Ձեր վստահելի աղբյուրը

Նիհարեցնող դեղերի և խոտաբույսերի պակաս դեղատներում չկա, գնորդների թիվն էլ քիչ չէ: Մարդիկ ամենից հաճախ դիմում են նիհարելու հեշտ տարբերակին, բժշկի հետ խորհրդակցելով դիետաներ պահելու փոխարեն, նախընտրում են արագ ազդող որևէ դեղամիջոց օգտագործել` չմտածելով, թե դրանք ինչ վնասներ կարող են հացնել իրենց առողջությանը:

Էնդոկրինոլոգ Բամինե Բաղրամյանի պրակտիկայում քիչ չեն եղել դեպքեր, երբ մարդիկ միանգամից դիմել են դեղամիջոցի օգնությանը, նման դեպքերում էլ բժիշկը խորհուրդ է տալիս նաև ֆիզիկական ակտիվությամբ և ճիշտ սննդակարգով ապրել:

«Ցանկացած նման միջոցի հետ առկա գրության մեջ նշած է, որ մինչև այն օգտագործելը անպայման պետք է փորձել ֆիզիկական ակտիվության և ճիշտ սննդակարգի միջոցով նիհարել: Եթե չի օգնում, դրանից հետո միայն խորհուրդ է տրվում նմանատիպ դեղորայք օգտագործել: Մակնշման վրա նաև նշած է, որ միջոցը պետք է զուգակցել ֆիզիկական ակտիվությամբ և ճիշտ սննդակարգով: Ինքնուրույն փորձելով ինչ-որ դիետաներ, արդյունքի չհասնելով, սովորաբար առանց բժշկի հետ խորհրդակցելու սկսում են խմել: Շատ քիչ դեպքերում են բժշկի հետ խորհրդակցում»,- Panorama.am-ի հետ զրույցում ասաց Բամինե Բաղրամյանը:

Այսօր երկու խումբ դեղեր են կիրառվում: Մի խումբը թույլ չի տալիս, որ կալորիաներն աղիներից ներծծվեն, մյուսը խումբը ակտիվացնում է նյութափոխանակությունը: Լինում են նաև անհայտ ծագման միջոցներ, դրանք դեղորայք չեն, սննդային հավելումներ են, չունեն ապացուցողական բազա, որ օգնում են նիհարել: Բայց վաճառվում է դեղատանը:

Երևանի դեղատներից մեկում մեզ հետ զրույցում ասացին, որ մարդիկ հիմնականում դեղամիջոցներ են գնում: Տարիներ առաջ ավելի շատ խոտաբույսեր էին գնում:

Էնդոկրինոլոգ Բամինե Բաղրամյանն այդ դեղերի լավ և վատ կողմերը հստակ գիտի, սպասվող ազդեցությունները` ևս, միշտ հիվանդներին զգուշացնում է, որ կարող են կոնկրետ հետևանքներ լինել:

«Ինչ վերաբերում է խոտաբույսերին, կոնկրետ միանշանակ չեմ կարող ասել, որովհետև դրանք բազմազան են, ամեն մի բույս չինական նյութերի ֆաբրիկա է, հնարավոր է տասը նյութը գիտենք, հարյուրը` ոչ: Նաև չգիտենք, թե ինչ կարող է լինել նման նյութերի համակցությունից»,- ասաց բժիշկը:

Ինչ վերաբերում է նման դեղամիջոցների դեղատներում վաճառքի թույլտվությանը, ապա բժշկի խոսքով, եթե հասել է դեղատուն, ուրեմն համապատասխան մարմինը տվել է այն: Բայց ինչքանով են դրանք ցուցված կոնկրետ դեպքի համար, արդեն հարց է: Ժամանակին, երբ Բամինե Բաղրամյանն աշխատում էր պոլիկլինիկայում, որտեղ դիմելիությունն ավելի շատ է, ականատես է եղել դեպքի, որ նման պրեպարատ օգտագործելուց հետո մարդու մոտ առաջացել է շաքարային դիաբետ:

«Ես չեմ կարող միանշանակ ասել, որ դա հետևանք էր հենց այդ դեղերի, բայց ամեն դեպքում կոնկրետ ինձ համար դա հայտնագործություն էր: Օգտագործել էր մարդը կոնկրետ պրեպարատը, կապը նկատել եմ»,- ասաց է նա:

Նիհարեցնող դեղամիջոցներ օգտագործելիս հիմնական վտանգը սիրտ-անոթային հիվանդությունների դեպքում է: Նյութափոխանակությունն ակտիվացնող դեղամիջոցների հետևանքով կարող է բարձրանալ ճնշումը կամ ջերմությունը, սրտխփոցներ լինել, նյարդային վիճակը բարդանալ: Այսինքն, այն ամենը, ինչը հետևանք է երկարատև լարված վիճակի: Դա էլ կարող է հանգեցնել բարդությունների, հատկապես տարիքով մարդկանց դեպքում: Կան նաև դեղամիջոցմեր, որոնք ազդում են աղեստամոքսային տրակտի վրա:

Նյարդաբան Նունե Եղիազարյանը մեզ հետ զրույցում ասաց, որ իր աշխատանքային փորձի ընթացքում չեն եղել դեպքեր, որ նյարդերի հետ խնդիրներ առաջանան հենց նման դեղամիջոցների կիրառումից:

«Ավելի հաճախ թերսնուցման հետևանքով կարող են մարդիկ այդպիսի խնդիրներ ունենալ»,- ասաց նա:

Հոգեբան Աննա Հովհաննիսյանն էլ նշեց, որ նիհարելու խնդրով իրեն մարդիկ դիմել են, բայց ոչ թե դեղաբույսերից առաջացած հետևանքները բուժելու, այլ հոգեբանորեն խնդիրները հաղթահարելու. «Մենք անցել ենք կուրս, առանց դեղամիջոցի փորձել ենք հասնել ավելի լավ արդյունքների: Իմ հիվանդներից եղել են մարդիկ, ովքեր դիմել են, բայց արդեն դադարեցրած են եղել օգտագործել, որևէ լուրջ հետևանքներ այդ պահին չկային»:

Աննա Հովհաննիսյանի խոսքով, հարցը ինդիվիդուալ է, կախված է գիրությունից, դեղամիջոցն օգտագործելու քանակից, ժամանակից: Բայց միանշանակ չէ, որ նման միջոցները ազդում են հոգեկան առողջության վրա:

Էնդոկրինոլոգ Բամինե Բաղրամյանի խոսքով նիհարեցնող թեյերի և դեղորայքի միջև ընտրության դեպքում մարդիկ միանշանակ դիմում են դեղորայքին, քանի որ այն ավելի հեշտ տարբերակ է:

«Լինում են մարդիկ, որ դիմում են ու առաջին հարցն այս է` «իսկ չկա՞ այնպիսի դեղ, որ ես խմեմ, ինչ ուզեմ ուտեմ, բայց չչաղանամ»: Ոչ, չկա նման պրիպարատ, ես դա միանշանակ եմ ասում: Մարդիկ միշտ ձգտում են հեշտ տարբերակին` անտեսելով կողմնակի ազդեցությունները»,- ասաց նա:

Մասնագետները միանշանակ խորհուրդ են տալիս նախ փորձել նիհարել բնական եղանակով, ինչը առողջությանը վնաս չի տա, իսկ դիետաներ էլ պահել միայն բժշկի ցուցումներով: