Ձեր վստահելի աղբյուրը

Մայր աթոռ սուրբ Էջմիածնի «Հայեցակարգային» գրասենյակի ղեկավար Բագրատ եպիսկոպոս Գալստանյանից «Առավոտ»-ը հետաքրքրվել է՝ այն, որ Եվրատեսիլի այս տարվա մրցույթում հաղթեց տրանսվեստիտ Կոնչիտան, դա աշխարհի վերջը չի՞ խորհրդանշում:

Նա պատասխանել է. «Դա այսօրվա Արևմուտքի հայելին է, ուրիշ ոչինչ: Այսօր բացահայտ կերպով քարոզում են դա, այդպիսի հեղինակավոր բեմերից, ըստ էության, քարոզչություն է դա: Մինչև հիմա օրենքներով էր խոսվում, մատուցվում էր մարդկությանը՝ որպես ընդունելի գաղափար: Առանցքայինն այդ ամեն ինչի մեջ այն է, որ այսօր մեղքը դառնում է սովորական երևույթ: Մարդը կարող է հանգիստ և «խաղաղ» այդ մեղքի մեջ ապրել»:

Թերթի հարցին՝ Հայաստանում էլ կան այդպիսի Կոնչիտաներ, եկեղեցին ինչպե՞ս է պայքարում նրանց դեմ՝ սրբազանը պատասխանել է. «Այդ երևույթը ոչ միայն այսօրվա, այլև հազարամյակների երևույթ է: Հայտնի սոդոմականությունը կա, դրանից հետո տարբեր միջավայրերում արտահայտված կա: Եկեղեցու դատապարտումը մեղք է, բայց մենք ամեն ինչ, ամեն ջանք ցանկանում ենք ներդնել, որպեսզի մարդիկ կարողանան այդ կյանքի ճանապարհից դուրս գան, վերադառնան դեպի մարդկություն»:

Հարցին՝ այսինքն Դուք դա հիվանդությո՞ւն եք դիտարկում՝ նա պատասխանեց. «Իմ և շատ շատերի բնութագրմամբ՝ դա հիվանդություն է և կարծում եմ՝ մեղք է»: