Տիգրան Սարգսյանը երկխոսության հրավերը կրկնեց փողոցում` «Դ!եմ եմ»-ի անդամների դիմաց (Տեսանյութ)

Հասարակություն 16:01 09/04/2014

«Վար-չա-պետ, վար-չա-պետ» բացականչությունների ներքո «Դ!եմ եմ» նախաձեռնության ակցիայի մասնակիցներին քիչ առաջ մոտեցավ Հայաստանի նախկին վարչապետ Տիգրան Սարգսյանը:

«Եկեք միասին բարձրանանք ֆինանսների նախարարության դահլիճ` այնտեղ կարող է տեղափոխվել 100 մարդ, կարող ենք նստել և քննարկել: Ստեղծվել է աշխատանքային խումբ, որը մշակում է համապատասխան փոփոխությունները, կարող եք դուք էլ ստեղծել այդ խումբը, նստենք քննարկենք», -հայտարարեց Տիգրան Սարգսյանը:

Նրա խոսքով, իրավասու մարմինները ակցիայի մանսակիցների առաջադրած բոլոր հարցերին կարող են պատասխանել:

«Եթե դուք ուզում եք դրանց պատասխանները ստանալ, ապա ևս մեկ անգամ ուզում եմ Ձեզ հրավիրել երկխոսության: Եկեք այդ հարցերը չքննարկենք փողոցում, մանավանդ, որ խախտում ենք մյուս քաղաքացիների` այս փողոցից օգտվելու իրավունքը: Կառավարության հրավերը ուժի մեջ է»,- դիմելով ակցիայի մասնակիցներին` հայտարարեց նախկին վարչապետը:

Այս հայտարարությունից հետո վարչապետի պաշտոնակատարը հեռացավ տարածքից` չլսելով մասնակիցների հարցերը, ակցիայի մասնակիցների սուլոցների ուղեկցությամբ: Ակցիայի մասնակից իրավաբան Մերի Խաչատրյանը տարակուսած նկատեց. «Ես չհասկացա, թե ինքն ով էր, որպես ինչ եկավ այստեղ, գնաց: Մենք տեխնիկական հարց էինք բարձրացնում, բայց ինքը սկսեց խոսել ինչ-որ աշխատանքային խմբի մասին»:

«Չի կարելի երկխոսել Սահմանադրական դատարանի որոշման վերաբերյալ»,- հայտարարեց նախաձեռնության անդամ Դավիթ Մանուկյանը` ընդգծելով, որ ապրիլի 12-ին հուժկու հանրահավաք են անցկացնելու Մատենադարանի մոտ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: