Ձեր վստահելի աղբյուրը

«Ամեն մի քաղաքական ուժ ինքն է որոշում իր կեցվածքը, բայց կոնկրետ ինձ համար ՕԵԿ-ի որոշումը սպասելի չէր, հատկապես, որ այդ որոշումը, ըստ ՕԵԿ-ականների` վարչապետի հետ էր կապված, ինչը ևս անհասկանալի է», - այս մասին այսօր լրագրողների հետ հանդիպման ժամանակ ասաց ՀՀԿ-ական Լեռնիկ Ալեքսանյանը` անդրադառնալով ՕԵԿ-ի կոալիցիայից դուրս գալու որոշմանը:

Հիշեցնենք, որ ԿԸՀ-ն արդեն իսկ արձանագրություն է կազմել` Հ. Աբրահամյանի փոխարեն պատգամավորի մանդատը կուսակցության ընտրական ցուցակի հերթական հաջորդ թեկնածու Լեռնիկ Ալեքսանյանին տալու վերաբերյալ:

Նրա խոսքերով` կոալիցիայից դուրս գալը ևս քաղաքական տեխնոլոգիա է, և նման քաղաքական կեցվածք ընդունելը պայմանավորված է ինչ-որ բաներով:

«Իմ անձնական կարծիքով` այն հաշվարկները, որ արվում է ՕԵԿ-ի կողմից, ճիշտ չեմ համարում և չեմ կարծում, որ դա արդյունավետ կլինի: Որպես բարեկամ խորհուրդ չէի տա իրենց, որ այդ քայլին դիմեին»,- նշեց Լ.Ալեքսանյանը:

Անդրադառնալով հարցին, թե ՕԵԿ-ի կոլիցիայից դուրս գալը ՀՀԿ-ի համար ինչ նշանակություն կարող է ունենալ, Լ.Ալեքսանյանը նշեց, որ քաղաքական դաշտում դա որևէ լուրջ նշանակություն չի ունենա, քանի որ կոալիցիայի կազման նպատակը ոչ թե այն էր, որ ՀՀԿ-ն խնդիրներ չի կարող լուծել, այլ այն, որ ՀՀԿ-ն միշտ ցանկացել է քաղաքական ուժերին և կազմակերպություններին ներգրավվել իշխանության գործունեությանը:

Լ.Ալեքսանյանը միաժամանակ նշեց, որ այս որոշումը նաև քաղաքական նպատակ է հետապնդում:

«Նպատակը հասարակության շրջանում իրենց իմիջի բարձրացումն է, ինչպես նաև` ընդդիմադիր կեցվածք ընդունելը: Իմիջ բարձրացնելը նաև կապված է քաղաքական հետագա գործունեության հետ` դա կլինի 2018 թ-ի նախագահական ընտրությունները, թե 2017թ-ի խորհրդարանական ընտրությունները, բայց ժողովուրդը բավականին հասունացել է և իմիջի ձեռք բերման համար միայն քննադատելը բավարար չէ»,- ասաց Լ.Ալեքսանյանը:

Հարցին, թե արդյոք հասարակությունը պատրաստ է ՕԵԿ-ին հետ ընդունել և ընդդիմությունը կհամագործակցի ՕԵԿ-ի հետ, նա նշեց, որ եթե քաղաքական ուժը, որը իշխանության մեջ է եղել և հետագայում ընդունի ազնիվ կեցվածք, հնարավոր է, որ դրական ազդեցություն ունենա ՕԵԿ-ի համար:

«Եթե մոտեցումները շատ ավելի ազնիվ, բարոյական, օբյեկտիվ լինեն, ապա չեմ բացառում, իսկ եթե միայն քննադատելու համար է ընդդիմություն դառնում… նման կեցվածքը եղել է մի քանի անգամ և կարծում եմ, որ ՕԵԿ-ի համար արդյունավետություն չի ունենա»,- ընդգծեց նա:

Պատասխանելով հարցին, թե ՀՀԿ-ն կարո՞ղ է միայնակ կառավարություն կազմել և ամբողջ պատասխանատվությունն իր վրա վերցնել, Լ.Ալեքսանյանը նշեց, որ իր կարծիքով` այսպես ՀՀԿ-ի համար ավելի լավ կլինի` պատասխանատվությունը ամբողջությամբ իր վրա վերցնել և ամբողջությամբ պատասխան տալ:

«Սա իմ անձնական կարծիքն է»,- շեշտեց նա:

Նաև հավելեց. «Կոալիցիա կոչվածը հեղհեղուկ է և պարտադիր չէ, որ անպայման լինի կոալիցիոն հուշագիր: Ընթացքում քաղաքական շատ ուժերի, հասարակական կազմակերպություններ հետ համաձայնեցված գործողությունները գուցե ավելի ճկուն և արդյունավետ լինեն»: