Ջրի սակագնի բարձրացում չի նախատեսվում. Պատրիկ Լորեն
«Հայջրմուղկոյուղի» ընկերության գլխավոր տնօրեն և կառավարիչ Պատրիկ Լորենն այսօր լրագրողների հետ հանդիպման ժամանակ, ներկայացնելով ընկերության կատարած աշխատանքներն ու առաջիկա ծրագրերն ասաց, որ ընկերության գլխավոր ձեռքբերումներից ամենակարևորն այսօր ջրամատակարարման տևողության ավելացումն է։
«Մեր գերակա նպատակն է հանրապետությունում մինչև 2020թ-ն ապահովել շուրջօրյա ջրամատարակարում, իսկ մինչ այդ նախատեսում ենք տարեցտարի ավելացնել ջրամատակարարման տևողությունը»,-ասաց նա` հավելելով, ջուրջօրյա ջրամատարակարարում ապահովելու համար անհրաժեշտ են լուրջ ներդրումներ:
Պատրիկ Լորենի խոսքով, 2013թ-ին ՀՀ կառավարության կողմից փոխանցվել է մոտ 100 մլն դոլար` ներդրումային ծրագրեր իրականացնելու համար: Այս գումարը, ըստ նրա, կներդրվի մինչև 2017թ-ը և արդյունքում` շարունակաբար կբարձրանա ջրի տևողությունն ու ջրի որակը:
«Ընկերության գլխավոր նպատակն է 2017 թ-ին միջինում ապահովել 17 ժամյա ջրամատակարարում»,- ասաց նա:
Միաժամանակ նշեց, որ այսօր բաժանորդների 98%-ը ստանում է 4 ժամ և ավելի ջրամատակարարում, իսկ 38%-ը` շուրջօրյա ջրամատակարարում: Այս տարի, ըստ Պ. Լորենի, նախատեսում են, որ բաժանորդների արդեն 40%-ը կունենան շուրջօրյա ջրամատակարարում:
«Եթե 2004 թվականին ջրամատակարարումը միջինում 6 ժամ էր, ապա այսօր միջինում ունենք 17 ժամյա ջրամատակարարում։ Կան մի շարք քաղաքներ և գյուղական համայնքներ, որոնք արդեն ունեն 24 ժամյա ջրամատակարարում»,-նշեց Պ. Լորենը:
Ինչ վերաբերում է ջրի սակագնի բարձրացմանը, ասաց` թեև վերջին տարիների ընթացքում ավելացել է և էլեկտրաէներգիայի, և գազի սակագինը, ինչպես նաև ընկերության ընդհանուր ծախսերը, սակայն այս տարի ջրի սակագնի բարձրացման հայտ չեն ներկայացնելու:
«Իհարկե առանց սակագնի բարձրացման հետագայում դժվար կլինի ֆինանսական գործունեությունը ճիշտ կառավարել, բայց եթե մինչև այսօր հայտ չենք ներկայացրել Հանրային ծառայությունները կարգավորող հանձնաժողով, դա նշանակում է , որ 2014 թ-ին սակագնի փոփոխություն չի լինելու», -ասաց Պ.Լորենը:
Հիշեցնենք, որ այսօր ջրի սակագինը կազմում է 179 դրամ: Այն գործում է 2009 թ-ից:
Նշենք, որ «Հայջրմուղկոյուղի» ընկերության սպասարկման տարածքն ընդգրկում է ամբողջ հանրապետությունը, բացի Երևանից։
Պ. Լորենի փոխանցմամբ, այսօր ընկերությունը սպասարկում է 282 գյուղական համայնք, 37 քաղաք:
Լրահոս
Տեսանյութեր
Քեզ ըտենց Դո՞գն է ասել. Լարված վիճակ Երևանի ավագանիում
