Ձեր վստահելի աղբյուրը

ՌԴ-ի նախագահ Վլադիմիր Պուտինը երկօրյա պաշտոնական այցով վաղը ժամանելու է Չինաստան և Շանհայում բանակցություններ է վարելու այդ երկրի առաջնորդ Սի Ձինպինի հետ:

ՌԴ-ի նախագահի օգնական Յուրի Ուշակովը նշել է, որ Պուտինը Պեկինում ստորագրելու է 30-ից ավելի պայմանագրեր: Դրանցից կարևորագույնը վերաբերվելու են ռուսական գազի առաքմանը Չինաստան: 

Այցի նախօրեին ՌԴ-ի նախագահը չինական առաջատար ԶԼՄ-ների հետ հանդիպմանն անդրադառնալով ռուս-չինական հարաբերություններին նշել է, որ Չինաստանի հետ ռազմավարական հարաբերությունների կառուցումը ՌԴ-ի արտաքին քաղաքական առաջնահերթություններից է:

Պուտինի խոսքերով, ինքը մեծ ուրախությամբ է սպասում իր ընկերոջ՝Սի Ձինպինի հետ հանդիպմանը և այցի արդյունքներով Մոսկվայի ու Պեկինի միջև ստորագրվելու են մեծ քանակությամբ պայմանագրեր:

ՌԴ-ի նախագահը ասել է, որ Չինաստանը այսօր հանդիսանում է Մոսկվայի թիվ մեկ առևտրատնտեսական գործընկերը և 2013թ.-ին երկկողմ ապրանքաշրջանառությունը հասել է 90 միլիարդ դոլարի: Պուտինը վստահություն է հայտնել, որ 2015թ.-ին այդ ցուցանիշը կհասնի՝100 միլիարդի, իսկ 2020թ.-ին՝200 միլիարդ դոլարի: 

Պուտինի այցին նախորդել էին Ռուսաստանի փոխվարչապետ Արկադի Դվորկովիչը այցը Պեկին: Երկօրյա աշխատանքային այցի ընթացքում նա հանդիպումներ է ունեցել Չինաստանի փոխվարչապետ Չժան Գաոլիի հետ: ՌԴ-ի փոխվարչապետի հետ Չինաստան են ժամանել ռուսական ամենախոշոր ընկերությունների՝«Գազպրոմի», «Ռոսնեֆտի», «ՆՕՎԱՏԷԿ»-ի, «Ռուսալի» պատվիրակությունները:

Ա.Դվորկովիչը նշել էր, որ չինական կողմի հետ քննարկվել է Ռուսաստանից արևելյան ուղղությամբ դեպի Չինաստան գազի առաքման հարցերը, իսկ «Ռոսնեֆտը» նպատակ ունի ավելացնել Չինաստան ծովային ճանապարհով առաքվող նավթի ծավալները մի քանի միլիոն տոննայով:

Ռուսական պատվիրակության կազմում Չինաստան ժամանած «Գազպրոմ» ընկերության նախագահ Ալեքսեյ Միլերը հանդիպել է չինական CNPC ընկերության տնօրենների խորհրդի նախագահ Չժոու Ցզիպինի հետ և կողմերը առաջընթաց են գրանցել Չինաստան ռուսական գազի արտահանման բանակցություններում:

«Գազպրոմը» գազի առաքման հետ կապված բանակցություններ է վարում Չինաստանի հետ 10 տարի:Նախորդ տարի կողմերը պայմանավորվել են 30 տարվա պայմանագիր կնքել, որով ՌԴ-ի Բլագովեշենսկ քաղաքով դեպի Չինաստան տարեկան պետք է արտահանվի 38 մլրդ խմ գազ: Սակայն պայմանագիրը այդպես էլ չստորագրվեց՝ գնի հետ կապված տարաձայնությունների պատճառով:

Դվորկովիչի այցին հաջորդել էր ՌԴ արտգործնախարար Սերգեյ Լավրովի այցը Պեկին, ով նախապատրաստում էր նախագահ Պուտինի մայիսյան այցը Չինաստան:
Արտգործնախարար Լավրովը իր այցի շրջանակներում հանդիպել է Չինաստանի առաջնորդ Սի Ձինպինի հետ: Չինաստանի առաջնորդի հետ զրույցում Լավրովը նշել էր, որ ՌԴ-ը մտադիր է շարունակել ամրապնդել համագործակցությունը և կապերը Չինաստանի հետ և հույս է հայտնել, որ մայիսին նախագահ Պուտինի պաշտոնական այցի ընթացքում ռուս-չինական ռազմավարական կապերը էլ ավելի կընդլայնվեն:

Պեկինում Լավրովը հանդիպումներ է ունեցել նաև իր չինացի գործընկեր Վան Իի հետ և քննարկել ռուս-չինական փոխգործակցության հետ կապված հարցերի լայն շրջանակ:

Վան Ին հայտարարել է, որ ՌԴ-ը և Չինաստանը պետք է ամրապնդեն ռազմավարական համագործակցությունը և ընդլայնել գործընկերությունը տարածաշրջանային և միջազգային հարցերում: Արձագանքելով Վան Իի հայտարարությանը Լավրովը նշել է, որ Պեկինը և Մոսկվան կարևորում են մայիսին կայանալիք նախագահ Վլադիմիր Պուտինի այցը Չինաստան: 

ՌԴ-ի և Չինաստանի միջև զարգանում է համագործակցությունը նաև ռազմա-տեխնիկական ոլորտում: Այսօր ՌԴ-ի խաղաղօվկիանոսյան նավատորմի նավերը ժամանել են Չինաստան, որպեսզի մասնակցեն ռուս-չինական «Ծովային համագործակցություն-2014» ռազմածովային զորավարժություններին: 

Զորավարժություններին հետևելու է նաև Չինաստանում պաշտոնական այցով գտնվող ՌԴ նախագահ Վլադիմիր Պուտինը:

ՌԴ-ը 2013թ.-ին ընդունված նոր «Արտաքին քաղաքական ռազմավարությունում» կարևոր տեղ է հատկացվում Չինաստանի հետ բարեկամական հարաբերությունների կառուցմանը: Ռազմավարության մեջ նշված է, որ ՌԴ-ը շարունակելու է ռազմավարական, փոխվստահելի հարաբերությունների կառուցումը Պեկինի հետ: Մոսկվան պատրաստ է համագործակցել Պեկինի հետ ՄԱԿ-ի Անվտանգության խորհրդի, G20-ի, Շանհայի համագործկացության կազմակերպության շրջանակներում: 

Արտյոմ Բալասանով

Նախորդող հրապարակում՝
 Պուտինի այցը Պեկին նոր լիցք կհաղորդի ռուս-չինական ռազմավարական համագործակցությանը