Ձեր վստահելի աղբյուրը

«Երկրում հասունացած քաղաքական նոր իրավիճակը ոչ բոլորն են գիտակցում են: Նախագահ Սերժ Սարգսյանի իշխանության ղեկն անձամբ ոչ մի ձևաչափում երրորդ ժամկետով չվերցնելու մասին հայտարարությունն իրականում խաղի նոր կանոններ է հայտարարում, որոնք դեռ մինչև վերջ չեն ընկալվել»,- ԱԺ-ում լրագրողների հետ ճեպազրույցում հայտարարեց ԱԺ փոխնախագահ Էդուարդ Շարմազանովը:

Նա հիշեցրեց, որ երկրի ղեկավարն ասել է, որ այլևս երբեք չի առաջադրվելու ՀՀ նախագահի պաշտոնի համար և ասաց. «Եթե վերջնական քննարկումների արդյունքում իր ցանկությանը չհամապատասխանող ուղի ընտրվի՝ խորհրդարանական կառավարման մոդելը, ապա նա չի հավակնի նաև վարչապետի պաշտոնին: Նախագահը նաև նշել է, որ նույն մարդը երկու անգամից ավելի չպետք է հավակնի երկրի կառավարման ղեկին»:

Նա նաև հավելեց` ՀՀԿ-ն կշարունակի իր ծանրակշիռ ու որոշիչ դերակատարությունն ունենալ Հայաստանում այն կանոններով, որոնք, որ կկայացվեն Սահմանադրական բարեփոխումներով:

«Այս մեկ պարագրաֆի մեջ իրականում խտացված ու կանխորոշված է նոր քաղաքական իրականությունը, որն այսօր թելադրվում է ապագա տասնամյակի համար: Քաղաքական դաշտն անցնում է ցանցային, հորիզոնական կառավարման մոդելի` այլևս էապես նվազելու է մեկ մարդու դերը պետական կառավարման հիերարխիայում և կտրուկ աճելու է քաղաքական կուսակցությունների դերը: Հենց այս իրողությունը չգիտակցած գործիչներն են, որ այս օրերին կաշվից դուրս են գալիս` ապագայի մեջ իրենց դիրքավորելով, ինչը միայն ժպիտ կարող է առաջացնել»,- ընդգծեց ԱԺ փոխնախագահը:

Է.Շարմազանովն ասաց նաև, որ երկրի ղեկավարը հստակ ամրագրել է իր համոզմունքը, այն է` գալիք տարիներին որոշիչ է լինելու հենց ՀՀԿ-ի ասելիքը և ոչ թե որևէ մեկ անհատի, հայտնի գործչի կամ նախկին- ապագա ղեկավարի:

«Ակնհայտ է, որ առաջիկա տասնամյակում կուսակցությունն իր չափերով, կազմակերպվածությամբ ու քաղաքական ռեսուրսով շարունակելու է մնալ առաջատարը Հայաստանի քաղաքական դաշտում: Նախագահ Սարգսյանն իր հայտարարության մեջ հստակ ամրագրել է, որ պետական կառավարման ամենաբարձր օղակներում իրենց տեսնող մարդկանց համար պետության կառավարման ղեկին ձգտելու հիմնական, եթե ոչ միակ ճանապարհը ՀՀԿ-ն է և եթե որևէ մեկը գալիք տարիների ընթացքում հավակնում է նախագահի կամ վարչապետի պաշտոնին, ապա այդ ճանապարհն անցնում է Մելիք-Ադամյան փողոցով: Ո՞րն է պահի ամենաուշագրավ կողմը, հենց Սերժ Սարգսյանի կողմից ինքնաբացառումն է, ինչը նշանակում է, որ դաշտը բաց է ու մրցակցային, բայց այդ մրցակցությունը առաջին հերթին ՀՀԿ-ի ներսում է»,- հայտարարեց Է.Շարմազանովը:

ԱԺ փոխնախագահը հավելեց` վստահ է, որ այդ գործընթացները առաջիկա տարիներին կբերեն որակական նոր թռիչքով ապրող կուսակցության, որն էլ կլինի ուղեցույց այլ քաղաքական ուժերի համար:

Հարցին, թե կարելի՞ է ենթադրել, որ սա առաջարկ է առաջին և երկրորդ նախագահներին, որ անդամագրվեն ՀՀԿ-ին, եթե ցանկանում են ստանձնել երկրի ղեկը, Շարմազանովը պատասխանեց. «Սա իրականության ամրագրում է, որ ապագա տասնամյակում ՀՀԿ-ն է լինելու ՀՀ քաղաքական դաշտի թիվ մեկ ջութակը»։