Ձեր վստահելի աղբյուրը

«Մենք վկան են հետխորհրդային համակարգերի խորը ճգնաժամերին, որից անմասն չի մնում նաև Հայաստանը: Հայաստանում ճգնաժամից դուրս գալու ճանապարհը գտան ամենաերկարակյաց վարչապետի՝ Տիգրան Սարգսյանի հրաժարականի մեջ»,-այսօր լրագրողների հետ հանդիպմանն անդադառնալով ներքաղաքական զարգացումներին և ՀՀ վարչապետի հրաժարականից հետո ստեղծված քաղաքական նոր իրավիճակին ասաց փորձագետ Ռուբեն Մեհրաբյանը:

Նա նշեց, որ Տիգրան Սարգսյանի վարչապետության տարիները համընկան անբարենպաստ կոնյուկտուրայի՝ համաշխարհային տնտեսական ճգնաժամի հետ:

«Վարչապետի հրաժարականից հետո ի հայտ եկան ներհամակարգային վերադասավորումներ, իսկ Հայաստանում տակտիկական առումով ներքաղաքական ճգնաժամը հաղթահարված չէ»,-նշեց Ռ.Մեհրաբյանը:

Նրա խոսքերով, վարչապետի հրաժարականից հետո ի հայտ եկավ նաև ներհամակարգային խորը ճգնաժամը՝ ամեն ինչ սկսվեց որոշվել ներկլանային պայքարի և կուլիսային համաձայնությունների միջոցով:

«Մենք գործ ունենք ներքաղաքական դաշտում վեցնյակի հետ, որը գործում է նույն տրամաբանության և փիլիսոփայության մեջ: Եթե գոյություն ունի պայքար, ապա այն տեղի է ունենուն իշխանական կարկանդակը ավելացնելու կամ չկորցնելու համար, այլ տրամաբանություն գոյություն չունի»,-նշեց Ռ.Մեհրաբյանը:

Անդրադառնալով ՀՀ հաջորդ վարչապետի հնարավոր թեկնածուի թեմային բանախոսը նշեց, որ միևնույն է, թե ով կլինի վարչապետը՝ անունները կապ չունեն: «Վարչապետի նոր անուն ազգանունը ինչպես էլ հնչի, մեր կյանքում որևէ փոփոխություն տեղի չի ունենա: Վարչապետի փոփոխությունը կկատարվի այնպես, որպեսզի համակարգում բովանդակային փոփոխություններ տեղի չունենան»:

Ըստ նրա, համակարգի համար, համակարգի տրամաբանության առումով ԲՀԿ ավելի ձեռնտու է, որ մնա կոալիցիայից դուրս: «ԲՀԿ տիրություն է անում ոչ կոալիցիոն դաշտը: ԲՀԿ-ի անելիքները ոչ իշխանական հատվածում է և նրանք շարունակելու են այդ ֆունկցիան»: