Ձեր վստահելի աղբյուրը

Մեր ազգի համար կարևորագույն սոցիալական ինստիտուտ հանդիսացող ընտանիքը կանգնած է լուրջ մարտահրավերների առաջ: Այսօր լրագրողների հետ հանդիպման ժամանակ խոսելով մայիսի 15-ի` Ընտանիքի միջազգային օրվա մասին` նման տեսակետ հայտնեց «Սոցիոմետր» անկախ սոցիոլոգիական կենտրոնի տնօրեն Ահարոն Ադիբեկյանը:

«Հայաստանում աճել է ամուսնալուծությունների, միայնակ մայրերի, առանց հոր խնամքի մեծացող երեխաների թիվը, ինչն ուժեղ հարված է ընտանիքին»,- ընդգծեց սոցիոլոգը:

Ըստ նրա պետության դերը մեծ պետք է լինի երիտասարդ ընտանիքների կայացման հարցում. «Վերջին 20 տարվա ուսումնասիրությունները ցույց են տալիս, որ թմրամոլների, հարբեցողների, հանցագործների մեծամասնությունը կամ չեն ունեցել հայր, կամ անբարենպաստ ընտանիքում են մեծացել»:

Սոցիոլոգի ներկայացրած տվյալներով` մեզ մոտ 1 միլիոն 250 հազար կանանց կեսն ամուսնացած է, իսկ մյուս կեսը բաժանվածներն են, այրիացածները և ընդհանրապես չամուսնացածները: Կանանց 750 հազարն ամուսնացած է, 50 հազարը` բաժանված, 182 հազարը` այրի, իսկ 320 հազար կին երբեք ամուսնացած չի եղել:

Ադիբեկյանը բաժանվել ցանկացող ընտանիքներին խորհուրդ տվեց դիմել հոգեբանի:

«Փորձը ցույց է տալիս, որ հոգեբանների դիմած բաժանվողների 80 տոկոսը հրաժարվում է այդ մտքից: Շատ երեխա ունեցող ամուսիններն ավելի քիչ են հակված ամուսնալուծության: Հայաստանում տղամարդկանց 63 տոկոսն է ամուսնացած, իսկ կանանց` 58 տոկոսը: Տղամարդիկ բաժանվելուց հետո ավելի հաճախ են ամուսնանում, քան կանայք»,- նշեց բանախոսը: