Ձեր վստահելի աղբյուրը

Վարդան Պետրոսյանի գործով տուժողների ու տուժողների իրավահաջորդների ներկայացուցիչ Ռուբեն Բալոյանը շարունակում է պնդել, որ դերասանի սթափության զննության արձանագրությունում կեղծքիներ են թույլ տվել: Պաշտպանական կողմը սակայն, հայտարարում է, որ նման պնդումները զուրկ են տրամաբանությունից:

Panorama.am-ի թղթակցի հետ զրույցում Ռուբեն Բալոյանը ասաց, որ այսօր Կոտայքի մարզի ընդհանուր իրավասության դատարանին դիմում է ներկայացրել և խնդրել է քրեական գործի նյութերը` ծանոթանալու Պետրոսյանի սթափության վերաբերյալ արձանագրության օրիգինալ տարբերակին:

«Միևնույն ժամանակ ծանոթացա վերջին դատական նիստի ժամանակ Նիկոլայ Բաղդասարյանի կողմից դատարանին ներկայացված փաստաթղթերի հետ: Պարզվեց, որ նույն քրեական գործի մեջ առկա է վարորդի սթափության վիճակի զննության երկու արձանագրություն, որի բովանդակությունն էլ կատարված է նույն անձի կողմից: Ինչումն է կայանում այս երկու արձանագրությունների էական հակասությունները. Քրեական գործում առկա արձանագրության մեջ «արտաշնչված օդի հետազոտությունը» մասում ընդամենը նշված է «ալկոմետր» բառը, իսկ երկրորդ արձանագրությունը, որը ներկայացրել է դատարանին Վարդան Պետրոսյանի պաշտպան Նիկոլայ Բաղդասարյանը, այսպիսին է` «արտաշնչված օդի հետազոտությունը» հատվածում նշված է` «ալկոմետր, արտաշնչված օդի մեջ ալկոհոլի հոտ»: Այստեղից եզրակացություն` չի կարող նույն արձանագրությունը տարբեր բովանդակություններով լինել», -մեզ հետ զրույցում ասաց Բալոյանը:

Բացի դրանից, ըստ տուժող կողմի ներկայացուցչի, դատարանում քրեական գործի նյութերին անմիջապես ծանոթանալուց հետո նկատել է. «Երկու արձանագրությունների տակ էլ առկա է կապույտ կնիք, բացի դրանից սթափության աստիճանը հետազոտած բժիշկ Գևորգյանի ստորագրությունները երկու արձանագրություններում տարբեր են: Թե ինչ եղանակով է կատարվել այս կեղծիքը, կպարզվի իրավապահ մարմինների կողմից քրեական գործ հարուցելուց հետո»:

Վարդան Պետրոսյանի պաշտպան Նիկոլայ Բաղդասարյանը կարծում է, որ նման հայտարարությունները իր պաշտպանյալին վարկաբեկելու միտում ունեն, ինչը «գեղեցիկ չէ ու վայել չէ փաստաբանին»:

«Որպես նախկին քննիչ, պարոն Բալոյանը պետք է իմանար, որ արձանագրությունը կազմվում է երկու օրինակից, մեկը տրամադրվում է իրավապահ մարմնին, որը կցվել է քրեական գործին, մյուս օրինակը թողնվել է հիվանդանոցում: Իմ կողմից պահանջվել է երկրորդ օրինակի պատճենը, որի վրա մեզ անհասկանալի պատճառներով լրացում է կատարվել, որն ի վնաս Վարդան Պետրոսյանի է արվել: Եթե բողոքող կողմ լիներ, ապա դա պետք է Վարդան Պետրոսյանը լիներ: Պարզ տրամաբանություն է, և փաստորեն, Ռուբեն Բալոյանը զբաղվում է Վարդան Պետրոսյանի պաշտպանությամբ»,- մեզ հետ զրույցում մեկնաբանելով Ռուբեն Բալոյանի հայտարարությունը, ասաց Նիկոլայ Բաղդասարյանը:

Ինչ վերաբերում է սթափությունը հետազոտած բժշկի «տարբեր ստորագրություններին», որոնք նկատել է Ռուբեն Բալոյանը, ապա Բաղդասարյանն ասաց, որ այդ մասին ինքը գիտե և գիտե նաև, որ «դրանք տարբեր ժամանակահատվածներում են արվել. մեկը ստորագրվել է առաջին էջի վրա, մյուսը` երկրորդ էջի: Դարձյալ` եթե դժգոհող կողմ լիներ, ապա պետք է Վարդան Պետրոսյանը դժգոհեր այդ փաստաթղթից, որովհետև առաջին փաստաթղթի վրա գրվել է սթափ, երկրորդ արձանագրության վրա լրացում է կատարվել ի վնաս Վարդանի»:

Նիկոլայ Բաղդասարյանն ասաց, որ իրենք հասկացել են խնդիրը, ինչն ուղղակի տեխնիկական թերություն է եղել և այդ պատճառով էլ բողոք չեն ներկայացրել:

Վիճահարույց «սթափ» բառի «ս» տառի շուրջ փաստաբան Բալոյանի մտահոգությունները խորացել են. նա իր խոսքով, այսօր ևս Աբովյանի դատարանում ուշադրությամբ զննել է արձանագրությունը և կսկածները խորացել են. ««ս» տառի առաջին մասնիկի մեջ պարզ տեսանելի է 6 թիվը: Իսկ 6 թիվը արտաշնչած օդի մեջ ալկոհոլի քանակությունն է: Եթե նշված վեց թիվը փորձաքննությամբ ապացուցվի, ապա դրանով կպարզվի, որ Վարդան Պետրոսյանը գտնվել է ծանր աստիճանի հարբած վիճակում»:

Տուժողների ներկայացուցիչն ասաց, որ հաջորդ դատական նիստում միջնորդելու են, որպեսզի դատաձեռագրաբանական փորձաքննություն իրականացվի:

Իսկ Նիկոլայ Բաղդասարյանը անհիմն է համարում նման պնդումը. «Ոչ մի իրավական հիմք չկա նման հայտարարության համար: Եթե մարդը խմած է լինում, նախ մատյանի մեջ է գրվում `խմած է, հետո գրվում է խմածության աստիճանը: Արձանագրության մեջ նշված «սթափ» բառից ստացած մեր տպավորությունն այնպիսին է, որ բժիշկը փորձել է գրել, բայց սկզբում չի գրվել ու ինքը երկրորդ անգամ գրիչով փորձել է գրել մասնիկը: Ողջամիտ տրամաբանություն ունեցող ցանկացած մարդու մոտ «ս» տառի նման տեսքը չի կարող կասկած ներշնչել»:
 

Տես նաև`

Վարդան Պետրոսյանի սթափ լինել-չլինելու վերաբերյալ տուժող կողմը բացահայտում է արել (տեսանյութ)