Ձեր վստահելի աղբյուրը

«Սահմանադրական դատարանի կողմից «Կուտակային կենսաթոշակների մասին» օրենքի մի քանի դրույթների հակասահմանադրական ճանաչելու գործընթացում ավելի շատ կար քաղաքականություն, իշխանության ծրագիր, քան իրավաբանություն»: Այս մասին այսօր լրագրողների հետ հանդիպման ժամանակ ասաց փաստաբան Նորայր Նորիկյանը:

Այդուհանդերձ, ըստ փաստաբանի, ակնհայտ է, որ այս գաղափարի «ճարտարապետները» պարտություն են կրել, և ծրագիրը կարելի է համարել ամբողջովին տապալված ոչ միայն այն առումով, որ հանրության 80 տոկոսը դեմ է եղել օրենքին, այլև ապրիլի 2-ին ՍԴ-ն իր որոշմամբ գաղափարը ճանաչել է հակասահմանադրական:

«Անկախ այն բանից, թե առաջիկա վեց ամիսների ընթացքում նոր կառավարութունը ինչպիսի փոփոխություններ կփորձի անել, այս օրենքի վարվաբեկվածության աստիճանը այնքան խորն է, որ որևէ բան փրկելն անհույս է: Թեև այս ծրագրի սկիզբը համարվում է 2005թ-ը, այդուհանդերձ, այս ծրագրին միս ու արյուն է տվել Տիգրան Սարգսյանի կառավարությունը` ստանձնելով քաղաքական պատասխանատվություն: Չեմ ուզում հեռացած վարչապետի մասին միայն վատն ասել, բայց կարծում եմ, որ նրա քաղաքական ֆիասկոյի պատճառներից մեկն էլ կենսաթոշակային համակարգի ներդրման տապալումն էր»,- ասաց Ն.Նորիկյանը:

Ինչ վերաբերում է հարցի իրավական կողմին, ապա փաստաբանը նշեց, որ ՍԴ-ն որևէ ձևով չի պատճառաբանել, թե արդյոք կար անհրաժեշտություն, որ անվավեր ճանաչված հոդվածները ուժը կորցնեն վեց ամիս հետո:

«Ես գտնում եմ, որ ՍԴ-ի որոշումը որևէ ձևով պատճառաբանված չէ, ինչն էլ խառնաշփոթ է առաջացրել»,- նշեց նա:

Ն.Նորիկյանն ասաց նաև, որ ԱԺ պատգամավորները դիմել էին ՍԴ վիճարկելու օրենքի 8 հոդվածներ, սակայն ՍԴ-ն դրանցից հակասահմանադրական է ճանաչել երեք հոդված, իսկ հինգ հոդվածները ճանաչել է սահմանդրությանը հանապատասխանող այնքանով, որ դրանք չեն խաթարում քաղաքացու սեփականության իրավունքին:

«ՍԴ-ն «պարտադիր» բաղադրիչը ճանաչել է հակասահմանադրական, ուստի գտնում եմ, որ բոլոր գործատուները չպետք է մուծեն պարտադիր գումարները մինչև սեպտեմբերի 30-ը, քանի որ այդ գումարները վաղ թե ուշ վերադարձման ենթակա գումարներ են»,- ասաց Ն.Նորիկյանը` հավելելով, որ ՍԴ որոշման մեջ նշված է նաև վերահաշվարկի մասին, այսինքն` այդ գումարները բոլոր դեպքերում պետք է վերադարձվեն, եթե ոչ, ապա ըստ փաստաբանի, քաղաքացիներն իրավունք ունեն դիմել դատարան:

«Քաղաքացին կարող է ՍԴ որոշումը ձեռքին մտնել դատարան և իր գումարները հետ պահանջել»,- ընդգծեց նա:

Ինչ վերաբերում է ՍԴ նախագահ Գագիկ Հարությունյանի հայտարարությանը, թե մինչև սեպտեմբեր օրենքը պետք է գործի, փաստաբանը նշեց, որ ՀՀ Սահմանադրության մեջ նման կետ չկա, որ ՍԴ նախագահը կամ անդամը կարող է մեկնաբանել ՍԴ որոշումը:

«Գագիկ Հարությունյանն ի պաշտոնե իրավունք չուներ նման հայտարարություն անել»,- նկատեց նա: