Ձեր վստահելի աղբյուրը

Հունիսի 8-ին Գորիսում կայանալիք քաղաքապետի ընտրությունները, որի նախընտրական քարոզարշավը կմեկնարկի մայիսի 21-ին, խոստանում են թեժ լինել: Այս պահին Գորիսի քաղաքապետի ընտրություններում առաջադրված թեկնածուները 4-ն են` ինքնաառաջադրված անկուսակցականներ Հրայր Յոլյանը և Տիգրան Կարապետյանը, ինչպես նաև Հանրապետական կուսակցության անդամներ Արա Բուդաղյանն ու Վաչագան Ադունցը: Վերջինն, ըստ ԿԸՀ ներկայացված փաստաթղթերի, առաջադրվել է ՀՀԿ-ի կողմից, սակայն նրան պաշտպանելու մասին ՀՀԿ-ն առայժմ պաշտոնական հայտարարություն չի արել:

Panorama.am-ը զրուցել է առաջադրված թեկնածուներից Տիգրան Կարապետյանի հետ, ով խոսել է Գորիսում տիրող բարոյահոգեբանական մթնոլորտի փոփոխության անհրաժեշտության, Արա Բուդաղյանի և Սյունիքի մարզպետի հետ իր ընկերության ու հնարավոր զարգացումների մասին:

-Երբվանի՞ց եք սկսում պայքարը:

-Պայքարը սկսել ենք 88-ից, ընդհանրապես: Բայց քաղաքական այս պայքարը (նկատի ունի Գորիսի քաղաքապետի ընտրությունների նախընտրական քարոզարշավը) կսկսենք մայիսի 21-ից, որովհետև այդպես է պաշտոնապես թույլատրվում:

-Հիմա պայքար չկա՞ այսինքն:

-Հիմա տակտիկական պայքար է ընթանում:

-Ի՞նչ է դա նշանակում, պարոն Կարապետյան

-Նշանակում է` մշակվում է ռազմավարություն, թե ինչպես պետք է պայքարենք առաջիկայում:

-Լավ, պարոն Կարապետյան, ո՞վ եք դուք, ինչո՞վ եք զբաղվում և ինչո՞ւ որոշեցիք առաջադրվել:

-Ես Տիգրան Գոռի Կարապետյանն եմ, ծնվել եմ Գորիսում: Գորիսի «ԳԱՄՄԱ» բաց բաժնետիրական ընկերության խորհրդի նախագահն եմ, Սյունիքի մարզի առևտրաարդյունաբերական պալատի նախագահն եմ, գործարար եմ, զբաղվում եմ իմ բիզնեսով:

-Ինչո՞ւ որոշեցիք առաջադրվել, ո՞ւմ որոշումն էր Ձեր առաջադրումը:

-Թիմի որոշումն էր, մենք այն խնդիրները, որոնք տեսնում ենք մեր քաղաքում կարծում ենք, որ մեր առաջարկած լուծման տարբերակներն ավելի ճիշտ են, ավելի ռեալ ու ավելի օբյեկտիվ: Մենք վստահ ենք մեր ուժերի վրա ու համոզված ենք, որ ավելի արագ կլուծենք ծառացած խնդիրները:

-Ովքե՞ր են Ձեր թիմը, պարոն Կարապետյան:

-Մեր թիմը մարդիկ են, ովքեր սրտացավ են Գորիսի խնդիրների նկատմամբ:

-Ձեր թիմը նաև Սյունիքի մարզպետ Վահե Հակոբյա՞նն է:

-Սյունիքի մարզպետի հետ մենք ընկերներ ենք:

-Միաժամանակ վայելում եք նրա հովանավորչությունն ու աջակցությունը, այդպես չէ՞:

-Որպես ընկեր` այո:

Այսինքն, դուք ակնկալո՞ւմ եք նրա աջակցությունը նախընտրական քարոզարշավի ժամանակ վարչական ռեսուրսի գործադրման առումով:

-Մենք ոչ միայն չենք ակնկալում վարչական ռեսուրսի գործադրում, մեր հույսը այն է, որ պետք է ստանանք մեր համաքաղաքացիների, համայնքի անդամների աջակցությունը: Մենք ակնկալում ենք այդ աջակցությունը: Նույնիսկ եթե հնարավորություն ունենանք օգտագործելու վարչական ռեսուրս, ապա այդպես չի լինի:

-Պարոն Կարապետյան, նաև Ձեր մյուս ընկերն է առաջադրվել` Արա Բուդաղյանը: Ինչո՞ւ այդպես ստացվեց: Ի՞նչ հնարավոր զարգացումներ են սպասվում, հնարավո՞ր է ձեզանից որևէ մեկը, այնուամենայնիվ, ինքնաբացարկ հայտնի:

