Ձեր վստահելի աղբյուրը

Ինչպես արդեն տեղեկացրել ենք ՀՀ կառավարությունը նախատեսում է վաղը կայանալիք նիստում հավանություն տալ «Գյումրու տեխնոպարկ» ՓԲԸ-ի լուծարմանը, որի բաժնետոմսերի 49,02 տոկոսը պատկանում է ՀՀ կառավարությանը, իսկ մնացած 50,98 տոկոսը «Անալիտսարք-1» ԲԲԸ-ին:

«Գյումրու տեխնոպարկ» ծրագիրն առավել հայտնի է, որպես նախկին վարչապետ Տիգրան Սարգսյանի կողմից իր պաշտոնավարման հենց սկզբում առաջ քաշած գաղափարներից մեկը: Ուստի, առաջին հայացքից թվում է, թե կառավարությունը որոշել է Տիգրան Սարգսյանի ծրագիրը լուծարել:

Սակայն, այսօր արդեն «Ինֆորմացիոն տեխնոլոգիաների ձեռնարկությունների միության» գործադիր տնօրեն Կարեն Վարդանյանը հայտարարեց, որ թյուրիմացություն է տեղի ունեցել։ Panorama.am-ի հետ զրույցում նա ասաց, որ սա ընդամենը անվանումների համընկնում է և, որ «Գյումրու տեխնոպարկ» ՓԲԸ-ն կապ չունի «Գյումրու տեխնոպարկ» ծրագրի հետ:

Մյուս կողմից անհավանական է, որ անվանումների նման համընկումը հենց այնպես, պատահաբար ստացված լիներ, ի վերջո հեղինակային իրավունքի խնդիր կարող էր առաջանալ: Ուստի, հարց է ծագում, իսկ ինչ պատմություն է թաքնված այս ամենի հիմքում:

Պարզվում է լուծարվողը՝ «Գյումրու տեխնոպարկ» ստեղծելու գաղափարի «հեղինակն» է: Մյուս կողմից էլ ճիշտ է, որ կապ չունի Տիգրան Սարգսյանի «Գյումրու տեխնոպարկի» հետ:

Այսպես, ՀՀ կառավարությունը դեռևս 2010 թվականի մարտի 11-ին կայացրել է թիվ 227-Ա որոշումը՝ «Նոր Ներդրումներ» ՓԲ ընկերությունը լուծարելու մասին: Այս ընկերությունը «Գյումրու տեխնոպարկ» ՓԲԸ-ում կառավարության բաժնեմասի սեփականատերն է եղել: Այլ կերպ ասած, «Գյումրու տեխնոպարկ» ՓԲԸ-ի բաժնեմասի 49 տոկոսը նախկինում պատկանել է «Նոր Ներդրումներ» ՓԲԸ-ին, որի 100 տոկոս սեփականատերը եղել է ՀՀ կառավարությունը:

2010 թվականի մարտի 11-ի թիվ 227-Ա որոշման կից տեղեկանքում , որը ներկայացված է եղել ՀՀ կառավարությանը, սևով սպիտակի վրա գրված է. «Գյումրի քաղաքում տեխնոպարկ ստեղծելու նպատակով «Նոր ներդրումներ» ՓԲԸ-ն ՀՀ առևտրի և տնտեսական զարգացման նախարարությանը ներկայացրել է հայեցակարգ, որն էլ ՀՀ առևտրի և տնտեսական զարգացման նախարարի 15.02.2005թ. «Գյումրի քաղաքում տեխնոպարկ ստեղծելու նախապատրաստական միջոցառումների մասին» թիվ 31-Ա հրամանով հավանության է արժանացել։ Հայեցակարգը ներկայացվել է ՀՀ կառավարության քննարկմանը և համաձայն ՀՀ կառավարության 2006թ. մարտի 2-ի նիստի թիվ 8 արձանագրության և նրա հավելվածի Գյումրու «Անալիտսարք-1» ՓԲԸ-ի արտադրական տարածքի վրա ստեղծվել է «Գյումրու տեխնոպարկ» ՓԲԸ-ն, որի հիմնադիրներն են համարվում Երևանի «Նոր ներդրումներ» ՓԲԸ-ն (իրավաբանական հասցեն` ք. Երևան, Մ. Խորենացու 26ա) 49% բաժնեմասով և Գյումրու «Անալիտսարք-1» ԲԲԸ-ն (ք. Գյումրի, Խրիմյան Հայրիկ 24) 51% բաժնեմասով»։

