Ձեր վստահելի աղբյուրը

Ո՞րն է պատճառը, որ ՕԵԿ-ը որոշում կայացրեց դուրս գալ կոալիցիոն ձևաչափից, արդյո՞ք այն է, որ Արթուր Բաղդասարյանը չնշանակվեց ՀՀ վարչապետի պաշտոնում: Այս հարցը լրագրողները ուղղեցին ՕԵԿ խմբակցության ղեկավար Հեղինե Բիշարյանին՝ ՕԵԿ քաղխորհրդի նիստից հետո հրավիրված ասուլիսում: Սակայն տիկին Բիշարյանը նշեց, որ պատճառները շատ են և թվարկված են իրենց կողմից տարածած հաղորդագրության մեջ:

Նա նաև տեղեկացրեց, որ այս պահի դրությամբ կուսակցության առաջնորդ, Ազգային անվտանգության խորհրդի քարտուղար Արթուր Բաղդասարյանը հրաժարական չի տվել, քննարկումները շարունակվում են, իսկ ապրիլի 25-ին Ա.Բաղդասարյանը հրավիրած ասուլիսում կհայտարարի իր հետագա անելիքների մասին:

Տիկին Բիշարյանը հորդորեց շեշտը չդնել վարչապետի նշանակման փաստի վրա, որը շատ առանցքային պաշտոն է, այլ ուղղակի ծանոթանան իրենց հաղորդագրությանը:

Պատգամավորը խոսեց նաև Սահմանադրական դատարանի որոշման մասին և կուտակային բաղադրիչի մասին.
«Մենք ունենք մեր տեսլականը կուտակայինի վերաբերյալ: Այո, կողմ ենք քվեարկել, քանի որ ուզում էինք, որպեսզի մեր քաղաքացիները ապրեն բարեկեցիկ երկրում, բայց մենք աշխատելու ենք փոփոխությունների նախագծի վրա, աջակցելու ենք երիտասարդներին, որպեսզի մեր քաղաքացիները Հայաստանում ունենան բարեկեցիկ ծերություն»,- հայտարարեց Հ.Բիշարյանը:

Նա նաև տեղեկացրեց, որ ՕԵԿ-ը բաց է քաղաքական բոլոր թիմերի հետ աշխատելու առումով` անկախ նրանից ընդդիմադիր կլինի ՕԵԿ-ը , թե ոչ.

«Մենք նախագծեր ենք ունեցել, որ ընդդիմադիր ուժերի հետ շրջանառել ենք, ստորագրել ենք: Ուղղակի քաղաքական մեր այս որոշումը նշանակում է, որ մենք ազատ ենք լինելու մեր բոլոր քայլերում»,- ընդգծեց նա:

Նախորդիվ`
Replik.am. ՕԵԿ-ը փաստում է, որ կոալիցիոն ձևաչափը իրականության մեջ գործել է ոչ արդյունավետ