-Ճիշտն ասած, ես չեմ կարող Արա Բուդաղյանի փոխարեն ասել, թե ինչու առաջադրվեց: Իսկ թե ինչ զարգացումներ կլինեն, կարծում եմ, դրանք իսկապես առաջիկայում կլինեն: Մենք միմյանց չենք խանգարի, երբեք: Այսքանը կասեմ այս պահին:

-Իսկ Ձեզ խանգարող կամ, լավ, հիմնական մրցակից ո՞ւմ եք համարում:

-Բոլորն էլ մեզ համար մրցակից են: Որևէ մեկին չեմ առանձնացնում: Բոլորն էլ հավասար մրցակիցներ են մեզ համար:

-Պարոն Կարապետյան, նաև առաջադրվել է Հանրապետական կուսակցության ներկայացուցիչը` Վաչագան Ադունց…

-Երկու Հանրապետական են` Արայիկ Բուդաղյան և Վաչագան Ադունց:

-Բայց ԸԸՀ ներկայացրած փաստաթղթերի համաձայն, Ադունցն առաջադրվել է ՀՀԿ-ի կողմից:

-Ես ճիշտն ասած, տեղեկություն չունեմ, որ ՀՀԿ-ն պաշտոնապես պաշտպանում է նրան: ԿԸՀ ներկայացված փաստաթղթերի հավաստիությունը և թեկնածուների գրանցումը կստուգվի այսօր, որի արդյունքում կպարզվի` պաշտպանո՞ւմ է Հանրապետականը այդ թեկնածուին, թե՞ ոչ:

-Այսինքն, դուք հնարավոր եք համարում այն, որ ՀՀԿ-ն չի՞ պաշտպանի Ադունցին:

-Այո, այո, հնարավոր համարում եմ:

-Պարոն Կարապետյան, ի՞նչ եք ծրագրում անել Գորիսում:

-Մեր ծրագիրը ժամանակից շուտ չեմ ուզում հրապարակել, ուղղակի մեզ համար ամենակարևոր խնդիրը բարոյահոգեբանական մթնոլորտը փոխելն է այս քաղաքում: Ես կառանձնացնեմ գերխնդիր Գորիսում:

-Ի՞նչ նկատի ունեք բարոյահոգեբանական մթնոլորտը փոխել ասելով, վախի մթնոլորտ կա՞ քաղաքում:

-Ոչ, ոչ, ոչ: Վախ չկա, ումի՞ց պիտի վախենանք: Մենք ունենք Սյունիքի մարզպետ, որը բարության կերպար է, ու որի հետ շփվելով ցանկացած մարդու մեջ ոչ միայն վախ չի առաջանում, այլ նաև կյանքի նկատմամբ պատկերացումներն էլ են փոխվում: Բայց Գորիսում կա հասարակության կոնսոլիդացիայի խնդրի ու վստահ ենք, որ այդ տարբեր շերտերը, որ այսօր անջատ-անջատ են գործում, միավորել, կարծում եմ, մեզ կհաջողվի: Սա է լինելու մեր խնդիրը:

-Ինչի՞ հետևանք է այդպես տարանջատված լինելը:

-Դա առաջացել է մի շարք բացասական երևույթներից, որը առկա է մեր իրականությունում, հատկապես գորիսյան իրականությունում:

-Դուք դա կապում եք նախկին մարզպետ Սուրիկ Խաչատրյանի (Լիսկա) գործոնի հե՞տ:

-Նաև նախկին մարզպետի գործոնի հետ եմ կապում, այո:

-Այս պահին նա ի՞նչ ազդեցություն ունի Գորիսում, պարոն Կարապետյան:

-Նախկին մարզպետն ունի բոլոր նախկին մարզպետների չափ ազդեցություն: Ոչ ավել, ոչ պակաս: Սյունիքում ազդեցություն ունի Սյունիքի ներկայիս մարզպետը` պարոն Հակոբյանը: Ազդեցություն նկատի ունեմ` շփման որոշակի շրջանակ, ինչ-որ բարեկամություն: Այդքանը:

-Այնուամենայնիվ, պարոն Կարապետյան, ասում եք զարգացումներ կլինեն առաջիկայում, կարելի՞ է մի քիչ բացեք փակագծերը` ի՞նչ զարգացումների մասին է խոսքը:

-Կլինի երևի թե թեկնածուների միավորում, կլինեն կարծում եմ, նաև քաղաքական գնահատականներ որոշ քաղաքական ուժերի կողմից, որովհետև այսօր մեր կողքին կանգնած են հենց նույն Հանրապետական կուսակցությունից մարդիկ, որոնք հստակ, բացահայտ հայտարարում են, որ չկա քաղաքական որոշում: Այսինքն` ՀՀԿ տարածքային կառույցը չի որոշել պաշտպանել Վաչագան Ադունցի թեկնածությունը: Կան մարդիկ, որ որևէ պարագայում չեն սատարի որևէ թեկնածուի: Ուղղակի պետք է սպասել, որ հստակ լինեն գնահատականները իրավիճակին: