բոլոր խանութներով, փոխանցել տնօրինությանը` ոչ մի արդյունք: Չգիտեմ ինչ անեմ…. Մարիամն ուզում է գնալ դպրոց, վազել երեխաների հետ, սովորել, ուրախանալ, ինչո՞ւ ես չեմ կարող դա տալ իմ երեխային»,- ասում է մայրը:

Այս պահի դրությամբ երեխային աջակցելու նպատակով բացված հաշվեհամարներին փոխանցվել է շուրջ 130 հազար դրամ: Ընտանիքին օգնելու համար կարող եք փոխանցումներ կատարել հետևյալ հաշվեհամարներին`

Արարատ բանկ
Կարինե Ադյան
1510021229930100 դրամ,
1510021229930149 EUR