Ձեր վստահելի աղբյուրը

Հայաստանի երիտասարդական հիմնադրամը (ՀԵՀ) Վանաձորի Հովհաննես Թումանյանի անվան պետական մանկավարժական ինստիտուտին պատկանող «Բազում» հանգրվանին կհատկացնի անհրաժեշտ կահույք՝ մահճակալներ ու կողապահարաններ։ Այս մասին հաղորդում է Հայաստանի երիտասարդական հիմնադրամի մամուլի ծառայությունը:

Վանաձորի պետական մանկավարժական ինստիտուտի «Բազում» հանգրվանը գործում է շուրջ 6 տարի։ Բուհի ուսանողական խորհրդի նախագահ Հենրի Մատինյանի տեղեկացմամբ՝ այն ճամբարային կառույց է, որտեղ անցկացվում են ամառային դպրոցներ, սեմինարներ, մշակութային միջոցառումներ, սպորտային խաղեր, երիտասարդական հավաքներ, որոնց մասնակցում են ոչ միայն Վանաձորի մանկավարժական ինստիտուտի, այլև այլ բուհերի ու մարզերի ուսանողներ, երիտասարդներ Արցախից։ «Մեր ուսանողական հանգրվանը որոշակի կահույքի խնդիր ուներ, ինչը կլուծի ՀԵՀ-ը՝ առավել հարմարավետ դարձնելով ուսանողների հանգիստն ու աշխատանքը»,- ասում է Հենրի Մատինյանը։

Հանգրվանը հագեցած է ուսանողների ակտիվ հանգիստն ապահովող տեխնիկական և մարզական ամենատարբեր միջոցներով: Առաջիկայում ծրագրվում է կառուցել նաև մեծ թենիսի մարզասրահ և լողավազան, որն է′լ ավելի կակտիվացնի ու հետաքրքիր կդարձնի ուսանողական կյանքը:

Հենրի Մատինյանը նշում է նաև, որ համագործակցությունը Վանաձորի պետական մանկավարժական ինստիտուտի և Հայաստանի երիտասարդական հիմնադրամի միջև շարունակական է, մասնավորապես, մայիսի վերջին բուհի ուսանողները կներգրավվեն ՀԵՀ-ի Լոռու մարզային կենտրոնի կողմից կազմակերպվող ազգային խաղերի մրցույթներին։