Ձեր վստահելի աղբյուրը

Վարդան Պետրոսյանի գործով ապրիլի 25-ին տեղի ունեցած դատական նիստից հետո տուժողների և տուժողների իրավահաջորդների ներկայացուցիչ Ռուբեն Բալոյանը, իր պնդմամբ, գործով կեղծիք է բացահայտել:

Նախ Կոտայքի մարզի ընդհանուր իրավասության դատարանում տեղի ունեցած դատական նիստում երեկ հետազոտվել է Վարդան Պետրոսյանի սթափության վիճակի զննության արձանագրությունը, որտեղ պարոն Բալոյանի համար կասկածելի է եղել «սթափ» բառի գրված ձևը:

«Ես այդ փաստաթղթում ընդամենը մի բան նկատեցի` «ս» տառը թվերի վրա է գրված, ինչն ինձ մոտ կասկած առաջացրեց: Եվ բացի այդ, արձանագրության մեջ «հետազոտման արդյունքը» տողի վրա պետք է գրված լինեին թվեր, ոչ թե «սթափ» բառը: «Սթափ» բառը պետք է գրված լիներ եզրակացություն հատվածում, որը այս փաստաթղթում դատարկ է», -Panorama.am-ի թղթակցի հետ զրույցում ներկայացրեց փաստաբանը:

Սակայն նիստից հետո Վարդան Պետրոսյանի ֆեյսբուքյան էջի ուսումնասիրության ժամանակ Բալոյանը նկատել է դեռևս 2013 թվականի նոյեմբերի 11-ին «Hetq.am» կայքում հրապարակված մի հոդված, որտեղ ներկայացվել է Վարդան Պետրոսյանի սթափության վիճակի զննության այլ արձանագրություն, որում նշված է եղել` «ալկոմետր արտաշնչված օդի մեջ ալկոհոլի հոտ»: Մինչդեռ, ըստ Բալոյանի, իրեն տրամադրված քրեական գործի նյութերում, ինչպես նաև երեկ դատարանում հետազոտված արձանագրության մեջ նման նշում չի եղել:

«Թե սա ինչպես է հայտնվել լրագրողի մոտ, առայժմ ինձ անհայտ է մնում, բայց ես համոզված եմ, որ նշված փաստաթուղթը, ըստ էության, եղել է: Եթե չլիներ, ապա նման փաստաթղթի լուսապատճե չէր հրապարակվի»,- նշեց Բալոյանը` եզրակացնելով, որ իրականում Վարդան Պետրոսյանի սթափության վիճակը չի ստուգվել և նա «գտնվել է հարբած վիճակում»:

Նկատենք, որ երեկ դատաքննության ժամանակ Վարդան Պետրոսյանի փաստաբան Նիկոլայ Բաղդասարյանը դատարանին տեղեկացրել է, որ ինքը այդ հարցով հարցումներ է արել Եղվարդի և «Էրեբունի» բժշկական կենտրոններ: Եղվարդի բժշկական կենտրոնից ուղարկել են Վարդան Պետրոսյան վարորդի սթափության վիճակի մասին արձանագրությունը, իսկ «Էրեբունի» բժշկական կենտրոնից պատասխանել են, որ նման ստուգում իրենց մոտ առհասարակ չեն կատարում:

Հարցին, թե ինչպես է բացատրում տուժողների ներկայացուցիչը այն հանգամանքը, որ նախաքննության փուլում հրապարակվել է այլ փաստաթուղթ, սակայն գործի նյութերում եղել է մեկ ուրիշը, որը ներկայացվել է նաև դատարանում, Բալոյանը պատասխանեց. «Ես վաղաժամ կարծիք չեմ ուզում հայտնել: Թող այդ հարցով զբաղվեն իրավապահները: Բնականաբար, գտնում եմ, որ փաստի առթիվ պետք է հարուցվի քրեական գործ: Համոզված եմ, որ եթե նման փաստաթուղթ եղել է, ուրեմն կեղծիք է կատարվել»:

Նա տեղեկացրեց, որ առաջիկա դատական նիստում միջնորդությամբ հանդես կգա ու դատարանից կպահանջի քրեական գործի բոլոր նյութերը և մանրամասն կծանոթանա դրանց: Նշենք, որ քրեական գործը 5 հատորից է բաղկացած:

Գոյություն չունեցող ընթերական

Տուժողների ներկայացուցչին վրդովեցրել է նաև այլ բացահայտում, որն արվել է երեկվա դատական նիստին: Պետրոսյանի փաստաբան Նիկոլայ Բաղդասարյանը դատարանում ներկայացրել է ապացույցներ, որոնց համաձայն դեպքի վայրի սխեմայի արձանագրության տակ ստորագրած ընթերական` Վազգեն Գարեգինի Կարապետյան անունով անձ (Կոտայքի մարզ, Զորավան գյուղի բնակիչ, ծնված 1985 թ), իրականում գոյություն չունի Հայաստանում: Փաստաբանի ներկայացրած ապացույցները եղել են պատկան մարմիններից ստացված հարցումների պատասխաններ, որոնց համաձայն, նման անուն-ազգանունով անձ երկրում չի ապրում: Դրանք բոլորը, առանց կողմերի առարկության, կցվել են քրեական գործին:

«Եթե նման կեղծ փաստաթուղթ է կցվում գործին, ապա չեմ բացառում, որ ընթերական նույն եղանակով դարձել է անհայտ անձ, թող իրավապահ մարմինները բացահայտեն: Ես իրավապահ մարմիններից պահանջում եմ, որ այսպես կոչված ընթերակային հայտնաբերեն: Դա իրենց խնդիրն է: Այլապես այս գործով արդարություն չի լինի», -հավելեց տուժողների ներկայացուցիչը:

Նա հորդորեց լրատվամիջոցներին ներկայացնել իրականությունը և զերծ մնալ այս գործը կողմնակալ լուսաբանելուց:

«Կարող եմ միանշանակ հայտարարել, որ դատական նիստերը մեկնաբանվում են հօգուտ Վարդան Պետրոսյանի»,- նշեց Բալոյանը` ընդգծելով, որ եթե այդպես շարունակվի, ապա տուժող կողմը ստիպված է լինելու միջնորդել, որպեսզի դատական նիստերն անցկացվեն դռնփակ ռեժիմով: