Ձեր վստահելի աղբյուրը

Ազգային Ժողովը քիչ առաջ երկրորդ ընթերցմամբ սկսեց քննարկել «Կուտակային կենսաթոշակի մասին» օրենքում փոփոխություն կատարելու մասին կառավարության ներկայացրած օրինագիծը:

Պատգամավորներին ներկայացնելով օրինագիծը` ՀՀ Աշխատանքի և սոցիալական հարցերի նախարար Արտեմ Ասատրյանը տեղեկացրեց, որ այս փուլում «օրենքի ընդունմամբ կստեղծենք մի միջավայր, որը թույլ կտա համատեղ ուժերով ապահովել կենսաթոշակային բարեփոխումները»:

Դիմելով նախարարին ՀԱԿ խմբակցության անդամ Գագիկ Ջհանգիրյանը նախ նշեց, որ ՍԴ որոշումից հետո ստեղծվել է հակասական իրավիճակ և դա ապացուցում է նաև այն հանգամանքը, որ ՀԱԿ-ը հենց այսօր նամակ է ստացել բուհերից մեկի դասախոսներից, որոնք նշել են, որ պարտադիրը այս պահին էլ նրանցից գանձում են: Այսինքն` ՍԴ որոշումը կա, բայց պարտադիրը դեռ խստիվ կիրառում են:

Սակայն ուշադրություն դարձրեց մեկ այլ հանգամանքի վրա. «Եթե մենք ճանաչում ենք օրենքն անվավեր, ապա այդ անվավեր հայտարարվածը չի կարող տարաժամկետվել, քանի որ անվավեր նշանակում է գոյություն չունեցող: Բայց քանի որ նույն օրենքի 7-րդ կետում էլ գրված է, որ տարաժամկետվում է, ապա այս իրավիճակի հիմնական մեղավորը մեր փառապանծ ՍԴ-ն է, որը ցանկացել է, ինչպես հայտնի ասացվածքում է ասվում «և կույս մնալ, և հաճույք ստանալ»: Կառավարությունը անվավերի ճանաչման դրույթը թողած հենվում է միայն հակասահմանադրականի ու տարաժամկետության վրա, իսկ ընդդիմությունն էլ հենվում է անվավերի վրա ու պնդում է` եթե անվավեր է, այսինքն` գոյություն չունի, ապա ի՞նչը տարաժամկետես»:

«Ուղղակի կոչ եմ անում, որ մեզանից յուրաքանչյուրը չտեսնի այս որոշման մեջ այն, ինչ իրեն ձեռնտու է. այսքան բան»,-եզրափակեց Ջհանգիրյանը :

Հիշեցնենք, նախօրեին ԱԺ-ն առաջին ընթերցմամբ ընդունեց «Կուտակային կենսաթոշակի մասին» օրենքում փոփոխություն կատարելու օրինագիծը, որին ՀԱԿ-ը դեմ քվեարկեց:

Նախորդող հրապարակում`

«Կուտակայինն» ընդունվեց