Ձեր վստահելի աղբյուրը

Անդորրան նախօրեին վավերացրեց Եվրոպայի խորհրդի՝ «Կանանց նկատմամբ բռնության և ընտանեկան բռնության կանխարգելման և դրա դեմ պայքարի մասին կոնվենցիան», որը հայտնի է նաև որպես Ստամբուլի կոնվենցիա՝ դառնալով ԵԽ անդամ 10-րդ երկիրը, ով վավերացնում է այս կոնվենցիան։

Ինպես հայտնում է Ստրասբուրգում Panorama.am-ի թղթակիցը, Անդորրայի վավերացմամբ Ստամբուլի կոնվենցիան կմտնի ուժի մեջ այս տարվա օգոստոսի 1-ից, քանի որ կոնվենցիայի գործելու համար անհրաժեշտ էր, որպեսզի նվազագույնը ԵԽ անդամ 10 երկիր վավերացներ այն։

Ստամբուլի կոնվենցիան, որը դարձավ Եվրոպայում կանանց և ընտանեկան բռնության դեմ պայքարի առաջին իրավաբանորեն պարտավորեցնող փաստաթուղթը, ստորագրման համար բացվել էր 2011 մայիսի 11-ին Ստամբուլում։

Կոնվենցիան ստորագրած երկրները պարտավորվում են կանխել բռնությունը, պաշտպանել զոհերին, դատապարտել հանցագործներին և համակարգված միջոցառումներ իրականացնել համապարփակ քաղաքականության միջոցով։ Այս կոնվենցիայի ուժը կայանում է նաև նրանում, որ այն ստեղծում է փորձագիտական անկախ մարմին, որը պետք է գնահատի, թե որքանով են երկրներն իրականացնում կոնվենցիայի դրույթները։

Եվրոպայի խորհրդի գլխավոր քարտուղար Թորբյորն Յագլանդը կոչ է անում ԵԽ անդամ մյուս երկրներին ևս ստորագրել և վավերացնել հիմնարար կոնվենցիան, որն արդեն մեծ փոփոխությունների հիմք է դառնում։

«Եվրոպան կարևոր քայլ է կատարում կանանց իրավունքների պաշտպանության համար։ Այս կոնվենցիան երկրներին բացառիկ հնարավորություն է տալիս վերացնել կանանց նկատմամբ բռնության շուրջ լռությունն ու բոլոր տաբուները։ Ես հուսով եմ, որ քաղաքացիական հասարակության, ազգային խորհրդարանների զգոնությունը կբարելավի շատ կանանց և աղջիկների վիճակը, ովքեր բռնության են ենթարկվում միայն գենդերային հիմքով։ Մենք պետք է համոզված լինենք, որ նրանք ևս օգտվում են մարդու հիմնարար իրավունքներից՝ վախից և բռնությունից ազատ ապրելու իրավունքից»,-ասել է Յագլանդը։

Հայաստանը կոնվենցիան դեռևս չի վավերացրել։ Եվրոպայի խորհրդի Նախարարների կոմիտեում ՀՀ նախագահության ժամանակ ԵԽԽՎ-ում ելույթի ժամանակ ՀՀ ԱԳ նախարար Էդվարդ Նալբանդյանին ուղղված հարցին, թե Հայաստանն ինչու չի ստորագրել Ստամբուլի կոնվենցիան, ԱԳ նախարարը պատասխանեց, որ Ստամբուլի կոնվենցիային մաս կազմելու համար անհրաժեշտ է, որպեսզի այն ազգային օրենսդրությանը համահունչ լինի՝ ընդգծելով, որ անհրաժեշտ է ժամանակ՝ այդ փոփոխությունները կատարելու համար:

Կոնվենցիան վավերացրած 10 երկրներն են Ալբանիան, Անդորրան, Ավստրիան, Բոսնիա և Հերցեգովինան, Իտալիան, Մոնտենեգրոն, Պորտուգալիան, Սերբիան, Իսպանիան, Թուրքիան։ Հնարավոր է, որ այս շաբաթ Դանիան ևս վավերացնի կոնվենցիան։