Այսինքն, ըստ այս տեղեկանքի, «Գյումրու տեխնոպարկի» գաղափարը դեռևս 2005-ին է ծնվել և դրա հեղինակը եղել է «Նոր Ներդրումներ» ՓԲԸ-ն: Ավելին, ըստ նույն տեղեկանքի. «ՀՀ Առևտրի և տնտեսական զարգացման նախարարի 17.07.2006թ. թիվ 158-Ա հրամանով հաստատվել է «Գյումրու տեխնոպարկ» ՓԲԸ-ի ստեղծման ծրագրի իրականացման միջոցառումների ցանկը, որով ընկերության կանանադրական կապիտալում «Նոր ներդրումներ» ՓԲԸ-ի կողմից կատարվել է 6.0 մլն. Դրամի ներդրում և 17.0 մլն. դրամի շինվերանորոգման աշխատանքներ»: Այսինքն, դեռևս 2006-ին ՀՀ կառավարությունը «Գյումրու տեխնոպարկի» գազափարն իրագործելու համար 23 միլիոն դրամ է հատկացրել, սակայն, հետագա ֆինանսավորման բացակայության պատճառով, ինչպես վերը նշված տեղեկանքում է գրված ««Գյումրու տեխնոպարկ» ՓԲԸ-ն չի կայացել»։

Ի դեպ, այդպես էլ անհասկանալի է մնում, որ եթե դեռևս 2010-ին ակնհայտ է եղել, որ «Գյումրու տեխնոպարկ» ՓԲԸ-ն չի կայացել, այն ինչու է շարունակել գոյություն ունենալ, քանի որ չգործող ընկերությունը այդպես արդեն անիմաստ տեղը պարտքեր է կուտակել: Կառավարության վաղվա նիստում ընդգրկված որոշման նախագծի կից տեղեկանքի համաձայն «Գյումրու տեխնոպարկ» ՓԲԸ-ի պարքերը կազմում են 22 միլիոն 622 հազար դրամ:

«Գյուրմու տեխնոպարկ» ծրագրի գլխավոր օպերատորը ներկայումս «Ձեռնարկությունների ինկուբատոր» հիմնադրամն է, որին այդ լիազորությունը տրվել է այս տարվա սկզբին՝ 2014 թվականի հունվարի 9-ին կառավարության ընդունած թիվ 13-Ն որոշմամբ՝ «Գլխավոր օպերատոր ճանաչելու, գույքի նվիրատվության և Հայաստանի Հանրապետության կառավարության 2010 թվականի սեպտեմբերի 16-ի թիվ 1203-Ն և Հայաստանի Հանրապետության կառավարության 2010 թվականի հոկտեմբերի 14-ի թիվ 1341-Ն որոշումներն ուժը կորցրած ճանաչելու մասին»:

Իսկ մինչ այդ Գյումրու տեխնոպարկ ծրագրի գլխավոր օպերատորը եղել է «Գյումրու տնտեսական զարգացման» հիմնադրամը:

Գյումրու տեխնոպարկ ծրագրին 2008 թվականից սկսած մինչև 2012 թվականը ներառյալ հատկացվել է 699 միլիոն 500 հազար դրամ՝ 2008-ին 80 միլիոն, 2009-ին 80 միլիոն, 2010-ին 200 միլիոն, 2011-ին 176 միլիոն 500 հազար, 2012-ին 163 միլիոն: Ի դեպ, «Գյումրու տեխնոպարկի գործունեության իրականացման 2013 թվականի ծրագիրը» և «Գյումրու տեխնոպարկի գործունեության իրականացման 2014 թվականի ծրագիրը» հաստատելու մասին կառավարության որոշումները մեզ չհաջողվեց իրավական ակտերի էլեկտրոնային բազայում գտնել: Ուստի, չենք կարող ասել, թե անցած տարի և այս տարի «Գյումրու տեխնոպարկի» ծրագրի համար որքան գումար է հատկացվել պետական բյուջեից:

Հեղինակ` Վահագն Հովակիմյան

Նախորդող հրապարակում`

Կառավարությունը սկսում է վերացնել Տիգրան Սարգսյանի կառավարման հետևանքները