Ձեր վստահելի աղբյուրը

«Մեզանում, ցավոք, վատ ավանդույթ կա` առանց տեքստը կարդալու մեկնաբանել: Ցանկացած նման հայեցակարգ բարդ փաստաթուղթ է, նույնիսկ ոչ բոլոր իրավաբանները կարող են ամբողջովին մանրամասն ընկալել և տիրապետել, այնինչ, ցանկացած ոք իրեն համարում է սահմանադրագետ և փորձում է գնահատականներ տալ կամ վերլուծել»,- «Շանթ» հեռուստաընկերությանը տված հարցազորւյցում անդրադառնալով սահմանադրական բարեփոխումների հայեցակարգի շուրջ արված տարատեսակ մեկնաբանություններին, հայտարարեց ՀՀ արդարադատության նախարարի պաշտոնակատար Հրայր Թովմասյանը:

Թովմասյանը նշեց, որ նախագծով չի առաջարկվում անցում կատարել կառավարման խորհրդարանական համակարգի:

«Ընդհանրապես հայեցակարգը հիմնված է հետևյալ կառուցվածքի վրա. խնդիր-խնդրի վերլուծություն-լուծումների հնարավոր տարբերակ: Երբ անդրադարձ է կատարվել իշխանությունների տարանջատմանը և զսպումների ու հավասարակշռման մեխանիզմներին, վեր են հանվել գործող համակարգի հիմնական թերությունները և մատնանշվել, թե կիսանախագահական համակարգի պարագայում խնդիրները լուծելու համար այդ համակարգի ներսում ինչպիսի փոփոխություններ են հնարավոր, որից հետո առաջարկվում է, որ հնարավոր է նաև այս խնդիրների լուծումը խորհրդարանական համակարգի պարագայում: Նախ` հանձնաժողովի անդամներից բոլորը չէ, որ կիսում են խորհրդարանական կառավարման ձևի հետ բոլոր մոտեցումները: Բայց բոլոր անդամները` պաշտոնյա, թե քաղաքական գործիչ, հանձնաժողովում ընդգրկված էին որպես իրավաբաններ, ուստի այս խնդիրը դիտարկել են մասնագիտական տեսանկյունից: Բայց կառավարման ձևին անդրադառնալիս, եթե դա զուտ գիտական աշխատանք չէ, հետագա քայլերում պետք է հաշվի նստես քաղաքական համակարգի սուբյեկտների կարծիքի հետ, որպեսզի գործընթացը սահուն անցնի և ձեռք բերի ավելի մեծ լեգիտիմություն, ուստի` հանձնաժողովը աշխատանքի որոշակի փուլում անհրաժեշտ գտավ, որ այդ այլընտրանքային տարբերակը իր հիմնական գծերով ևս պետք է ներկայացվի: Ինքս կառավարման խորհրդարանական ձևի կողմնակից եմ»,-նշեց Հրայր Թովմասյանը:

Անդրադառնալով կառավարման խորհրդարանական համակարգին անցնելու շուրջ ՀՀ Նախագահի արտահայտած դիրքորոշմանը, Թովմասյանն ասաց. «Նախագահի ելույթից հետո ինձ մոտ այնպիսի զգացողություն էր, որ ես ներկա եմ պատմական պահի և մենք ականատես ենք լինում նոր որակի քաղաքական գործընթացի, որտեղ հստակորեն երևում է պետական և քաղաքական գործչի տարբերությունը: Նախագահի դիտարկումը հենց պետական գործչի մոտեցում էր: Իսկ այն դիտարկումները, որը ուղեկցում էր հանձնաժողովի աշխատանքի ողջ ընթացքում, թե իբր գրվում է մի սահմանադրություն, որը պետք է ապահովի հետագա պաշտոնավարումը (ՀՀ Նախագահի-Panorama.am), պարզ շահարկումներ էին, բայց ես այդ մարդկանց չեմ մեղադրում. միգուցե նրանք մտածում են, որ եթե իրենք լինեին` հենց այդպես էլ կանեին: Վստահ եմ, որ նախագահի հայտարարությունից հետո այս թեմայով տասնյակ հոդվածներ մնացին դարակներում: Ըստ էության նախագահը հայտարարեց հետևյալը. «եթե մասնագետները գտնում են, որ դա ճիշտ է, եթե քաղաքական ուժերը կարծում են, որ դա ճիշտ է, եթե դա նպաստելու է երկրի զարգացմանը, ապա ես չեմ կարող խոչընդոտ լինել, ես նպաստելու եմ այդ գործընթացների զարգացմանը` անկախ այն հանգամանքից, որ ես այլ կարծիք ունեմ»: Այսուհետ կառավարման ձևի հարցը լինելու է քաղաքական դաշտում խաղացողների հետ մեր հիմնական քննարկվելիք հարցերից մեկը, և պատրաստ ենք դրա ուժեղ և թույլ կողմերը մանրամասնորեն ներկայացնել, որից հետո միայն հանձնաժողովը նախագիծը կներկայացնի նախագահի հաստատմանը»: