Ձեր վստահելի աղբյուրը

Վերջին երկու օրվա ընթացքում Ադրբեջանի փոխարտգործնախարար Արազ Ազիմովը և նախագահի աշխատակազմի ղեկավարի տեղակալ Նովրուզ Մամեդովը իշխանամետ լրատվամիջոցների օգնությամբ հնչեցնում են այն միտքը, որ Բաքուն կարող է բարձրացնել Մինսկի խմբի ԱՄՆ համանախագահ Ջեյմս Ուորլիքի հեռացման հարցը: Այս մասին ասվում է ադրբեջանական «Թուրան» լրատվական գործակալության կայքում տպագրված «Ինչով Ուորլիքը դուր չի եկել պաշտոնական Բաքվին» հոդվածում:

«Թուրանը» նշում է, որ Ադրբեջանի իշխանությունների ներկայացուցիչները «ինչու» հարցին հստակ պատասխան չեն տալիս:

«Միևնույն ժամանակ ակնարկում են, որ համանախագահը իր «Twitter»-ի էջում ոչ ճիշտ բաներ է գրում, մասնավորապես շփվում է հայկական սփյուռքի հետ, իսկ հետո էլ ադրբեջանականի հետ: Թե այստեղ ինչն է հանցագործություն, դժվար է ասել»,-ասվում է հոդվածում:

Գործակալությունը գրում է, որ կարելի է եզրակացնել, որ Բաքուն դժգոհ է Ուորլիքի «ինքնագործունեությունից», ով չափից դուրս խաղաղասիրություն է ցուցաբերում՝ Հայաստանի վրա ճնշում գործադրելու փոխարեն:

«Վերջին տարիների ընթացքում հենց այսպիսին էին եղել Ադրբեջանի իշխանությունների հարցերը և պահանջները Մինսկի խմբի հանդեպ: Թե ինչու է հիմա միայն խոսվում ԱՄՆ համանախագահի մասին, դժվար է հասկանալ: Սակայն կասկած չկա, որ դա ունի իր պատճառները»,- ամփոփում է «Թուրանը»:

«Իշխանությունների հարձակման հերթական թիրախը՝ «Transparency International» և «հինգերորդ շարասյունը»» հոդվածում «Թուրանը» գրում է, որ, ըստ երևույթին, Ադրբեջանի իշխանությունների հարձակման հերթական թիրախ է դարձել «Transparency International»-ը:

«Այսպիսով, Միլի մեջլիսի այսօրվա նիստը սկսվել է այն բանից, որ երկու պատգամավորներ՝ Ալի Հուսեյնովը և Էլմիրա Ախունդովան, հայտարարել են «Transparency International»-ի Ադրբեջանում ներկայացուցչության՝ «Transparency Azerbaijan» կազմակերպության կողմնակալության և կործանարար գործունեության մասին: Նրանք չեն խոսել պատճառների վերաբերյալ, սակայն Ալի Հուսեյնովը կոչ է արել իշխանություններին և պատգամավորներին չմասնակցել այդ կազմակերպության միջոցառումներին»,- ասվում է հոդվածում:

Միևնույն ժամանակ, ինչպես նշում է «Թուրանը», երկու պատգամավորն էլ նշել են, որ անհրաժեշտ է պայքարել «հինգերորդ շարասյան դեմ»՝ առանց հստակեցնելու, թե ում կամ ինչի մասին է խոսքը: Այնուհետև պատգամավոր Մուսա Գասիմլին կոչ է արել խստացնել ոստիկանության մասին օրենքը՝ հաշվի առնելով ոստիկանության աշխատակցի վրա «Լեյլա Յունուսի հարձակման փորձը»:

Ըստ երևույթին, պատգամավորը ի նկատի ունի այն, որ ակտիվիստը շպրտել էր ոստիկանի գլխարկը, ով, չնայած Լեյլա Յունուսի բողոքի, մտել է զուգարան այն պահին, երբ Յունուսն էր այնտեղ:

Երբ խոսքը հասել է իշխող կուսակցության փոխնախագահ Սիյավուշ Նովրուզովին, նա  հայտարարել է, որ ԱՄՆ պետքարտուղարությունը խառնվում է Ադրբեջանի գործերին և «իր գործակալներին, ում վճարում է, պահում է իր պաշտպանության տակ»: Ընդ որում, այդ միջոցները հայերն են տրամադրում, ասել է պատգամավորը:

Պատգամավոր Ֆազաիլ Ագամալին էլ հայտարարել է, որ Լեյլա Յունուսը բոլորից շատ է ստանում այդ միջոցներից, և որ նա «առանց իշխանությունների համաձայնության» այցելում է արտասահմանյան երկրներ: Այս ամենին պետք է վերջ տալ, ասել է նա:

