Ձեր վստահելի աղբյուրը

Շատերը հույս ունեին, որ 2013թ.-ի նախագահական ընտրություններից հետո Ադրբեջանի իշխանությունները կմեղմեն իրենց քաղաքականությունը խոսքի ազատության և համացանցում տեղեկատվության հոսքի նկատմամբ: Սակայն բոլոր հույսերը զուր էին, ասվում է «EurasiaNet» ամերիկյան կազմակերպության կայքում տպագրված հոդվածում:

 Հոդվածում նշվում է, որ Ադրբեջանի կառավարությունը բոլորովին էլ մտադիր չէ թուլացնելո վերահսկողությունը սոցիալական ցանցերի, հատկապես «Facebook»-ի նկատմամբ: Իշխանությունները սոցիալական ցանցերի շուրջ ստեղծում են վախի և ահաբեկման մթնոլորտ և, հետևաբար, ստիպում օգտատերերին զբաղվել ինքնագրաքննությամբ:

«Ադրբեջանի իշխանությունները սկսել են հետապնդել և ճնշումներ գործադրել «Facebook»-ի և այլ սոցիալական ցանցերի վրա դեռ 2011թ.-ից, երբ ընդդիմադիր ակտիվիստները օգտագործում էին սոցիալական ցանցերը բողոքի ակցիաներ և հակակառավարական արշավներ կազմակերպելու համար: Այդ ժամանակից ի վեր տասնյակ համացանցային ակտիվիստներ ճնշումների են ենթարկվել և ձերբակալվել: Հոդվածում նշվում է, որ 2013թ.-ին Ադրբեջանի խորհրդարանը օրենք ընդունեց, ըստ որի` համացանցում զրպարտության դեպքում անհատը կենթարկվի քրեական պատասխանատվության և կդատապարտվի մինչև երեք տարի ազատազրկման»,- ասվում է հոդվածում:

Ըստ հեղինակի`2013թ.-ի Ադրբեջանի նախագահական ընտրություններից հետո, որոնք դիտորդների կողմից գնահատվել են որպես կեղծված, իշխանությունների հետապնդումները համացանցային ակտիվիստների նկարմամբ նույնիսկ ավելացել են: Միջազգային կազմակերպությունները հատկապես իրենց ուշադրության կենտրոնում են պահում բլոգերների դեմ հարուցված քրեական գործերը: Նրանցից չորսը`Աբդուլ Աբիլովը, Օմար Մամեդովը, Էլվին Քերիմովը, Էլսևեր Մուրսալին երիտասարդ ակտիվիստներ և «Facebook»-ի հազարավոր հետևորդներ ունեցող մի քանի ընդդիմադիր էջերի մոդերատորներ:

«Իշխանությունները նրանց մեղադրել են թմրանյութերի օգտագործման մեջ, չնայած որ հարցաքննության ժամանակ թմրանյութերի մասին ոչ մի հարց չի տրվել: Հարցերը հիմնականում հակակառավարական և «Facebook»-ում ծավալավող գործունեության շուրջ էին: Մեղադրվողներց ոչ ոք թմրանյութ չի օգտագործում, նրանք նույնիսկ չեն ծխում: Իրավապաշտպանները հավաստիացնում են որ այս երիտասարդների դեմ բերված ապացույցները շինծու են, իսկ մեղադրանքները ունեն քաղաքական դրդապատճառներ և ուղղված են այլախոհությունը ճնշելուն»,-գրում է հեղինակը:

19-ամյա Օմար Մամեդովը «Facebook»-ում մի էջ էր վարում, որտեղ քննադատում էր Ադրբեջանի պետական հեռուստաալիքների իրադարձությունները լուսաբանելու քաղաքականությունը: Անցած տարի Մամեդովը զգուշացում էր ստացել հատուկ ծառայությունների կողմից, սակայն դա նրան չէր կանգնեցրել: Հարցաքննության ժամանակ նրան փաստաբան չէր տրամադրվել, և ասվում է, որ երիտասարդ ակտիվիստը խոշտանգումների է ենթարկվել: Հունվարի վերջին դատարանը 3 ամսով Մամեդովին դատապարտել է ազատազրկման թմրանյութեր պահելու մեղադրանքով:

«Ադրբեջանի միջազգային գործընկերները չպետք է աչք փակեն Ադրբեջանի այլախոհության նկատմամբ զրոյական հանդուրժողականություն ցուցաբերելու վրա: Եվրոպայի խորհրդի անդամ դառնալիս Ադրբեջանը պատասխանատվություն է վերցրել պաշտպանել մարդու հիմնարար ազատություններն ու իրավունքները, ներառյալ խոսքի և ԶԼՄ-ների ազատության իրավունքը»,- գրում է կայքը: Ըստ հեղինակի`Ադրբեջանի գործընկերները պետք է պահանջեն ազատ արձակել բոլոր այն լրագրողներին և ակտիվիստներին, ովքեր ներկայումս իրենց խոսքի իրավունքը իրականացնելու պատճառով հայտնվել են բանտում: