Ձեր վստահելի աղբյուրը

Հոգեկան առողջության պահպանման և բարելավման 2014-2019 թվականների հայեցակարգի հիմնական խնդիրը նմանատիպ հիվանդություններով մարդկանց վրայից խարանը հանելն է, ու իրավունքները պաշտպանելը: Այսօր լրագրողների հետ հանդիպման ժամանակ ասաց ՀՀ առողջապահության նախարարության աշխատակազմի ղեկավար Սուրեն Քրմոյանը:

Ըստ նրա` առաջնային է հոգեկան առողջության խնդիրների կանխարգելումը և այդ մարդկանց ինտեգրումը հասարակության մեջ:

Հայկական հոգեբուժական ասոցիացիայի նախագահ Արմեն Սողոյանն անդրադառնալով հայեցակարգին նշեց. «2019թ.-ին մենք կունենանք հոգեկան առողջության ոլորտում այնպիսի առաջընթաց, որը կգոհացնի, թե մեզ և թե հոգեկան առողջության խնդիրներ ունեցող անձանց ընտանիքներին: Որևէ մեկը ապահովագրված չէ հոգեկան խանգարում ունենալուց, պետք է փոխել վերաբերմունքը այդ մարդկանց հանդեպ»:

Նա նաև տեղեկացրեց, որ այսօր հանրապետությունում գրանցվեած է հոգեկան խնդիրներ ունեցող 46 հազար մարդ:

Հանդիպմանը ներկա հոգեկան առողջության գծով միջազգային փորձագետ Ժոլտ Բուգարսկին նշեց, որ շատ այլ երկրներում 10-15 տարի է պահանջվում առողջության պահպանման և բարելավման խնդիրները քննարկելու համար, սակայն Հայաստանում պետական ու հասարակական կազմակերպությունների համատեղ ուժերով շատ արագ քննարկվեց, մշակվեց ու ընդունվեց այս կարևորագույն հայեցակարգը: Նա խորհուրդ տվեց հոգեկան խանգարում ունեցող մարդկանց չմեկուսացնել հեռու շրջաններում, այլ օգնություն ցուցաբերել հենց իրենց համայնքներում:

«Բազմաթիվ երկրներում հոգեկան խնդիրներ ունեցող մարդիկ աշխատում են, և նրանց շատ քիչ մասն է հիվանդությունը ձեռք բերել գենետիկ ճանապարհով»,-շեշտեց Բուգարսկին:

Սուրեն Քրմոյանը նույնպես կարևորեց հիվանդին ընտանիքում և համայնքում պահելը`շարունակելով նրանց աջակցել տանը, քանի որ այդ դեպքում հասարակության վերաբերմունքն էլ նրանց նկատմամբ կփոխվի: