Ոչ միայն հացիվ. Սննդի տարաներ
Այսօր գրեթե բոլորս նույն հարցն ենք տալիս` ի՞նչ ուտել։ Խոսքը վերաբերում է այն ուտելիքին, որոնք չեն վնասի մեր և մեր երեխաների առողջությունը, քանի որ այնքան էլ վստահ չենք, որ ամեն օր օգտագործվող սննդի որակի նկատմամբ պատշաճ վերահսկողություն է իրականացվում։ Եվ հայտնի չէ, թե մեր շուկաներում, խանութներում վաճառվող սնունդը` Հայաստանում արտադրված կամ որևէ այլ երկրից ներկրված, որքանով է անվտանգ։
Սակայն, այսօր ևս խնդրի առաջ ենք կանգնել: Որքանո՞վ են անվտանգ Հայաստան ներկրվող պլաստմասե տարաներն ու թավաները: Գուցե տարօրինակ հնչի, բայց սա էլ լուրջ խնդիր է, քանի որ այդ տարաներում պահվում է այն սնունդը, որը մենք ուտում ենք, իսկ թավաներում էլ այն պատրաստվում է: Այսինքն` դրանք միմյանց հետ փոխկապակցված են և ուղղակիորեն առնչվում է մեր առողջությանը:
Արդյո՞ք անվտանգ են այդ տարաներն ու թավաները: Ներկայացնում ենք ոլորտի պատասխանատուների տեսակետները:
ՀՀ գյուղատնտեսության նախարարության Սննդամթերքի անվտանգության պետական ծառայության աշխատակազմի ղեկավարի տեղակալ Դավիթ Ղուլյանը Panorama.am-ի թղթակցի հետ զրույցում ասաց, կառավարության որոշման համաձայն` եթե ապրանքը ներկրվում է անվտանգությունը հավաստող փաստաթղթով, ապա լաբորատոր փորձաքննության չի ենթարկվում: Իսկ տարաները, ըստ նրա, հիմնականում ներկրվում են անվտանգությունը հավաստող փաստաթղթով. «Բոլոր տարաները Հայաստան ներկրվել են անվտանգությունը հավաստող, այսինքն` ուղեկցվող փաստաթղթերով: Այդ պատճառով լաբորատոր փորձաքննության կարիք չի առաջանում»:
Անդրադառնալով բողոքներին, նա վստահեցրեց, որ այսքան ժամանակ պլաստմասե տարաների հետ կապված բողոք չեն ունեցել, առավել ևս` թունավորման դեպքեր չենք գրանցվել:
ՍԱՊԾ-ի տվյալներով` 2013թ-ին Հայաստան է ներկրվել 14 հազար տոննա պլաստմասե տարա, իսկ 2014թ-ի առաջին եռամսյակում` 1600 տոննա տարա: Դրանք հիմնականում ներկրվում են եվրոպական երկրներից, Չինաստանից, Իրանից և Ռուսաստանից:
Ինչ վերաբերում է թավաների խնդրին, ապա այդ հարցով զբաղվում է ՀՀ էկոնոմիկայի նախարարության Շուկայի վերահսկողության պետական տեսչությունը:
Տեսչության պետ Լևոն Խալիկյանը մեզ հետ զրույցում ասաց, որ տվյալ ապրանքատեսակի` թավայի համար գոյություն չունի տեխնիկական կանոնակարգ, սակայն, եթե սպառողը գնում է անորակ թավա, որը օգտագործելու ժամանակ վնասվում է, փչանում կամ հալվում, ապա սպառողն իրավունք ունի 14 օրվա ընթացքում վերադարձնել տվյալ ապրանքը կամ ապրանքը փոխանակել այլ նմանատիպ ապրանքով. «Եթե տնտեսվարող սուբյեկտը հրաժարվում է ապրանքը փոխանակել, ապա սպառողները դիմում են մեզ և վերականգնում ենք նրանց իրավունքները»:
Ինչ վերաբերում է անվտանգության խնդիրներին, նա նշեց, որ մինչ օրս նման բողոք չենք ստացել, որ թավայի օգտագործումից մարդկանց առողջությանը կամ կյանքին վտանգ է սպառնացել. «Բայց, եթե նման խնդիրներ կամ հիմնավորված կասկածներ կան, ապա կարող են դիմել մեր տեսչությանը և արագ կարձագանքենք: Կան բազմաթիվ լաբորատորիաներ, որոնք կիրականացնեն փորձարկում և կասեն` տվյալ ապրանքը վտանգավոր է մարդու առողջության համար, թե ոչ»:
Ամեն դեպքում, ըստ Լ.Խալիկյանի, այսքան տարիների ընթացքում նմանատիպ դիմում-բողոք չի եղել, բողոքներ եղել են` կապված միայն անորակ թավաների հետ: Սակայն տեսչության օգնությամբ սպառողի խնդրին լուծում է տրվել:
«Հայաստանի սպառողների ասոցիացիա» ՀԿ նախագահ Արմեն Պողոսյանի խոսքերով` թավաների անվտանգության մասով երբևէ ուսումնասիրություն չեն իրականացրել, քանի որ դրանք արդեն իսկ համապատասխան սերտիֆիկատով են ներկրվում Հայաստան. «Որքան թանկ, որքան հեղինակավոր ընկերության արտադրություն լինի, այնքան ավելի ապահով է: Սա է խնդիրը: Կյանքն այդպիսին է, երբ դու գնում ես հեղինակավոր ֆիրմայի արտադրանք, ապա դու արդեն ապահովված ես»,- ասաց Ա.Պողոսյանը` հավելելով, որ Հայաստան ներկրվող թավաները որակյալ են, բացի այդ` դա այն ապրանքը չէ, որ կարողանան կեղծել:
Ինչ վերաբերում է պլաստմասե տարաներին, նա նշեց, որ այստեղ ևս ուսումնասիրություններ չեն իրականացվել, բայց եթե դրանք ներկրվում են արդեն իսկ անվտանգությունը հավաստող փաստաթղթով, ապա կարելի է «հանգիստ» լինել. «Կարծում եմ, որ համոզվելու համար փորձաքննությունը պետք է պարտադիր լինի»:
Ա.Պողոսյանն ասաց, որ իրենց կազմակերպությունը դեռ որևէ բողոք անորակ թավաների կամ պլաստմասե տարաների վերաբերյալ չի ստացել:
Նշենք, որ թավաների ու տարաների մասին գրելու առիթ եղավ հենց բողոքը: «Ամերիկյան է, լավն է» գովազդով թավան հենց առաջին փորձության ժամանակ սկսել էր հալված պլաստամասայի հոտ «բուրել»: Երրրոդ, չորրորդ անգամ էլ: Վերջին անգամ, երբ հալվող պլաստմասայի հոտ հիշեցնող դառնահամը կպել էր եփվող ուտելիքին, տանտիրուհին, չկասկածելով, որ թավան կարող է ետ վերադարձնել, այն նետել էր ուղիղ աղբարկղը:
Ինչևէ` պարզ է մի բան. Եթե սպառողը կասկածում է ապրանքի որակին կամ եթե նույնիսկ անորակությունը «բուրում» է դրանից, ինքն է դիմելու համապատասխան փորձաքննության համար:
Ուզում ես առողջ լինել, սպառող, եղիր ակտիվ:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
