Ձեր վստահելի աղբյուրը

Այսօր Ազգային ժողովի նիստի մեկնարկին ԱԺ նախագահի պաշտոնակատար, նիստը վարող Էդուարդ Շարմազանովը հայտարարեց, որ Սևանա լճից ջրի բացթողնման վերաբերյալ հարցի շուրջ քննարկումներից հետո կառավարության ղեկավարի կողմից հանձնարարական է եղել, որը կներկայացնի հարցի հարակից զեկուցող ՀՀ տարածքային կառավարման նախարարության ջրային տնտեսության պետական կոմիտեի նախագահ Անդրանիկ Անդրեասյանը:

Վերջինը ԱԺ ամբիոնից հայտարարեց, որ հիմք ընդունելով երեկվա քննարկումները, քաղաքացիական հասարակության մտահոգությունները կառավարությունն առաջարկում է օրենքի գործողության ժամկետը սահամանափակել և տեղավորվել մեկ տարվա ժամկետում, առաջարկվող 5 տարվա փոխարեն:

«Բայց առաջիկայում, տարվա բոլոր առանձնահատկություններն հաշվի առնելով, եզրակացությունները կներկայացվեն ձեր դատին», -հայտարարեց Անդրեասյանը:

Նշենք, որ «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մաաին» ՀՀ օրենքում լրացումներ կատարելու մասին» օրենքի նախագծով կառավարությունն առաջարկում էր հինգ տարի շարունակ թույլատրել Սևանա լճից 5 տարի ժամկետով մինչև 240 մլն խմ ջուր վերցնել Արարատյան դաշտի ոռոգման համար: Բնապահպանները մտավախություն ունեին, որ լճի մակարդակը կիջնի, ինչն էլ կկանգնեցնի լճի ճահճացման վտանգի առաջ:

Քվեարկությունից առաջ ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը հայտարարեց, որ իրենց խմբակցությունը կողմ կքվեարկի, քանի որ երեկվա քննարկումների ժամանակ իրենք առաջարկել էին 5 տարի ժամկետը կրճատել` հասցնելով մեկ տարվա, ինչն, ըստ էության ընդունվել է կառավարության կողմից:

«ԲՀԿ-ն կողմ է քվեարկում` հասկանալով, որ խնդիրը պետք է լրջագույն լուծում ստանա», -հայտարարեց Զոհրաբյանը:

Օրինագիծն ընդունվեց դեմ 15, կողմ 96 և 4 ձեռնպահ ձայների հարաբերակցությամբ:

Օրինագծին դեմ էին ԱԺ Դաշնակցություն, Ժառանգություն և ՀԱԿ խմբակցությունները:

Հարակից հրապարակումներ`

Ջուր չկա, հայկական ատոմակայանի հովացման համակարգը հայտնվել է սպառնալիքի տակ. Փաշինյան (տեսանյութ)

SOS Սևան. Բնապահպանները բողոքում են ԱԺ դիմաց (տեսանյութ)