Համբարյան. ԼՂ հարցում ԱՄՆ-ի վարած քաղաքականությունը պետք է համապատասխանի ամերիկյան արժեքներին
Ամերիկայի Հայ դատի հանձնախմբի (ANCA) գործադիր տնօրեն Արամ Համբարյանը հայտարարել է, որ ԼՂ հարցում ԱՄՆ-ի վարած քաղաքականությունը պետք է համապատասխանի ամերիկյան արժեքներին: Այս մասին տեղեկանում ենք Ամերիկայի Հայ Դատի գրասենյակի «Facebook»-յան էջից:
ԱՄՆ-ի Հայ դատի հանձնախմբի (ANCA) գործադիր տնօրեն Արամ Համբարյանն ընդգծել է Միացյալ Նահանգների վարած քաղաքականության ու ամերիկյան արժեքների համընկնման կարևորությունը։
«Լեռնային Ղարաբաղի վերաբերյալ Պետդեպի վարած քաղաքականությունը պետք է հավատարիմ լինի ազատության ու ժողովրդավարության համամարդկային արժեքներին։ Մեր անկախության ձեռք բերումից ի վեր, ամերիկացիները մշտապես եղել են ազատության գաղափարի կողմնակիցը՝ մերժելով իրենց, և այլ ազատ ժողովուրդների վրա օտարների իշխանությունը։ Լեռնային Ղարաբաղի Հանրապետության անկախությունը, ինչպես և ԱՄՆ-ինը, օտար բռնապետությունից ու ագրեսիայից ազատվելու ժողովրդավար ինքնորոշման արդյունք է: Մենք արդարացիորեն տոնում և աջակցում ենք մարդկային ոգու այս մեծ հաղթանակը»,-նշել է Համբարյանը:
Այնուհետ աղբյուրը հիշեցնում է, որ ԵԱՀԿ Մինսկի խմբի ամերիկացի համանախագահ Ջեյմս Ուորլիքը Հանուն խաղաղության Քարնեգի հիմնադրամի կազմակերպած կլոր սեղանի շուրջ այսօր պատրաստվում է ԼՂ-ի վերաբերյալ հայտարարությամբ հանդես գալ։ Այդ հայտարարությունը համընկնում է ԼՂ հակամարտության հրադադարի կնքման 20-ամյակին։
Նախորդիվ՝
Ջ. Ուորլիքը վաղը կհնչեցնի ԼՂ հակամարտության վերաբերյալ ամերիկյան կողմի հայտարարությունը