Ձեր վստահելի աղբյուրը

Նախօրեին երեկոյան կայացավ ԲՀԿ-ՀԱԿ-«Ժառանգություն» կուսակցությունների առաջնորդների հանդիպումը, որի մասին երկար ժամանակ խոսվում էր քառյակի ֆորմատում և որին ուժերը դեմ չէին: Բայց վերջին պահին պարզվեց, որ քառյակը այդ հանդիպմանը ներկայացված է եռյակի տեսքով, քանի որ ՀՅԴ-ի ներկայացուցիչը չէր եկել: Այսօր առավոտյան երեք ուժերը տարածեցին ոչինչ չասող մի հաղորդագրություն, որում նշված էր միայն, որ նման հանդիպում է կայացել: Մանրամասները, թե ինչ է տեղի ունեցել երեկոյան, Panorama.am-ը փորձեց ճշտել «Ժառանգություն» կուսակցության փոխնախագահ Արմեն Մարտիրոսյանից, ով ևս ներկա է եղել հանդիպմանը:

-Պարոն Մարտիրոսյան, ԲՀԿ-ՀԱԿ-«Ժառանգություն» առաջնորդների հանդիպման վերաբերյալ տարածվեց ոչինչ չասող մի հայտարարություն, կներկայացնե՞ք որոշ մանրամասներ:

-Հայտարարությանը կարող եմ միայն մեկ նախադասություն ավելացնել` շատ լավ, բովանդակային քննարկում է տեղի ունեցել:

-Այսօր Հեղինե Բիշարյանը հայտարարել է, որ վարչապետի պաշտոնում տեսնում է ՕԵԿ առաջնորդ Արթուր Բաղդասարյանին, իսկ ձեր երեկվա հանդիպմանը վարչապետի թեկնածու անուն հնչե՞լ է :

-Երեք ուժերի քննարկման ժամանակ շատ հարցեր են քննարկվել, բովանդակային առումով չեմ կարող մանրամասներ ներկայացնել, թե այդ հարցերը որոնք են և ինչին են առնչվում:

-Բայց այդ հարցերն ու քննարկումները ինչպե՞ս կարող են անդրադառնալ ստեղծված իրավիճակից դուրս գալու վրա:

-Կոնկրետ «Ժառանգության» մասով կարող եմ ասել. «Ժառանգության» համար էական չի ով է լինելու վարչապետը, որովհետև որևէ դրական փոփոխության ակնկալիք մենք չունենք: Կեղծ իշխանությունների և այսպիսի համակարգի առկայության պարագայում մենք որևէ փոփոխություն չենք սպասում, ուստիև քննարկում այդ իամստով մեզ համար էական չէ:

-Այսինքն` երեկվա հանդիպմանը Ձեր կողմից կրկին բարձրաձայնվել է ամբողջական համակարգային փոփոխության անհրաժեշտությունը:

-«Ժառանգությունն» իր տեսակետը արտահայտում է ցանկացած հարթակում ` և հրապարակային, և քննարկումների ժամանակ այդ մոտեցումը միշտ բարձրաձայնել ենք, որ մենք կողմնակից ենք ամբողջական իշխանափոխության և համակարգային բարեփոխումների:

-Պարոն Մարտիրոսյան, վերջին զարգացումները հաշվի առնելով Ձեր այդ մոտեցման ընկալումը քառյակի մյուս ուժերի կողմից փոխվել է, ի՞նչ եք կարծում:

-Ես կարծում եմ, որ քանի որ դա արդեն քննարկումների բովանդակության շրջանակի մեջ է մտնում, ճիշտ չէ դա իմ կողմից մեկնաբանելը: Ես միայն կարող եմ հնչեցնել մեր մոտեցումը:

-Իսկ նախատեսվում է առաջիկայում ևս այդ ֆորմատով` առաջնորդների մակարդակով, նոր հանդիպում:

-Նման քննարկում չի եղել:

Նշենք նաև, հանդիպմանը ներկա են եղել նաև ՀԺԿ նախագահ Ստեփան Դեմիրճյանը, ՀԱԿ խմբակցության ղեկավար Լևոն Զուրաբյանը, ԱԺ` ԲՀԿ պատգամավորներ Վարդան Օսկանյանը, Ստեփան Մարգարյանը, «Ժառանգություն» խմբակցության ղեկավար Ռուբեն Հակոբյանը:

Նախորդիվ`

Եռյակի հաղորդագրությունը