Գործարարներ. Ստվերի տակից` բարեգործ
«Խոշոր բիզնեսի ներկայացուցիչների հետ վարչապետի հանդիպումից հետո մեկ անգամ ևս համոզվեցի, որ որպես վարչապետ ու կառավարության ղեկավար` Հովիկ Աբրահամյանն իմ հույսերն արդարացնում է»: Այս մասին Panorama.am թղթակցի հետ զրույցում ասաց «Գործատուների հանրապետական միության» նախագահ Գագիկ Մակարյանը` անդրադառնալով խոշոր գործարարների հետ ՀՀ վարչապետ Հովիկ Աբրահամյանի հանդիպմանը:
«Վարչապետը գործարարներին կոչ արեց աշխատել թափանցիկ, վստահել իրար, նա գործարարներին ասաց, որ մայիսի 25-ից հետո իր դռները բաց են գործատուների հետ հանդիպելու և խնդիրները կոնկրետացնելու, ավելի մանրամասն քննարկելու համար»,- նշեց Գ.Մակարյանը:
Նրա խոսքերով` գործարարները վարչապետի` հավասար դաշտում աշխատելու առաջարկը դրական են ընդունել: Իսկ այն գործարարները, որոնք թվում է թե` կրիտիկական գոտում են գտնվում, կարծիք են հայտնել, թե եթե խաղի կանոնները հավասար են լինելու, ապա իրենք նույնպես պատրաստ են աշխատելու:
Պատասխանելով հարցին, թե արդյոք հնարավոր է հասնել հավասար պայմանների, կամ բիզնեսը ստվերից դուրս բերել, եթե հաշվի առնենք, որ խոշոր բիզնեսը հենց պաշտոնյաների ձեռքում է, Գ.Մակարյանը նշեց, որ վերջին շրջանում աշխարհի տարբեր երկրների իրադարձությունները ցույց տվեցին, որ ղեկավարության, պաշտոնյանների կոռումպացված բիզնեսը հայտնվեց բավականին լուրջ կրիտիկական վիճակում: Նման երևույթներ սկսվեցին Ղրղզստանում, Մոլդովայում, Ուկրաինայում, Եգիպտոսում, Լիբիայում: Այսինքն` եկել է պահը, որ բոլորը պետք է գիտակցեն` վերջ պետք է տալ այս ամենին:
«Ես չեմ ասում, որ 100 տոկոսով ստվերը կվերանա, բայց եթե մարդիկ կան, որ արդեն հարյուրավոր միլիոններ ունեն, նույնիսկ նրանց կարողությունն արդեն միլիարդի է հասնում, ապա ժամանակն է, որ իրենք նաև իրենց ժառանգների ճակատագրի մասին մտածեն, քանի որ տարբեր ճանապարհով ձեռք բերված միջոցները ինչ-որ ժամանակ խնդիր են ստեղծելու հենց նրանց ժառանգների համար»,- ընդգծեց Գ.Մակարյանը:
Ըստ նրա` շատ երկրներում բիզնեսը ունեցել է ստվերային մաս, մարդիկ սկսում են ստվերի միջոցով խոշորանալ, բայց հետո դառնում են ավելի թափանցիկ ու քաղաքակիրթ: Գ.Մակարյանի խոսքերով, գալիս է մի ժամանակ, որ այդ նույն մարդիկ, ովքեր տարբեր ճանապարհներով հարստացել էին, դառնում են բարեգործ, սկսում են իրենց հեղինակության մասին մտածել:
«Քիչ դեպքեր են լինում, որ պահպանվում է այդ ագահության տրամաբանությունը»,- ասաց նա:
Անդրադառնալով կառավարության նոր կազմին, նա նշեց, որ ինքն այսօր էլ մնում է այն կարծիքին, որ կառավարության այսօրվա կազմը դեռևս մտահոգություն է առաջացնում` այն պատճառով, որ որոշ նախարարներ հասարակության շրջանում վստահություն չեն վայելում, որոշ նախարարներ անհաջող են եղել, բայց շարունակում են այսօր էլ մնալ իրենց պաշտոններում:
«Այդ մասին գործարարների հետ հանդիպման ժամանակ ասացի նաև վարչապետին` առաջարկելով նախարարների պաշտոնավարման 100 օրը լրանալուց հետո ավելի խորությամբ գնահատել նրանց աշխատանքը, միաժամանակ առաջարկեցի փոփոխված կազմով գնալ 2015թ.` համարելով այսօրվա կառավարությունը որպես անցումային կառավարություն: Վարչապետն իմ այս առաջարկին դրական պատասխանեց` ասելով, որ որևէ մեկի հետ երկար գնալու համաձայնագիր չունի, իր խնդիրն այն է, որ բոլորը աշխատեն և նպաստեն կառավարության ծրագրերի կատարմանը: Իսկ ովքեր հաջողություն չեն ունենա, ապա կվերանայի իր որոշումը»,- ասաց Գ.Մակարյանը:
Ինչ վերաբերում է կառավարության գործունեությանը, նշեց, որ առաջին հերթին կառավարությունը պետք է լուծի երկրում հրատապ խնդիրները, որոնք այսօր առկա են տնտեսությունում և բիզնեսում, վերացնի կոնֆլիկտային իրավիճակները, հետո նոր միայն անցնի ավելի գլոբալ ռեֆորմների, քանի որ նման ռեֆորմները պահանջում են ավելի հանգիստ միջավայր:
Թեմային առնչվող՝
Գ.Ծառուկյան. Չի փոխվի վիճակը, մարդկանց կյանքը չի լավանա` ուրեմն երկրում շատ ավելի լուրջ փոփոխություններ են պետք
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
