Ձեր վստահելի աղբյուրը

Ռուսաստանն անկասկած արտաքին քաղաքականության նոր փուլ է թևակոխել, և ոչ միայն: Ուկրաինայի իրադարձությունները, թեև դրանք հասունանում էին վաղուց, հանդիսացան քաղաքական կուրսի փոփոխության կատալիզատորը: Այս մասին Հարավային Կովկասի լրագրողների հետ հանդիպմանը Լոմոնոսովի անվան Մոսկվայի պետական համալսարանում հայտարարեց փորձագետ, «Ռուսաստանը գլոբալ քաղաքականությունում» (‘’Россия в глобальной политике’’) ամսագրի գլխավոր խմբագիր Ֆյոդոր Լուկյանովը:

Նրա խոսքով` Ռուսաստանն արդեն առանձնացել է Խորհրդային միությունից ու գործում է ինքնուրույն. «Անցած տարվա իրադարձությունները ցույց տվեցին, որ Սառը պատերազմից հետո Ռուսաստանն այսօր ավելի հստակ ու ինքնավստահ է հայտարարում իր դերակատարման մասին: Պուտինն իր դիվանագիտական հմտությամբ Սիրիայում, փրկելով աշխարհը պատերազմից, զարմացրեց աշխարհին` ցույց տալով, որ ՌԴ-ն արդեն ինքնուրույն գերտերություն է, ով խաղում է իր կանոններով և կտրվել է Խորհրդային միությունից»,- նշեց Ֆ.Լուկյանովը:

Ուկրաինայի իրադարձությունները, մասնավորապես Յանուկովիչի ռեժիմի տապալումը, ըստ փորձագետի, շատերը դիտարկեցին իբրև ՌԴ պարտություն, սակայն հաջորդ քայլը` Ղրիմի միավորումը Ռուսաստանին, ուղղակի ցնցեց աշխարհը:

«Սա իսկապես շոկ էր շատերի համար, քանի որ բոլորի համոզմամբ, ՌԴ-ն խախտեց ԱՄՆ-ի ու Արևմուտքի մենաշնորհը` խառնվել այլ երկրների գործերին: Սա նոր փուլի մեկնարկն էր, որը թերևս լուրջ խոչընդոտներ է ստեղծում ՌԴ ու արևմտյան գործընկերների հարաբերություններում, բայց Ռուսաստանն էլ, մյուս կողմից, չի կարող հրաժարվել և չի հրաժարվի Ղրիմի միավորումից»,- ասաց ամսագրի գլխավոր խմբագիրը` հավելելով, որ պատմության մեջ էլ նման օրինակ չգիտի, որ վերադարձնեն տարածք, այն էլ սեփական տարածքը, որը ժամանակին իրենից են խլել:

Ինչ վերաբերում է ՌԴ-ԱՄՆ հարաբերություններին, ապա եթե Սառը պատերազմից հետո ԱՄՆ-ն էր փորձում թելադրել խաղի կանոնները, ապա այսօր իրավիճակն այլ է` աշխարհը չի կարող կառավարել միայն մեկ պետություն, անգամ եթե դա գերտերություն է. «Ժամանակակից աշխարհը շատ է տարբերվում տասնամյակ առաջվա աշխարհից` մոտեցումներն են տարբեր, մեխանիզմները, հակամարտությունները և այլն: Արևմուտքն այլևս առաջընթացի մոնոպոլիստը չի հանդիսանում: Ռուսաստանի համար սա լուրջ փորձություն է, քանի որ շատ հարցերում փոփոխություններ է պահանջում, և ՌԴ-ն շատ լավ հասկանում է, որ աշխարհի կառավարման ղեկին կանգնելը նշանակում է ուշադրությունն ու ռեսուրսները տեղափոխել դեպի Ասիա: Եվ հարցը, թե ինչպես պահպանել եվրոպական արժեքները, երբ ամենը թեքվում է դեպի Ասիա թերևս պատասխան չունի»:

Նա հիշեցրեց, որ ՌԴ նախագահ Վլադիմիր Պուտինը այս պահին գտնվում է Չինաստանում, դա շատ կարևոր այց է, այդ թվում և տնտեսական տեսանկյունից և հարաբերություններն էլ այդ գերտերության հետ արագ փոխվում են, բայց այդ ամենում նա սպառնալիքներ է տեսնում. «Իհարկե շատ վատ է, որ մենք թեքվում ենք դեպի Չինաստան այն պահին, երբ ՌԴ հարաբերությունները Արևմուտքի ու հատկապես ԱՄՆ հետ այս աստիճան փչացել ու վատացել են: Եթե դա արվեր մեկ տարի առաջ` ուրիշ, բայց այսօրվա իրողությունները վտանգներ են պարունակում»:

Վերադառնալով ռուս-ամերիկյան հարաբերություններին բանախոսը նշեց, որ մենթալիտետով այդ հարաբերությունները սառըպատերազմյան հարաբերություններն են հիշեցնում` ժամանակակից իրենց շեշտադրումներով: Հարցը ամենևին էլ նրանում չէ կմասնատվի Ուկրաինան, թե չի մասնատվի, հարցը նրանում է, որ հայտնվեց մի գերտերություն, ով խախտեց ձևավորված խաղի կանոնները: Ֆ.Լուկյանովը վստահություն հայտնեց, որ ռազմական լուծում խնդիրը չունի, պատերազմ սպասելի չէ, բայց դա դեռ լավատեսություն չի ներշնչում, քանի որ, օրինակ, ԱՄՆ-ն այսօր հստակ ցույց է տալիս իր ուժը նրանով, որ ֆինանսապես ու տնտեսապես է փորձում խեղճացնել ՌԴ-ին` նվազեցնելով ներդրումային վարկանիշը, պատժամիջոցներ սահմանել բանկային համակարգում և այլն. «Այն ինչ այսօր կատարվում է ցույց է տալիս, որ եթե ինչ-որ մեկն ուզում է, որ դու «չծաղկես», նա դրան կհասնի ու թեև ֆինանսական շուկան շուկա է, բայց դրա գործիքակազմն էլ հիմնվում է քաղաքականության վրա: Սակայն այն հաշվարկը, թե Ռուսաստանը այդ ֆինանսական ճնշման տակ կփոխի իր քաղաքական կուրսը դատարկ ժամանակի կորուստ է. ի վերջո, մեկուսացնել Ռուսաստանին անհնար է և ստիպել ենթարկվել մի շարք երկրներ` Չնաստան, Հնդկաստան և այլն ևս անհնար է»:

Ֆ.Լուկյանովը հավելեց` Չինաստանի հետ մերձեցումը այլընտրանք չունի, ինչպես նաև չունի տնտեսական մոդելի փոփոխությունը:

Նշենք, որ կլոր սեղանը կայացավ Հարավային Կովկասի երկրների լրագրողների վերապատրաստման ծրագրի շրջանակում, որը կազմակերպել է ռուսական «Հյուսիս-Հարավ» քաղաքագիտական կենտրոնը: