Ձեր վստահելի աղբյուրը

ՀՀ կառավարության նիստից հետո էկոնոմիկայի նախարար Կարեն Ճշմարիտյանը լրագրողների հետ ճեպազրույցում պատասխանելով հարցին, թե արդյոք մինչև հուլիսի 1-ը խոշոր գործարարները հավասար դաշտում կաշխատեն, թե՞ հնարավոր է, որ նրանք չենթարկվեն խաղի նոր կանոններին, պատասխանեց. «Կարծում եմ, որ իրենք էլ են հայրենասեր, և մտածելով Հայաստանի տնտեսության հետագա զարգացման մասին՝ պետք է որ իրենց դիրքորոշումները, ընդհանրապես իրավատնտեսական հարաբերությունների դաշտում փոփոխությունները ընկալեն ավելի ճիշտ»:

Հիշեցնենք, որ վարչապետ Հովիկ Աբրահամյանը կառավարության այսօրվա նիստում անդրադառնալով գործարարների հետ երեկ տեղի ունեցած հանդիպմանը, նշեց, որ մինչև այս տարվա հուլիսի 1-ը նրանց ժամանակ է տրվել, որ բոլորը պետք է աշխատեն հավասար դաշտում, և բոլորն ամեն ինչ պետք է անեն, որպեսզի ստվերից դուրս գան:

Դիտարկմանը, թե մինչև այդ գործարարները հայրենասեր չեն եղել, նախարարը նշեց, որ չի կարծում, թե հայրենասեր չէին, պարզապես տնտեսաիրավական նոր հարաբերություններ են անհրաժեշտ:

«Մի տնտեսական փուլում ենք, որտեղ այս հարցի լուծումը, այսինքն` ստվերի կրճատումը, փոքր և միջին, ինչպես նաև խոշոր ձեռնարկությունների միջև հարաբերությունների կարգավորումը, ընդհանրապես սոցիալ- տնտեսական զարգացում նախատեսվող ծրագրի աջակցությունը և այդ ծրագրի կատարումը էապես կախված է նրանից, որ բոլորը ընդունեն խաղի կանոնները»,- ասաց Կարեն Ճշմարիտյանը:

Հարցին, թե մինչ այս ինչու չկային այդ խաղի կանոնները, էկոնոմիկայի նախարարը նշեց, որ կար, բայց բավարար չէր:
Ինչ վերաբերում է գործարարների ներկայացրած բողոքներին, Կ.Ճշմարիտյանն ասաց, որ տնտեսվարողները որևէ կոնկրետ բողոք չեն ներկայացրել:

Ըստ նրա` հանդիպման ընթացքում ավելի շատ ծրագրային հարցեր են քննարկվել:

«Խնդիրը բյուջեի եկամուտները ավելանալու մեջ չէ: Դա նույնպես հետևանք կարող է լինել: Ավելի շատ երկրում սպառման դաշտն ավելացնելու մեջ է, այսինքն` եկամուտների վերաբաշխման հարցը պետք է լուծել, քանի որ երբ եկամուտների կենտրոնացում է գնում, դա տնտեսության համար բավականին բացասական երևույթ է, իսկ եկամուտների բաշխումը տնտեսության զարգացման հիմքերից մեկն է»,- ընդգծեց Կարեն Ճշմարիտյանը:

Նախորդող հրապարակում`

Վարչապետը գործարարներին մինչև հուլիսի 1-ը ժամանակ է տվել՝ օրինական և հավասար դաշտում աշխատելու համար