Ձեր վստահելի աղբյուրը

Գորիսում Սյունիքի նախկին մարզպետ Սուրիկ Խաչատրյանի առանձնատան դիմաց 2013 թվականի հունիսի 1-ին տեղի ունեցած միջադեպի կապակցությամբ հարուցված քրեական գործով միակ մեղադրյալը Զինված ուժերի գնդապետ Արտակ Բուդաղյանն է: Այդ մասին Panorama.am-ին տեղեկացրեց ՊՆ քննչական ծառայության լրատվության հետ կապերի բաժնի սպա Մերի Սարգսյանը:

ՊՆ գնդապետ Արտակ Բուդաղյանը մեղադրվում է ՀՀ քրեական օրենսգրքի 137-րդ հոդվածի 1-ին մասի հատկանիշներով` «սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքը, եթե այդ սպառնալիքն իրականացնելու իրական վտանգ է եղել»:

ՀՀ Քրեական դատավարության օրենսգրքի 265 հոդվածի համաձայն, քրեական գործի նյութրը տրամադրվել են կողմերին` դրանց ծանոթանալու համար, այսինքն նախաքննությունը դեռ չի ավարտվել և գտնվում է նյութերի ծանոթացման փուլում: Դրանից հետո միայն գործը կուղարկվի դատարան:

Թեպետ Արտակ Բուդաղյանի նկատմամբ տարածվում էր 2013 թվականի Համաներում կիրառելու մասին Ազգային ժողովի որոշումը, սակայն Բուդաղյանը չի համաձայնել, որ իր նկատմամբ համաներում կիրառվի և ինչպես Մերի Սարգսյանը տեղեկացրեց, համաներում կիրառելու մասին համաձայնության դիմում չի ներկայացրել:

Ավելի վաղ Panorama.am-ը տեղեկացրել էր, որ այս գործի շրջանակներում մեղադրյալները երկուսն էին` Սուրիկ Խաչատրյանի որդին` Տիգրան Խաչատրյանը, որը պարզվել էր, որ թրմանյութ է օգտագործած եղել և թիկնապահը` Զարզանդ Խաչատրյանը: Սակայն նախաքննությունը վարող ՊՆ քննչական ծառայությունը որոշել էր մեղադրյալներ Զարզանդ Նիկողոսյանի և Տիգրան Խաչատրյանի նկատմամբ որպես խափանման միջոց ընտրված կալանավորումը վերացնել, ինչպես նաև դադարեցնել քրեական հետապնդումը:

«Ապացույցները բազմակողմանի և օբյեկտիվ ստուգման, ձեռք բերված ապացույցների վերլուծության, այլ ապացույցների հետ համադրման և ապացույցները դրանց համակցության մեջ գնահատելով, հիմնավորվել է, որ մեղադրյալներ Տիգրան Խաչատրյանի և Զարզանդ Նիկողոսյանի գործողություններն ակնհայտ համապատասխանում են անհրաժեշտ պաշտպանության հատկանիշներին, նրանց արարքներում անհրաժեշտ պաշտպանության իրավաչափության բոլոր պայմաններն առկա են», -նշված էր նախաքննական մարմնի որոշման մեջ:

Թեմային առնչվող`

Արտակ Բուդաղյանը պնդել ու պնդում է, որ եղել է կրակոց նաև Սուրիկ Խաչատրյանի դղյակից. Փաստաբանի բացահայտումը (տեսանյութ)