Ձեր վստահելի աղբյուրը

«Ֆրանսիայի նախագահի այցելությունը տարածաշրջան և հատկապես Հայաստան, կարևոր իրադարձություն էր` հաշիվ առնելով Ուկրաինայում տեղի ունեցող իրադարձությունները: Տարածաշրջանը, որը համարվում է գոնե Ռուսաստանի տեսանկյունից իբրև իր ազդեցության տարածաշրջանան և այդտեղ գալիս է արևմտյան խոշոր երկրներից մեկի նախագահը»,- լրագրողների հետ հանդիպման ժամանակ ասաց ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը:

Նա կարևորեց Ֆ. Օլանդի այն հայտարարությունը, որ Հայաստան-Ֆրանսիա տնտեսական կապերը չեն համապատասխանում այն սերտ հարաբերություններին, որ կան երկու պետությունների ու ժողովուրդների միջև ու դրանք պետք է զարգացել: Կ. Մանոյանը կարևորեց նաև Ֆրանսիայի նախագահի հայտարարությունները, որոնք վերաբերում էին Հայոց ցեղասպանության ճանաչման և Արցախի ժողովրդի ինքնորոշման հարցերին:

ՀՅԴ-ական գործչի գնահատմամբ, Ֆ. Օլանդի գալը Հայաստան` այցելություն էր հին բարեկամին. «Կարծում եմ` տարածաշրջան այցելության մեջ ամենահարազատը Հայաստանում էր, չնայած Ադրբեջանում նախագահ Օլանդը նշեց, որ Ֆրանսիան իր առջև խնդիր չի դրել տարածաշրջանից երկրներ ընտրելու մեջ` կարևորելով երեք երկրների հետ հարաբերությունները»:

Անդրադառնալով հայ-ֆրանսիական հարաբերությունների ակնկալվող զարգացումներին, Կ. Մանոյանը կարևորեց այն հայտարարությունը, որ 2015-ի ապրիլի 24-ին Ֆ. Օլանդը լինելու է Երևանում: Նրա խոսքով, Ֆրանսիան, այնուամենայնիվ, կընդունի Ցեղասպանության հերքումը քրեականացնող օրենք, սակայն դեռևս սպասում է Եվրադատարանի որոշմանը` կապված Շվեյցարիայում նման իրավանորմը անընդունելի ճանաչելու հետ:

Կ. Մանոյանն ասաց, որ իշխանությունների կողմից ձախողում էր` Օլանդի հետ պաշտոնական հանդիպումներին ընդդիմությունից որևէ մեկին չհրավիրելը, երբ Ֆրանիսան մեծ պատվիրակությամբ էր եկել, և նրանց թվում էին նաև ընդդիմադիր գործիչներ: