Ձեր վստահելի աղբյուրը

«Բոլորովին չեմ կիսում Է.Շարմազանովի հայտարարության առիթով հնչեցված այն բազմաթիվ էպիտետները, սթրեսի մեջ ընկած մարդկանց էմոցիաները, այլ ընդամենը կոչ եմ անում ճիշտ հասկանալ և ըմբռնել հայտարարության միտքը, ռեալ նայել կյանքին, ոչ թե հայտարարության բառերն ու բառակապակցությունները այս կամ այն ձևով տեղադրելով՝ ըստ նպատակահարմարության մեկնաբանել»,- Panorama.am-ի հետ զրույցում ասաց ԱԺ ՀՀԿ-ական փոխնախագահ Հերմինե Նաղդալյանը:

Վերջինս նշեց, որ պետք է ընդամենը նայել շուրջը և տեսնել ՀՀԿ-ի ռեալ դերակատարությունը երկրի կյանքում, իսկ Է.Շարմազանովի հայտարարությունը իր բովանդակությամբ, նախևառաջ, վերաբերում էր ՀՀԿ քաղաքական դերակատարությանը՝ երեկ, այսօր և վաղը:

«Հանրապետականը, լինելով երկրի ամենամասայական կուսակցությունը, ամենամարտունակ քաղաքական թիմը հսկայական փորձառություն ձեռք բերեց այս տարիների ընթացքում, թիմ, որն աշխատեց և աշխատում է բոլոր ոլորտներում` և՛ գործադիրում, և՛ օրենսդիրում, և՛ ՏԻՄ-երում, թիմ, որն այսօր միակն է՝ ներկայացված շրջաններում, գյուղերում ու քաղաքներում, որտեղ ռեալ մարդիկ են ներգրավված, ահա այդ դերակատարության և այդ մարդկանց և նրանց աշխատանքների մասին է խոսքը: «Մելիք Ադամյանը» նշվում է որպես ուղղակի այդ մարդկանց գործունեությունը կոորդինացնող կենտրոն, ոչ թե վայր, որտեղից թույլտվություններ կամ այսպես ասած՝ «ադաբրյամս» են ստանում: Միանշանակ է մեկ բան՝ կուսակցությունը, որն այդպիսի ներուժ ունի, այդպիսի փորձառություն և նման դերակատարություն, անկախ նրանից, թե վաղն ով կլինի իշխանություն, ով ընդդիմություն, իր այդ քաղաքական դերակատարությունը պահելու է որպես ամենաէականը երկրում»,- նշեց ԱԺ փոխնախագահը:

Հ.Նաղդալյանը «ժողովրդավարության մասին հուզված-մտահոգ խոսացողներին» հիշեցնում է, որ ՀՀԿ-ն անցյալ տարիների ընթացքում ժողովրդավարության տարածման և զարգացման համար ամենամեծ ներդրում ունեցած կուսակցությունն է, և դա ապացուցված է ոչ թե խոսքով, այլ ռեալ գործերով. «Այդ առնչությամբ հիշեցնեմ՝ նույնիսկ ունենալով ամենաէական մեծամասնությունը, մենք կողմնակից ենք եղել քաղաքական դաշտում քաղաքական կուսակցությունների դերակատարության բարձրացմանն ու ընդլայնմանը, կոալիցիոն կամ համաձայնության գաղափարների ոգով կառավարմանը և ռեալ համագործակցության առաջարկներ ենք արել և իրացրել: Նույնիսկ այն ժամանակ, երբ կոալիցիաների բացարձակ անհրաժեշտությունը չունեինք, քանզի բավարար էր կուսակցության ամրության պաշարն ու ներուժը, ինքներս գնացել ենք կոալիցիաներ ստեղծելու ճանապարհով՝ նրանցում մեծ տեղ տալով կուսակցությունների, որոնք թեկուզ փոքր դերակատարություն ունեին, բայց իրենց գաղափարների մեջ ռացիոնալ մասնիկ ու ներդաշնակություն էինք տեսնում մեր սկզբունքներին: Նրանց ընդունելի էինք համարում և դաշտում գործելու տեղ տալիս, գործելու նիշա ստեղծում, որ իրենք նույնպես կարողանան արտահայտվեն և կայանան: Քաղաքական կուսակցությունների դերակատարության բարձրացման իմաստով որևէ կուսակցություն այնքան բան չի արել, որքան ՀՀԿ-ն, մանավանդ հաշվի առնելով, որ լիիրավ կարող էր բացարձակապես միայնակ, մոնոպոլ պայմաններում կառավարել և գործել, բայց գիտակցումը, որ քաղաքական ուժերի մասնակցությունն ու դերակատարությունն է կարևոր, մեզ դրդել է այդ քայլերին»:

Մեր զրուցակիցն ավելացրեց` այսօր այս ամենը չգիտակցել կամ անտեսել պարզապես կեղծ դիրքավորում է, կեղծ աղմուկ է, արհեստական պոզա, որը չի բխում ոչ Էդուարդ Շարմազանովի հայտարարության ոգուց, ոչ էլ Հանրապետականի երկարամյա գործունեությունից:

Ժողովրդավարության հենց այս կոնտեքստում է նա դիտարկում նաև Սահմանադրական բարեփոխումների առիթով՝ ՀՀԿ ղեկավար, ՀՀ նախագահ Սերժ Սարգսյանի՝ նախագահի և վարչապետի պաշտոնում այլևս չառաջադրվելու մասին հնչեցրած հայտարարությունը:

«Կարծում եմ այդ հայտարարությունը իրականում շատ բարձր և էական արժեք ունի, որը կայանում է առաջինը նրանում, որ ՀՀ նախագահը հստակ և պարզորոշ, ընդ որում՝ գալիք ընտրություններից երեք տարի առաջ, բարձրաձայնում է հետագա պլանների շուրջ իր սկզբունքների մասին՝ ազնվորեն, բացարձակ ժողովրդավարական դիրքերից: Նախագահը հստակորեն հայտարարում է, որ որևէ մանիպուլյացիայի, որևէ փոփոխության, իր անձը այս կամ այն ճանապարհներով նորից առաջ բերելու տարբերակին գնացող չէ: Այդ հայտարարության երկրորդ արժեքավոր կողմն այն է, որ Հայաստանի նման երկրում, որտեղ ժողովրդավարությունը կայացնելու համար դեռևս ճանապարհ ունի անցնելու, որտեղ բազմաթիվ անգամներ քննարկվում են երեք նախագահների, անցյալի և ներկայի, առաջնորդների հետագա դերակատարության խնդիրները, շատ կարևոր է, որ գործող նախագահը պլանկան այսքան բարձր է դնում և սա այնպիսի պլանկա է, որից ներքև իջնել, նահանջել հնարավոր չէ: Եվ այն շեշտակի դրվում է ոչ միայն իր անձի համար, այլև ընդհանրապես երկրի հետագա զարգացման համար»,- հավելեց Հ.Նաղդալյանը: