Ձեր վստահելի աղբյուրը

«Հայաստանում հանրակրթության մակարդակը անբավարար է, բոլորս գիտենք, թե ինչ իրավիճակ է տիրում ավագ դպրոցներում, երբ աշակերտների մեծ մասը չի հաճախում ավագ դպրոցներ, որովհետև չի ստանում կրթության անհրաժեշտ մակարդակ», -այսօր Ազգային ժողովում կրթության ոլորտին վերաբերող օրինագծերի քննարկման ժամանակ հայտարարեց ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը:

Նրա ներկայացմամբ, ավագ դպրոցի աշակերտները շարունակում են կրկնուսույցների հետ պարապել` միաժամանակ պայմանավորվածություն ունենալով ավագ դպրոցների տնօրենների հետ, որպեսզի երեխան չհաճախի դպրոց:

«Շատ դեպքերում այդ պայմանավորվածությունը չի լինում անշահախնդիր», -հայտարարեց Զոհրաբյանը` նկատելով, որ անհրաժեշտ է ունենալ կրթական այնպիսի ծրագիր, որը որակ ապահովի:

Պատգամավորի այս մտահոգությունները Կրթության, գիտության նախարար Արմեն Աշոտյանն ասաց կիսում է ու շարունակեց.«Իրականում մենք` ձեզ հետ միասին, միշտ դժգոհ ենք մեր ամեն ինչից: Երբեմն տեղին ենք դժգոհում, երբեմն` անտեղի: Երբեմն խոսում ենք, ճառում ենք, կենացում ենք, բայց երբ գալիս է գործնական պահը, խուսափում ենք, խորշում ենք: Ես էլ գիտեմ, որ հաճախումների հետ կապված լայնածավալ խնդիր կա, բայց խնդրում եմ հարգելի պատգամավորներ, ինձ մի օր գոնե մի տնօրենի անուն տվեք, հարգելի լրագրողներ, անուն տվեք տնօրենի, որը փողով ծնողին թույլ է տվել աշակերտին դպրոց չբերել: Նման դեպք է եղել ու չի՞ պատժվել»:

Նախարարի պնդմամբ, կոռուպցիոն մեխանիզմների կիրառումը շատ ձեռնտու է մարդկանց, այսինքն` կան մարդիկ, ում ձեռնտու է փողով գնահատական ստանալ, փողով երեխային դասի չտանել:

«Այս կոռուպցիոն ռիսկերի մեջ շահառուների թիվն այնքան զգալի է, մեծ է, որ քանի դեռ ուսանողը շահագրգիռ է, որ լինի կոռուպցիա բուհում, ուզում ես 15 հատ կրթության նախարար բեր ու բոլորը լինեն օրինակ, ՀԱԿ-ից: Կապ չունի, չի փոխվելու: Քանի ուսանողը շահագրգիռ է փող տալու մեջ, ծնողը շահագրգիռ է փող տալու մեջ, տնօրենը, բնականաբար, վերցնում է, ես ավելորդ եմ այդ խաղի մեջ դառնում, դուք էլ եք ավելորդ դառնում: Իրենք տակերում լավ էլ իրար հետ աշխատում են», -հայտարարեց Աշոտյանը:

Ընդհանուր առմամբ, ըստ Աշոտյանի, կրթության որակը Հայաստանում այնքան վատը չէ, ինչքան մտածում են, այնքան լավը չէ, որի մասին երազում են:

«Կրթական մակարդակով հետ ենք աշխարհի թոփ 10-ից, որտեղից 7-ը ասիական երկրներ չեն, ու խնդիրը միայն ֆինանասավորումը չէ: Դուք որ տեսնեք, թե Վիետնամը ինչ կրթական հեղափոխություն է արել, կապշեք, Վիետնամը, որը չի համարվում շատ հարուսստ երկիր, այնպիսի մոտվիացիա է ստեղծված այդ հասարակության մեջ, որ երեխաների դպրոցական կրթությունը դարձել է ազգային գաղափար` առավոտից երեկո պարապում են այդ մարդիկ ու Վիետնամը մտել է թոփ 10-յակի մեջ: Մրջյունի նման աշխատում են սովորում են, մոտիվացված են սովորում : Ու քանի դեռ ծնողը պայքարում է իմ դեմ, որ երեխան չգնա դպրոց, մենք չենք հաղթելու, ինչ ուզում ենք անենք, չենք հաղթելու, որովհետև մասսայական մոտիվացիան հակառակն անելու շատ մեծ է», -եզրափակեց Աշոտյանը:

«Ձեր և բոլորիս մատնանշած մոտիվացիան ծնողը կամ աշակերտը կարող է ունենալ մեկ դեպքում` եթե մեր հանրակրթական դպրոցներում իրեն մատուցվի որակյալ կրթություն», -արձագանքեց պատգամավորը: