Ձեր վստահելի աղբյուրը

ԱՄՆ հանրահայտ հրեական ADL-ը (Զրպարտության և մերժման դեմ պայքարի միություն) ևս մեկ հայտարարությամբ է հանդես եկել՝ փորձելով հստակեցնել իր դիրքորոշումը Հայոց ցեղասպանության հարցում: Այս մասին տեղեկացնում է Ամերիկայի Հայակական համագումարի պաշտոնական կայքը:

«Քանի որ կրկին հարց է բարձացվում Հայոց ցեղասպանության հարցում ADL-ի դիրքորոշման վերաբերյալ, ցանկանում ենք հստակեցնել,այն ինչը մենք ասել ենք 2008-ի օգոստոսին` ADL-ը ճանաչում է Հայոց ցեղասպանությունը»,-նշված է ADL-ի կայքում:

Այս նոր հայտարարությունը 2008թ. Հայոց ցեղասպանության վերամշակված ձևն է: Սակայն ADL-ի ազգային տնօրեն Աբրահամ Ֆոքսմանը 2007թ. հայտարարության մեջ խուսափել է Հայոց ցեղասպանություն ճշգրիտ տերմինի օգտագործումից:

Ֆոքսմանի 2007թ. հայտարարության մեջ մասնավորապես ասվում էր. «Այդ գործողությունների հետևանքները, անշուշտ, հավասարազոր են ցեղասպանությանը: Ավելին, մենք շարունակում ենք վճռականորեն հավատալ, որ Կոնգրեսի բանաձևը այսպիսի հարցերի վերաբերյալ անարդյունավետ քայլ է և չի ամրապնդի թուրքերի ու հայերի միջև հաշտեցումը, և կարող է վտանգի ենթարկել Թուրքիայի հրեական համայնքը և Թուրքիայի, Իսրայելի և Միացյալ Նահանգների միջև կարևոր բազմակողմանի հարաբերությունները»:

ADL-ի հայտարարությունը նախորդել է մայիսի 17-ին Սաֆոլք համալսարանի իրավաբանական դպրոցի ավարտական հանդիսության ժամանակ Աբրահամ Ֆոքսմանի ելույթին և հաջորդել է ապրիլի 23-ի Ամերիկայի հրեական համայնքի հայտարարությանը, որտեղ վերջինս կոչ է արել թուրքական կառավարությանը «հաշվի նստել Հայոց ցեղասպանության իրողության հետ»:

«Սա այնպիսի գործընթացի սկիզբ է, որով ավելի լավ կհասկանանք, թե արդյոք պարոն Ֆոքսմանը և ADL-ը անկեղծորեն ընդունում են նոր և հստակ վարքագիծ: Որպես Սաֆոլք համալսարանի իրավաբանական դպրոցի շրջանավարտ, այս խնդիրը դառնում է ավելի անձնական, քանի որ Մասաչուսեթսի հայ համայնքը թերահավատորեն է վերաբերվում պարոն Ֆոքսմանի` Հայոց ցեղասպանության վերաբերյալ դիրքորոշմանը և Կոնգրեսում ունեցած ջանքերին: Գործողություններն ավելի բարձր են հնչում, քան բառերը, սակայն, հաշվի առնելով համալսարանի Ֆոքսմանի հետ գործունեությունը շարունակելու որոշումը, վերջերս ADL-ի կողմից արված հայտարարությունը, նա այժմ ունի բացառիկ հնարավորություն հստակեցնել իր կազմակերպության դիրքորոշումը Հայոց ցեղասպանության վերաբերյալ», - նշել է համագումարի Խորհրդի անդամ Էնթոնի Բարսամյանը: