Ձեր վստահելի աղբյուրը

«Մենք կցանկանայինք, որպեսզի ֆրանսիական կապիտալը ընդլայնվեր Հայաստանում, քանի որ այսօր Հայաստանը դրա կարիքն ունի, իսկ սա ֆրանսիական բիզնեսի համար փոքր, բայց լավ հնարավորություն է»: Այս մասին այսօր Հայաստան- Ֆրանսիա տնտեսական համաժողովի շրջանակներում կազմակերպված «Առևտուր և ծառայություններ» թեմայով կլոր-սեղանի բացմանն ասաց ՀՀ էկոնոմիկայի նախարար Կարեն Ճշմարիտյանը:

Էկոնոմիկայի նախարարի խոսքերով` նման ձևաչափի միջոցառումները առաջնահերթ նշանակություն ունեն ներդրումային և գործարար ոլորտներում հայ-ֆրանսիական համագործակցության ընդլայնման համար: Նման հանդիպումները, ըստ նրա, լավ հնարավորություն են գործարարների համար` ընդլայնելու առկա տնտեսական համագործակցությունը, ինչպես նաև ուղենշելու համագործակցության նոր ոլորտներ:

«Անընդհատ պատերազմի սպառնալիքները, տարիներ շարունակ փակ սահմանները` ստիպել ու ստիպում են անբնական մեծ ջանքեր գործադրել զարգանալու և ժամանակակից պետություն կառուցելու համար: Գործելով այլ պետությունների համար անհամադրելի բարդ պայմաններում, Հայաստանը կարողացել է որոշակի հաջողություներ գրանցել»,- ընդգծեց Կ.Ճշմարիտյանը:

Ներկայացնելով 2013թ-ին Հայասատնի տնտեսական ցուցանիշները, նա նշեց, որ նախորդ տարի ՀՆԱ-ի իրական աճը 2012թ-ի համեմատ կազմել է 3,5%, ՀՆԱ-ի կառուցվածքում արդյունաբերության մասնաբաժինը կազմել է 17,2%, գյուղատնտեսությանը` 19,3 %, շինարարությանը` 10,3%, առևտուրը` 12,8%, ծառայությունները` 3,2%, զուտ հարկերը` 11,8%:

Ինչ վերաբերում է արդյունաբերական արտադրանքի ծավալին, ապա այն 2013թ-ին կազմել է 1 տրիլիոն 240 մլրդ դրամ, իսկ իրական աճը` 6,8%: Արտաքին առևտրաշրջանառությունը կազմել է մոտ 6 մլրդ դոլար` աճելով 5,6 տոկոս, որից արտահանումը` 1,5 մլրդ դոլար (աճը` 7,2%), իսկ ներմուծումը` 4,5 մլրդ դոլար (աճը` 5,1 %): Սպառողական գների ինդեքսը նշված ժամանակահատվածում կազմել է 105,8 %:

Կ.Ճշմարիտյանը նշեց, որ Հայաստանի և Ֆրանսիայի միջև վաղեմի և փոխշահավետ համագործակցության մասին են վկայում մինչ օրս Հայաստանի տնտեսության իրական հատվածում Ֆրանսիայից կատարած ներդրումների ծավալները, որոնք կազմում են 1,1 մլրդ դոլար, այդ թվում` ուղղակի ներդրումները` շուրջ 1 մլրդ դոլար:

«Մեր երկկողմ տնտեսական հարաբերությունները զարգացման լուրջ ներուժ են պարունակում: Հայաստանում Ֆրանսիան ներդրումների ծավալով երկրորդ երկիրն է, ավելի քան 100 ձեռնարկություն է գործում Հայաստանում, բայց կարելի է ավելի զարգացնել այս հարաբերությունները»,- ասաց նախարարը:

Նա նաև հավելեց, որ երկու երկրների միջև բարձր փոխվստահության և երկուստեք շահավետ համագործակցության մասին են վկայում, ինչպես Հայաստանում ֆրանսիական կապիտալի մասնակցությամբ ձեռնարկությունների մեծ քանակը, այնպես էլ հանրահայտ ընկերությունների ներկայությունը տարբեր բնագավառներում` «Պեռնո Ռիկար Արմենիա» ընկերությունը, «Օրանժ Արմենիա» և «Ալկատել» ընկերությունները, ֆինանսական ոլորտում` Ակբա-կրեդիտ ագրիկոլ բանկը և այլն:

Ըստ Կ.Ճշմարիտյանի` ՀՀ կառավարությունը առաջնորդվելով երկրի տնտեսության մրցունակության բարձրացման և շարունակական տնտեսական աճի ապահովման հրամայականներով, ընդունել է գիտելիքի վրա հիմնված տնտեսություն կառուցելու անհրաժեշտությունը, և նախաձեռնել է իրականացնել արտահանման վրա ուղղվածություն ունեցող արդյունաբերական քաղաքականություն:

«Գիտելիքը այն արժեքն է, որը հնարավոր չէ ոչ շրջափակել, ոչ սահմաններով կամ պատերազմներով կանգնեցնել նրա զարգացումն ու տարածումը»,- նշեց նա:

Անդրադառնալով տեղեկատվական տեխնոլոգիաների ոլորտին, էկոնոմիկայի նախարարն ասաց, որ վերջին տարիներին Հայաստանը արձանագրել է զգալի առաջընթաց ՏՏ ոլորտում և ունի բոլոր անհրաժեշտ նախադրյալներն ու ներուժը դառնալու տարածաշրջանային կենտրոն և կարևոր դերակատար: Այս ոլորտում, ըստ նրա, իրականացվում են մի շարք ծրագրեր, մասնավորապես, կառավարության կողմից մշակվել և արդեն իսկ ԱԺ է ներկայացվել ՏՏ ոլորտի զարգացմանն ուղղված օրենսդրական փաթեթը, որով նախատեսվում է մի շարք արտոնությունների տրամադրում: Սա աննախադեպ նախաձեռնություն է և ոլորտի զարգացման լուրջ խթան կարող է հանդիսանալ:

Ինովացիոն ենթակառուցվածքների ձևավորման ուղղությամբ ևս իրականացվում են մի շարք նախաձեռնություններ, մասնավորապես, ԱՄՆ Սիլիկոնյան հովտում բացվել է Հայաստանի տեղեկատվական և բարձր տեխնոլոգիաների ներկայացուցչական գրասենյակը, որի նպատակն է խթանել Հայաստանի և ԱՄՆ ընկերությունների մասնագետների միջև կապերի ստեղծումը, վաճառքներ և օտարերկյա ներդրումների ուղղակի ծավալների ավելացումը: Նշեց նաև, որ 2013թ-ին Հայաստանում հիմնվել է առաջին Վենչուրային հիմնադրամը, որը կխթանի ոլորտում նորարարական գաղափարների գեներացման ու սկսնակ ընկերությունների ձևավորմանը:

Ինչ վերաբերում է արդյունաբերական քաղաքականությանը, Կ. Ճշմարիտյանի խոսքերով` դրա հիմքում ընկած է արտահանման ներուժ ունեցող հեռանկարային ճյուղերի աջակցման միջոցով տնտեսության արտահանելի ընդլայնումը: Նշված նպատակի իրագործման համար մշակվել է և կառավարության հավանությանն է արժանացել ՀՀ-ում արտահանմանն ուղղված արդյունաբերական քաղաքականության ռազմավարությունը:

«Նպատակ ունենալով ներդրումային քաղաքականության արդյունավետ իրականացումը, Հայաստանը հայտարարել և վարում է բաց դռների քաղաքականություն»,- ասաց նա:

Վերջին տարիներին ներդրումային և գործարար միջավայրերը բարելավելու նպատակով ևս իրականացվել են մի շարք բարեփոխումներ, որոնց արդյունքները, ըստ Կ.Ճշմարիտյանի, ակնհայտ են` ՀԲ-ի կողմից հրապարակվող «Գործարարությամբ զբաղվելը» զեկույցի շրջանակներում: Վերջին տարվա արդյունքներով` Հայաստանի դիրքը բարելավվել է 18 կետով և այժմ զբաղեցնում է 37-րդ տեղը աշխարհում:

Նախախարի խոսքերով` կառավարությունը կարևորում է նաև մասնավոր հատվածի հետ համագործակցությունը և տնտեսական քաղաքականության մշակման մեջ մասնավոր հատվածի ներգրավածության բարձրացումը:

Կ.Ճմարիտյանը ֆրանսիացի գործարարների ուշադրությունը հրավիրեց Հայաստանում ստեղծված Ազատ տնտեսական գոտիներին, ինչը կոնկրետ համագործակցության լայն հնարավորություններ է ընձեռում: Նա ֆրանսիացի գործարարներին առաջարկեց քննարկել ազատ տնտեսական գոտիներում հիմնված ոսկերչության, ադամանդագործության և մանածագործության, այլընտրանքային էներգետիկայի, արտադրական դիզայնի, հեռահաղորդակցության ոլորտներում գործող ֆրանսիական ընկերությունների մասնակցության հարցը:

Կ.Ճշմարիտյանը համոզմունք հայտնեց, որ այս համաժողովը կնպաստի նոր գործարար կապերի հաստատմանը և շարունակական փոխշահավետ համագործակցության խրախուսմանը: 

Նշենք, որ համաժողովը կազմակերպել է Զարգացման հայկական գործակալությունը ՀՀ-ում Ֆրանսիայի դեսպանության հետ համատեղ: Համաժողովը կազմակերպվել է Ֆրանսիայի նախագահ Ֆրանսուա Օլանդի Հայաստան կատարած պետական այցի շրջանակներում: Երկօրյա համաժողովի ընթացքում ֆրանսիացի գործարարները կքննարկեն տնտեսական համագործակցության շրջանակներն ընդլայնելու հնարավոր ուղիները: