«Ցեղասպանության խնդիրը ամերիկյան կողմի համար առավելապես քաղաքական առևտրի առարկա է»

Քաղաքական 13:43 17/04/2014

ԱՄՆ Սենատի արտաքին հարաբերությունների հանձնաժողովի կողմից Հայոց ցեղասպանության մասին բանաձևի ընդունումը ընդամենը կիսաքայլ է, որի հիմնական նպատակը ամենևին հայ ժողովրդի արդար պահանջը չէ: Լրագրողների հետ հանդիպման ժամանակ նման հայտարարությամբ հանդես եկավ թուրքագետ Ռուբեն Մելքոնյանը:

«Սենատի հանձնաժողովի այս որոշումը, հուրախության մեզ, այս անգամ շատ ավելի հանգիստ ընկալվեց մեր հասարակության կողմից: Այդպես էլ պետք է լիներ, հենց այն առումով, որ դա վերջնական քայլ չէր, այլ քայլերից մեկն էր: Նման քայլեր նախկինում նույնպես եղել են: Սա ուղղակի մարտավարական քայլ էր Միացյալ Նահանգների կողմից:

Ինչ վերաբերում է թուրքական կողմի արձագանքներին, ապա այստեղ մենք նույնպես տեսնում ենք Անկարայի` արձագանքման ավանդական ոճը: Պարզապես այս անգամ Հայոց ցեղասպանության 100-ամյա տարելիցի մոտեցման համատեքստում, ավելի լուրջ ագրեսիվություն է նկատվում: Ցեղասպանության ճանաչման դեմ արշավին այս օրերին ներգրավված է թուրքական ամբողջ վերնախավը»,- ասաց Ռուբեն Մելքոնյանը:

Բանախոսի համոզմամբ` թուրքական կողմի այս քայլերն ի սկզբանե դատապարտված են:

«Թուրքական կողմը, ըստ էության, գերի է դարձել իր իսկ կողմից որդեգրված քաղաքականությանը»»,- ասաց թուրքագետը:

Այնումենայնիվ, ըստ բանախոսի, ամերիկյան կողմում այս անգամ ևս «գերիշխելու են իրատեսական քաղաքական մոտեցումները»:

«Իսկ դրանք միշտ առավել են քան բարոյական մոտեցումները: Ցեղասպանության խնդիրը ամերիկյան կողմի համար առավելապես քաղաքական առևտրի առարկա է: Այս քայլով Նահանգները, մի կողմից որոշակի ճնշումներ է բանեցնում Թուրքիայի վրա, իսկ մյուս կողմից` որոշակիորեն սիրաշահում է Հայաստանին և հայ ժողովրդին: Ցավոք սրտի, այս քայլերը տեղավորվում են սառը քաղաքական հաշվարկի համատեքստում և չունեն վերջնական նպատակ: Սրանք կիսաքայլեր են, որոնց նպատակը, ամենևին, հայ ժողովրդի արդար պահանջը չէ»,- ասաց Ռուբեն Մելքոնյանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: