Ձեր վստահելի աղբյուրը

«Հայաստանի աշխատաշուկան բավականին տարբերվում է այլ երկրների աշխատաշուկաներից և ունի որոշակի առանձնահատկություններ»,-այս մասին այսօր լրագրողների հետ հանդիպման ժամանակ ասաց Հայաստանի գործատուների հանրապետական միության նախագահ Գագիկ Մակարյանը:

Նրա խոսքերով` այսօր աշխատաշուկան այն շունչը չունի, ինչ կար խորհրդային տարիներին:

«Այսօր «քիչ աղմկոտ» աշխատաշուկա ունենք, արդյունաբերական խոշոր ձեռնարկությունները հիմնականում գտնվում են մարզերում, դրանց աշխատողների թվաքանակը փոքր է՝ մոտ 60 հազար, մոտ 190 հազար մարդ աշխատում է պետական հատվածում, 220 հազար էլ` մասնավոր հատվածում: Ստացվում է, որ զբաղվածության տեսանկյունից զգալի մասը բաժին է ընկնում փոքր բիզնեսին, մինչդեռ շատերի մոտ այն տեսակետն է, որ խոշորներն են ապահովում»,- ասաց Գ.Մակարյանը:

Ըստ նրա, փոքր բիզնեսը փոքր ներդրում ունի բյուջեում, իսկ խոշոր բիզնեսը կարող է բյուջեում էական դերակատարություն ունենալ, բայց աշխատաշուկայում փոքր մասնաբաժին կազմել:

Ինչ վերաբերում է գործատու-աշխատող հարաբերություններին, Գ.Մակարյանը նշեց, որ պետք է հավասար մրցակցություն ապահովել, քանի որ բոլոր խնդիրները գալիս են անհավասար մրցակցությունից: Արդյունքում, բիզնեսը չի կարողանում մրցակցել և գործատուն փորձում է ստվերային աշխատուժի միջոցով ինչ-որ խնդիրներ լուծել: Նա միաժամանակ նշեց, որ միջազգային կառույցների կողմից իրականացված հետազոտությունների արդյունքում, ստվերային աշխատուժը Հայաստանում կազմում է ընդամենը 20%: Դա խոսում է այն մասին, որ ձեռնարկատերերն այնքան էլ անբարեխիղճ չեն և ստվերային աշխատուժի հաշվին մեծ եկամուտներ չեն ձգտում ապահովել:

«Այդ 20 տոկոսը խոսում է այն մասին, որ փոքր բիզնեսը զարգանալու համար ընդամենը չնչին իմպուլսի կարիք ունի»,- ասաց նա:

Անդրադառնալով հաջորդ խնդրին, Գ.Մակարյանը նշեց, որ Հայաստանում աշխատանքային պայմանագրեր կնքելու մշակույթը ձևավորված չէ, քանի որ գործատուն հաճախ չի պատկերացնում, թե չգրանցված աշխատողի դեպքում ինչ խնդիր կարող է ունենալ, աշխատողները նույնպես չեն պատկերացնում, թե ինչ սոցիալական օգուտներ կարող են ունենալ օրինական պայմանագիր ունենալու դեպքում: Որպես թարմ օրինակ Գ.Մակարյանը մատնանշեց պարտադիր կուտակային կենսաթոշակային համակարգի խնդիրը. մարդիկ իրենք են գործատուներին դիմում, որ իրենց չգրանցեն, որպեսզի իրենց աշխատավարձից պահումներն չարվեն:

«Գործատուների վերաբերմունքը կուտակայինին նույնպես բացասական է: Մենք գտնում ենք, որ այդ ռեֆորմը վաղաժամկետ է: Եվ ես բազմիցս ասել եմ, որ նոր Կառավարությունը ոչ թե պետք է խոշոր ռեֆորմներով հրապուրվի, այլ առաջին հերթին պետք է լուծի այն խնդիրները, որոնք այսօր մտահոգում են մեր հասարակությունը»,- ասաց նա:

Ինչ վերաբերում է գործազրկության ցուցանիշներին, Գ.Մակարյանն ասաց, որ պաշտոնական տվյալներով` այն կազմում է 17 տոկոս, բայց Հայաստանում գործազրկության ցուցանիշն իրականում ավելի բարձր է:

«Եթե մարդիկ ռեգուլյար չեն աշխատում, դա չի նշանակում, որ նրանք լիարժեք զբաղված են»,- նշեց նա: