Ձեր վստահելի աղբյուրը

ՕԵԿ նախագահ Արթուր Բաղդասարյանը քիչ առաջ լրագրողների հետ հանդիպմանը հայտարարեց ԱԱԽ քարտուղարի պաշտոնից իր հրաժարականի մասին: Վերջինս նման որոշումը բացատրեց հինգ հիմնական հանգամանքով` ՀՀ նախագահի հայտարարություն, սահմանադրական բարեփոխումներ, վիճահարույց «կուտակայինը», կառավարության հրաժարական և նոր կառավարության ձևավորում: Նաև նշեց, որ չնայած կոալիցիոն համագործակցությանը, ՕԵԿ-ին չհաջողվեց լինել այդ ձևաչափում որոշիչի կարգավիճակում, իսկ այն ամենի համար, որը կարողացել են անել անցած տարիներին շնորհակալություն հայտնեց նախկին կոալիցիոն գործընկերոջը:

«Որպես 17 տարվա կուսակցության ղեկավար ինձ վերապահում եմ այդ իրավունքը հայտարարելու, որ այս հինգ գործոնները նոր իրավիճակ բերեցին քաղաքական դաշտ և այդ կապակցությամբ որոշում կայացրեցինք այլևս մաս չկազմել քաղաքական կոալիցիային: Մեր երկրի առջև ծառացած են բազմաթիվ խնդիրներ, որոնք էլ ինչպես բարձրաձայնել ենք, այնպես էլ շարունակելու ենք ակտիվ բարձրաձայնել»,- նշեց Ա.Բաղդասարյանը:

«ՕԵԿ-ը շարունակելու է իր ակտիվ դերակատարումը Հայաստանի քաղաքական դաշտում և անկախ չարախոսություններից` մեր կուսակցությունը անցած 17 տարիներին ունեցել է ակտիվ դերակատարում»,-ավելացրեց նա:

Ա.Բաղդասարյանը նշեց, որ քաղաքական դաշտում չեն պատրաստվում ինչ-որ մեկի տեղը զբաղեցնել, վճռական են լինելու իրենց ծրագրերը կյանքի կոչելու համար: Մասնավորապես, վեցը տարի է ԱԺ-ում շրջանառության մեջ են դրված 30 նախագծեր, որոնք մինչ օրս չի հաջողվել ընդունել, չնայած կոալիցիայի մաս կազմելուն:

«Շատ սկզբունքային օրինագծեր կան, բայց չեն ընդունվել... և այս պատճառով էլ, հասկանալով մեր իրական ազդեցության չափը իշխանության մեջ քաղաքական մեր ուժը ընդունել է այդ որոշումը»,- նշեց ՕԵԿ նախագահը:

«Դուրս ենք գալիս կոալիցիայից, որովհետև ուզում ենք անել մի բան, ինչը մեզ չի հաջողվում»,- հայտարարեց Ա.Բաղդասարյանը:

Հարցին` վեցը տարի՞ Էր հարկավոր դա հասկանալու համար ասաց, որ սպասում էր այդ հարցին. «Ինչու ես անցյալ տարի աջակցեցի Սերժ Սարգսյանին նախագահական ընտրություններում, որովհետև մարդու հետ անցել ենք ճանապարհ: Գնահատելով այդ կատարված աշխատանքը, այդուհանդերձ մենք տեսնում ենք, որ չունենք որոշումների վրա ազդելու հնարավորություն: Մենք մեր որոշումները կայացրել ենք հիմնվելով իրավիճակին... մենք ՀՀԿ-ին հաջողություն ենք մաղթում»,- հայտարարեց Ա.Բաղդասարյանը: