Ձեր վստահելի աղբյուրը

Նույնիսկ անզեն աչքով նկատելի է, որ ՀԱԿ խմբակցության ղեկավար Լյովիկ Զուրաբյանը վերջին շրջանում իրեն քառակողմ ընդդիմության կամ ոչ իշխանական միավորման փրկիչ է երևակայում: Համենայնդեպս, նման խոսակցություններ ու դիտարկումներ են անում ընդդիմադիր շրջանակներում, որոնք վերջին անցուդարձից, օրինակ, ԱԺ նախագահի ընտրությունից հետո, այնքան էլ տպավորիչ չեն:

Ընդդիմադիր, բայց ոչ քառյակային ուժերից մեկի ներկայացուցիչը, երբ նրան հարցրեցինք, թե ճի՞շտ է, որ Զուրաբյանի դերն ընդգծվում է որպես ընդդիմության փրկիչ, բավականին յուրօրինակ արձագանքեց. «Կներեք, ընչի՞չ…»: Եթե ավելի լուրջ, ապա՝ այո, փրկչական ամբիցիաներ Լյովիկն ունի, սակայն բովանդակությունն է կաղում, երբեմն՝ երկու ոտքից»:

Ամեն դեպքում, վերջին օրերին Լ.Զուրաբյանն աչքի ընկավ մի քանի ինքնօրինակ ելույթներով: Նա ծափահարություններ կորզեց ՀԱԿ երիտասարդական միությունից, վերջինիս անդրանիկ համագումարում ներկաներին համեմատելով ճապոնական մաֆիայի՝ «Յակուձայի» և անմահ «Կոզա Նոստրայի» հետ: Դեռ լավ է, որ բանը «Դքի Նորոյի» կամ «Ժնջիլ Վաղոյի» հետ համեմատություններին չհասավ: Դրվագն, իհարկե, տպավորիչ էր, բայց ոչ այն աստիճան, որ արժանի լիներ Վիրգիլիոսի կամ Հոմերոսի գրչին: Շատ-շատ՝ Անակրեոնի, կամ, ծայրահեղ դեպքում՝ Կաֆկայի: Ամենազիլն, իհարկե, Դալիի վրձինը կլիներ, կամ ավելի ճիշտ՝ Մալևիչի: Մանավանդ, որ վերջինիս «Սև քառակուսին» լավագույնս բնութագրում ու նկարագրում է ոչ իշխանական ուժերի ամբողջությունն ու համագործակցության իմաստը՝ միասին վերցրած: Իսկ վերին ձախ անկյունն, ասում են, Լևոն Զուրաբյանի կոդավորված դիմանկարն է:

Ոչ այնքան վաղուց` մայիսի 17-ին, Lևոն Զուրաբյանն այս վերջինի առնչությամբ նկատեց. «Ոչ իշխանական չորս խմբակցությունների դիրքորոշումները բավական մոտ են իրար: Հուսով ենք, որ քվեարկության օրը (կառավարության ծրագրի) կունենանք միասնական դիրքորոշում»:

Իսկապես, անքննելի են ոչ իշխանական համագործակցության և այն ցեխից հանելու, այսինքն՝ փրկելու ուղիները: «Բավականին մոտ»-ն ընդամենը «միասնական դիրքորոշման» հույս է տալիս: Ոչ ավելին: Թե էլ որքան բավականին պիտի մոտեցվեն, որ միասնանան, միայն ընդդիմադիր քրմերին է հայտնի:

Նորընծա փրկիչը, կամ իրեն այդպիսին երևակայող Լևոն Զուրաբյանը նաև ասել է. «Կանցկացնենք նաև հանրահավաք, որի նպատակը կլինի նշված քաղաքական օրակարգի իրականացումը: Հանրահավաքի անցկացման օրվա վերաբերյալ քննարկումները շարունակվում են: Սա միասնական դիրքորոշում է և հստակություն լինելու դեպքում մենք կտեղեկացնենք»:

Համարյա հայերեն է խոսում ՀԱԿ ու, փաստորեն նաև քառյակի առաջնորդ-փրկիչը, անհասկանալի է մնում միայն, որ եթե դիրքորոշում կա, մի բան էլ՝ միասնական, ապա էլ ի՞նչը դեռ պիտի հստակեցնեն:

Բայց դե՝ ում հետ չի պատահում: Կարևորն այն է, որ Լևոն Զուրաբյանն իրեն ընդդիմության փրկչի դերում է պատկերացնում: Հետո՞ ինչ, որ չար լեզուները դա համարում են փրկչության տնազ: