Ձեր վստահելի աղբյուրը

«Եթե ամեն մեկը պետության մեջ իր գործով զբաղվեր, այլ իրավիճակ կլիներ»,-ԱԺ-ում իր ելույթում հայտարարեց «Ժառանգություն» խմբակցության ղեկավար և ԱԺ նախագահի թեկնածու Ռուբեն Հակոբյանը: Վերջինս նման հայտարարություն արեց ներկայացնելով իր նախընտրական ծրագիրը, թե ինչ է անելու, եթե ընտրվի այդ բարձր պաշտոնում:

Մասնավորապես, Ռ.Հակոբյանը պնդելու է, որ ԱԺ-ն վերադառնա եռօրյա նիստերի ռեժիմին, իսկ նիստերի միջև ընդմիջումները կրճատվեն:

«Ինձ հակափաստարկ են ներկայացնում` չեն հասցնի գան նիստերին… եղբայր, բա իրենց գործն ի՞նչն է, եթե նիստերին չեն հասցնելու գան: Եթե ամեն մեկը պետության մեջ իր գործով զբաղվեր, այլ իրավիճակում կլինեինք»,- նշեց նա` ավելացնելով, որ ոչ մեկի համար գաղտնիք չէ, որ պատգամավորների մեջ շատ են կոճակ սեղմողները:

Ըստ ԱԺ նախագահի թեկնածուի` արմատական փոփոխություններ են հարկավոր երկրում: Ռ.Հակոբյանը նշեց նաև  որ քաղաքական նարցիսիզմը խանգարում է իշխանություններին:

«Ձեզ տեսել եք ջրի արտացոլանքում ու ասում եք` մենք ենք, որ կանք… հրաժարվեք այդ քաղաքական նարցիսիզմից, ձեր ապահով Հայաստան կառուցելու գաղափարից»,- հորդորեց նա ՀՀԿ-ականներին:

ԱԺ նախագահի պաշտոնակատար Էդուարդ Շարմազանովը արձագանքեց. «Այո, դուք ճիշտ եք` պետք է հրաժարվել քաղաքական նարցիսիզմից և գործընկեր պատգամավորներին չանվանել կոճակ սեղմողներ»:

Իսկ Թևան Պողոսյանն էլ իր ելույթում հորդորեց ՀՀԿ-ականներին քվեարկել Ժառանգության թեկնածուի օգտին` այդպիսով զիջելով ԱԺ նախագահի պաշտոնն ընդդիմությանը: