Ղարաբաղը աշխարհաքաղաքական պայքարի համար փորձադաշտ չէ. Արմեն Աշոտյան
Լրագրողական, քաղաքացիական ու հասարակական անհանգստություններն ու մտահոգությունները պետք է վերաբերեին ոչ միայն ՀՀ-ում ՌԴ դեսպանի երեկվա հայտարարությանը, թե պետք է չեզոքացնել երկու երկրների ու ժողովուրդների միջև սեպ խրող կազմակերպություններին, այլև ԱՄՆ դեսպանի հայտարարությանը, որն էլ ավելի մտահոգիչ է: Այս մասին այսօր լրագրողների հետ ճեպազրույցում ասաց ՀՀ կրթության և գիտության նախարար, ՀՀԿ փոխնախագահ Արմեն Աշոտյանը:
Նրա խոսքերով` Ջոն Հեֆերնը ԵԱՀԿ ՄԽ ամերիկացի համանախագահ Ուորլիքի ելույթից հետո ամբողջ տեքստից թվիթ էր արել միայն այն հատվածը, որը վերաբերում էր ԼՂՀ` Սահմանադրությամբ ամրագրված տարածքներին:
«Կարծում եմ` ոչ պակաս, եթե չասեմ` շատ ավելի բուռն արձագանք պետք է առաջացներ»,- ասաց Ա.Աշոտյանը:
Անդրադառնալով երկու հայտարարություններին, նախարարը նշեց, որ ՌԴ դեսպանի հարցազրույցին ՀՀ արտաքին գործերի նախարարությունից արձագանք եղել է: Ըստ նրա` ինքն էլ է այն կարծիքին, որ Հայաստանում ՀԿ-ները գնալով ավելի մեծ դեր են ունենում, այդ կազմակերպությունների մի զգալի մասը իրականում պետականամետ ու հայաստանամետ է:
«Ակնհայտ է նաև, որ կան տարբեր կազմակերպություններ, որոնք առաջնորդվում են` «ով վճարում է, նա պատվիրում է երաժշտությունը» սկզբունքով: Սակայն օրենսդրական դաշտի խախտումներով գործող ՀԿ ես այս պահին Հայաստանում չգիտեմ: Հետևաբար, անգամ եթե քաղաքական տարաձայնություններ են լինում քաղաքացիական հասարակության տարբեր ինստիտուտների շրջանակներում, այն չի կարող հանգեցնել նրանց գործունեության օրենսդրական մեկնաբանությանը: Երկրորդ` հայ և ռուս ժողովուրդների միջև ոչ ոք չի կարող սեպ խրել, և չի հաջողվի որևէ ՀԿ-ի, անգամ` ամենամեծ այլատեսակ գրանտով դա անել»,- ասաց Արմեն Աշոտյանը:
Անդրադառնալով ամերիկյան կողմի վերջին հայտարարությանը, նախարարն արտահայտեց իր անձնական կարծիքը. «Թեպետ Հեֆերնն իմ գործընկերն է, ինչպես կասեն հռոմեացիք` ամիկուս Հեֆերն, բայց ճշմարտությունն ավելի թանկ է: Հայաստանի իշխանության և ընդդիմության թիվ մեկ խնդիրն այսօր պետք է լինի, որպեսզի թույլ չտանք Հայաստանը, մասնավորապես` ԼՂՀ հակամարտությունը դարձնել գլոբալ աշխարհաքաղաքական պայքարի ինչ-որ նոր օջախ և Ռուսաստան-ԱՄՆ կամ Ռուսաստան-Արևմուտք հարաբերությունների ներկա սրված փուլը Ուկրաինայի առիթով չպետք է թույլ տանք, որպեսզի տարածվի Ղարաբաղի վրա»:
Ա.Աշոտյանը մեկ անգամ ևս շեշետեց, որ Ղարաբաղը աշխարհաքաղաքական պայքարի համար փորձադաշտ չէ, Ղարաբաղի ժողովուրդն իր ինքնորոշման իրավունքի համար է պայքարում, և այդ իրավունքի իրագործումը կախված չէ անգամ գերտերությունների` տվյալ ժամանակահատվածի քաղաքական շահերից:
Նշենք, որ մայիսի 7-ին Խաղաղության Քարնեգի միջազգային հիմնադրամում ԵԱՀԿ Մինսկի խմբի ԱՄՆ-ի համանախագահ Ջեյմս Ուորլիքը ներկայացրել էր ԼՂ հակամարտության կարգավորման Խաղաղության համաձայնագիրը, որը բաղկացած է 6 կետից:
Ամերիկացի համանախագահն իր ելույթում թվարկել էր վեց տարր` «տևական խաղաղություն» ապահովելու համար: Մասնավորապես այդ տարրերից երրորդը վերաբերում էր ազատագրված տարածքներին, ինչի վերաբերյալ նա ասել էր. «Լեռնային Ղարաբաղը շրջապատող գրավյալ տարածքները պետք է վերադարձվեն Ադրբեջանի վերահսկողությանը: Ադրբեջանի ինքնիշխանության նկատմամբ հարգանքի բացակայության պայմաններում կարգավորում չի կարող լինել և Ադրբեջանի ինքնիշխանության ճանաչումն այդ տարածքների նկատմամբ պետք է վերականգնվի»:
Հարակից հրապարակումներ`
Եթե Արցախին մի բան պատահի, մենք անկասկած բոլորս այնտեղ ենք լինելու. Սեյրան Օհանյան
Ուզըմ են, մենք էլ պտի չտանք. Մանվել Գրիգորյանը` Ուորլիքի հայտարարության մասին
Վերադարձ նախկին սահմաններին չի լինի. ԼՂՀ-ից արձագանքել են Ուորլիքին
Ջ. Ուորլիքը Լեռնային Ղարաբաղի հակամարտության կարգավորման հնարավոր ուղիների մասին
Ժիրայր Սեֆիլյանը՝ Ուորլիքի հայտարարության մասին. Թող չհամարձակվեն խոսքից գործի անցնել