Պատգամավոր Ազայ Գուլիևը զայրացել էր այն փաստից, որ «Transparency Azerbaijan»-ը դրամաշնորհ է տվել Լեյլա Յունուսին, իսկ «Transparency»-ի զեկույցում բացասական գնահատական է տրել Ադրբեջանի խորհրդարանին:

Ամփոփելով այս ելույթները՝ խոսնակ Օքթայ Ասադովը ամոթանք է տվել Լեյլա Յունուսին և Ռենա Սաֆարալիևային՝ մեղադրելով նրանց Ադրբեջանի պետականության խափանման մեջ: «Հետաքննություններ անցկացնելու փոխարեն, նրանք զբաղվում են կործանարար գործունեությամբ»,- ասել է Ասադովը:

«Թուրանը» նաև նշում է, որ նախագահի աշխատակազմի իրավապահ մարմինների հետ աշխատանքի վարչության պետ Ֆուադ Ալեսքերովը ծայրահեղության հասնող քննադատությամբ է հանդես եկել «Transparency Azerbaijan»-ի նկատմամբ՝ կողմնակալ անվանելով վերջինի՝ Ադրբեջանին ուղղված զեկույցները:

Բացի այդ, մի շարք ադրբեջանցի պատգամավորներ հանդես են եկել Ջեյմս Ուորլիքի հանդեպ կտրուկ հայտարարություններով:

Այսպիսով, պատգամավոր Զախիդ Օրուջը «Day.az» գործակալության հետ հարցազրույցի ժամանակ ասել է, որ ԱՄՆ կողմից Ղարաբաղի հակամարտության գործում նշանակված «դեսպաններից» ամենաանհաջողը Ջեյմս Ուորլիքն է:

«Կարծում եմ, որ մեր երկիրը պետք է փորձի հասնել նրան, որ Ուորլիքը կորցնի մանդատը կամ նրան, որպես «persona non grata», հետ կանչեն: Կարծում եմ, որ բանակցությունների ընթացքում իրավիճակը ավելի չսրելու համար Ադրբեջանի դիրքորոշումը կընդունվի»,- ավելացրել է Օրուջը:

Աայսօր Ադրբեջանի խորհդարանի պատգամավոր Ֆուադ Մուրադովը ասել է «Trend» լրատվական գործակալությանը, որ Ջեյմս Ուորլիքի դիքորոշումը «ստվեր է գցում նրա միջնորդական գործունեության վրա», իսկ նրա փաստարկները «անհիմն» են:

«Ես հասկանում եմ Ուորլիքի սերը հայերի նկատմամբ: Սակայն նրա արտահայտած մտքերը ստվեր են գցում Լեռնային Ղարաբաղի հարցով բանակցություններում նրա խաղաղ միջնորդական գործունեության վրա: Ես ուզում եմ հավատալ, որ նման անձինք չեն կարողանա վնասել ադբեջանա-ամերիկյան կապերին»,- ասել է նա:

Իր հերթին, Ադրբեջանի խորհրդարանի խոսնակ Օքթայ Ասադովը խոսել է Ջեյմս Ուորլիքի մի շարք հայտարարությունների մասին, սակայն չհստակեցնելով, թե ում մասին է գնում խոսքը:

«ԵԱՀԿ Մինսկի խմբի համանախագահները փորձում են Լեռնային Ղարաբաղի անջատողական ռեժիմը ներկայացնել որպես բանակցությունների «կողմ»»,- ասել է Ասադովը խորհրդարանի նիստի ժամանակ:

«Trend»-ը հիշեցնում է, որ ավելի վաղ Ադրբեջանի ԱԳՆ-ն հայտարարություն էր տարածել, որ պաշտոնական Բաքուն կարող է բարձրացնել Ջեյմս Ուորլիքի՝ որպես ԵԱՀԿ Մինսկի խմբի համանախագահի մանդատի հանձնման հարցը:

Նշենք, որ մարտի 24-ին ԵԱՀԿ Մինսկի խմբի ԱՄՆ համանախագահ Ջեյմա Ուորլիքը իր «Twitter»-ի էջում գրել էր. «Ինձ այսօր ուղղեցին. Հակամարտությունը Լեռնային Ղարաբաղի և Ադրբեջանի միջև է»:

Ավելի վաղ Ուորլիքը արդեն հայտարարել էր, որ «ժամանակն է, որ Ղարաբաղը իր մասնակցությունն ունենա բանակցություններին»:

Նախորդիվ`

Ադրբեջանի ոստիկանապետ. Ես հայ կնոջ կյանքին վերջ կտամ, արյունն էլ կխմեմ