Ձեր վստահելի աղբյուրը

Վերջին օրերին սոցիալական ցանցում տեղ է գտել Առողջապահության նախարարության հասցեին սուր քննադատություն` 7-ամյա Էրիկ Գալստյանին Մոսկվայի տոմս չտրամադրելու հետ կապված: Նշենք, որ երեխայի գլխուղեղում ուռուցք է հայտնաբերվել և ծնողները որոշել են Էրիկին տեղափոխել Մոսկվա վիրահատության, սակայն ֆինանսական խնդիրների պատճառով (ընտանիքը սոցիալապես անապահով է, ապրում են վարձով և ծնողներից ոչ մեկը չի աշխատում) մեկնումը ուշանում էր: Ծնողները նաև հաշվեհամար են բացել բանկում` հայցելով քաղաքացիների օգնությունն ու աջակցությունը: Որոշ գումար հավաքվելուց հետո հերթը հասնում է նախարարությանը, քանի որ, ըստ սոցցանցերում շրջանառվող տեղեկության` նախարարությունը ապահովելու էր թռիչքի երկու տոմս: Օրերս պարզվում է, որ նախարարությունը չի կարող տրամադրել նման օգնություն` առանց համապատասխան տեղեկանքի:

Իրավիճակը պարզելու համար դիմեցինք ԱՆ: Ներկայացնում ենք պատասխանը. «Եվրոպայում վիրահատություն կատարելու համար դրամական օգնություն ցուցաբերելու վերաբերյալ քաղաքացի Արթուր Գալստյանի դիմումը ՀՀ կառավարության աշխատակազմից ՀՀ առողջապահության նախարարություն է վերահասցեագրվել ապրիլի 26-ին: Գրությանը գրավոր պատասխանվել է, որ ՀՀ առողջապահության նախարարությունը իր իրավասությունների շրջանակներում արտերկրում հիվանդի բուժման կազմակերպման գործառույթ ու համապատասխան ընթացակարգ չունի և, հետևաբար, բուժման համար դրամական օգնություն չի կարող ցուցաբերել, քանզի չի տնօրինում արտասահմանում երեխաների բուժումը կազմակերպելու համար նախատեսված ֆոնդերի։

Միաժամանակ քաղաքացուն տեղեկացվել է, որ սահմանված կարգի համաձայն Ռուսաստանի Դաշնությունում երեխայի բուժումը կազմակերպելու նպատակահարմարության դեպքում առողջապահության նախարարությունը պատրաստ է հոգալու երեխայի և խնամակալի տրանսպորտային ծախսերը:

Այնուհետև 30.04.2014թ. մուտքագրվել է քաղաքացու գրությունը` Մոսկվայում վիրահատությունը կատարելու համար ֆինանսական օգնություն տրամադրելու վերաբերյալ, որին կրկին գրավոր պարզաբանվել է, որ համաձայն գործող իրավական ակտերի, հիվանդին և ուղեկցողին տրամադրվում են օդանավի (մեկնումի և վերադարձի) տոմսեր` առանց տվյալ երկրում բուժման ծախսերի փոխհատուցման, եթե առկա է Հայաստանի Հանրապետությունում հիվանդի բուժման (հետազոտության) անհնարինության վերաբերյալ տվյալ բնագավառի ՀՀ առողջապահության նախարարության գլխավոր մասնագետի կամ բուժհաստատության եզրակացությունը:

Մայիսի 15-ին երեխայի հայրը ներկայացել է ՀՀ առողջապահության նախարարության մոր և մանկան առողջության պահպանման վարչություն, որտեղ նրան սահմանված կարգով տրվել է խորհրդատվության թերթիկ (հարցում)` «Սուրբ Աստվածամայր» ԲԿ-ում Հայաստանի Հանրապետությունում երեխայի բուժման անհնարինության վերաբերյալ նյարդավիրաբույժի եզրակացություն ստանալու համար, ինչը անհրաժեշտ պայման է և հիմք` երեխայի և խնամողի ՌԴ մեկնելու և վերադարձի տոմսերը գնելու համար: Սակայն երեխայի հայրը ՀՀ առողջապահության նախարարություն չի վերադարձել:

Ըստ «Սուրբ Աստվածամայր» ԲԿ-ից ստացված տեղեկատվության, քաղաքացին այդ օրը բուժհաստատություն նույնպես չի ներկայացել:

Սակայն, ինչպես հավաստիացնում են բուժհաստատությունից, երկու շաբաթ առաջ երեխան զննվել է նույն հիվանդանոցի նյարդավիրաբույժի կողմից, որն առաջարկել է նրա վիրահատությունը կատարել Հայաստանում` պետական պատվերի շրջանակներում, քանի որ ընտանիքն ընդգրկված է ընտանեկան նպաստների «Փարոս» համակարգում:

Քաղաքացին վարչության աշխատակիցներին դիմելիս անհարկի չի սպասել, և պարզաբանումները, ինչպես նաև խորհրդատվության թերթիկը տրվել են անմիջապես»: