Ձեր վստահելի աղբյուրը

ՀՀ նախկին վարչապետի պաշտոնանկության հիմնական պատճառներն ավելի շատ գտնվում էին ներքաղաքական դաշտում և կային մի քանի օբյեկտիվ պատճառներ, որոնցով նախորդ Կառավարությունը չէր կարող շարունակել իր գործունեությունը: Այս մասին այսօր լրագրողների հետ հանդիպման ժամանակ ասաց քաղաքագետ Ալեքսանդր Մարգարովը:

Քաղաքագետն առանձնացրեց վարչապետի հրաժարականից հետո 3 սցենար, որով կարող էին գնալ ՀՀԿ-ն և ընդդիմությունը: Առաջին սցենարն, ըստ նրա, հիմնական դերակատարողի շրջանակում կառավարության ձևավորումն է, երկրորդ սցենար՝ մինիմալ կոալիցիա կամ դրա պահպանում, երրորդ սցենար՝ եթե օրակարգում եղել է լայն կոալիցիայի ձևավորման հարց, փորձել ձևավորել այդ կոալիցիան:

Այս իրադարձությունների զարգացմանը ընդդիմադիր դաշտի արձագանքը, ըստ Մարգարովի, ցույց տվեց, որ նրանք պատրաստ չէին նման զարգացումներին, կամ նրանք պատրաստ չէին մտնել կառավարություն և հանդես գալ, որպես համագործակցող ուժ:

«Փաստորեն, ըստ էության պահպանվեց առաջին սցենարի զարգացումները, այսինքն` մեկ քաղաքական ուժի պայմաններում ստեղծել կառավարություն»,- ասաց նա:

Իսկ նոր կառավարությունը, ըստ Ալեքսանդր Մարգարովի, ունի և՛ տեխնոկրատական տարրեր, այսինքն՝ հին կառավարության տարրեր, մյուս կողմից հնի ու նորի խառնուրդ է, քանի որ այստեղ պահպանվում են նաև «հին» նախարարները, այդ թվում` կրթության և գիտության, մշակույթի և այլն: Մյուս կողմից կան այն դեմքերը, որոնք նախկինում հանդես էին եկել` որպես համապատասխան պաշտոնյաներ, և այսօր նորից պատրաստակամություն են հայտնել շարունակել աշխատանքը կառավարությունում, որպեսզի տնտեսությունը դուրս բերեն այս վիճակից:

Նա միաժամանակ նշեց, որ այս կառավարության հիմնական խնդիրներից մեկը նոր կադրեր գտնելն է. «Գտնել այն նոր սերունդը, որը կարող է մտնել բարձր էշելոնի մեջ և հանդես գալ որպես նոր ղեկավարների սերունդ: Գուցե հաջորդ ընտրական ցիկլի ժամանակ իրավիճակը փոփոխություն ունենա»:

Անդրադառնալով Աժ խոսնակի առաջադրմանը, Ալեքսանդր Մարգարովը նշեց, որ խորհրդարանական 4 ուժերը կորցրին նաև ԱԺ նախագահի հարցում միասնաբար հանդես գալու հնարավորությունը:

«Ընդդիմադիր դաշտն այսօր ուներ հնարավորություն՝ փորձել հանդես գալ մեկ միասնական ճակատով, խոսքը խոսնակի ընտրությունների մասին է։ Եվ մենք տեսնում ենք, որ դա կամ չհաջողվեց, կամ՝ ցանկություն ի հայտ չեկավ: Ավելին` Հրանտ Բագրատյանի ինքնաառաջադրումը անակնկալ էր որոշ ուժերի համար, որը ևս ցույց տվեց` ընդդիմադիր դաշտում արդեն բաժանում կա»,-ընդգծեց բանախոսը: