Հովիկ Աբրահամյանի արձագանքը Գագիկ Ծառուկյանի հայտարարությանը

Քաղաքական 18:57 06/05/2014

Հովիկ Աբրահամյանի արձագանքը Գագիկ Ծառուկյանի հայտարարությանը

Եթե Գագիկ Ծառուկյանը հակադարձել է ՀՀԿ խոսնակի հայտարարությանը, ապա ցավով պետք է արձանագրվեմ, որ այդ հայտարարության իմաստը սխալ է ընկալվել: ՀՀ վարչապետ Հովիկ Աբրահամյանն այսպես մեկնաբանեց ԲՀԿ նախագահ Գագիկ Ծառուկյանի այսօր արած հայտարարությունը ՝ նշելով, որ Էդուարդ Շարմազանովի հայտարարությունն ուղղված չի եղել որևէ այլ կուսակցության, հատկապես ԲՀԿ-ի դեմ:

Panorama.am-ը վարչապետ, ՀՀԿ փոխնախագահ Հովիկ Աբրահամյանից հետաքրքրվեց, թե արդյո՞ք Հանրապետական կուսակցության կողմից արձագանք կլինի Գագիկ Ծառուկյանի այն հայտարարությանը, ըստ որի առաջիկա համապետական ընտրություններում հաղթանակն այլևս շրջանցելու է Մելիք-Ադամյան փողոցը:

Ի պատասխան Հովիկ Աբրահամյանը նշեց. «Անկեղծ ասած՝ դժվար է պատկերացնել, թե պարոն Ծառուկյանի հայտարարությունը ուղղակի հոխորտանք էր ՀՀԿ-ի հասցեին: Դժվար եմ դա պատկերացնում, հատկապես, որ յուրաքանչյուր քաղաքական ուժի խնդիրը ոչ թե այլոց քարկոծելն է, այլ սեփական ծրագրերով ու գործունեությամբ քաղաքական դերակատարման ավելացումը: Առավել հավանական եմ համարում, որ պարոն Ծառուկյանը հակադարձել է ՀՀԿ խոսնակի՝ օրեր առաջ արված հայտարարությանը: Եթե դա այդպես է, ապա ցավով պետք է արձանագրեմ, որ այդ հայտարարության իմաստը սխալ է ընկալվել. այն որևէ այլ կուսակցության դեմ, հատկապես ԲՀԿ-ի դեմ, որևէ երանգ չի պարունակել և վերաբերել է Հանրապետական կուսակցության ինստիտուցիոնալ դերակատարությանը: Կարծում եմ՝ այս մասին մենք դեռ առիթներ ունենալու ենք շատ ավելի հանգամանալից խոսելու»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: